*D Daz harnasch was von in getân. dô schouweten disen bunten man al, die wunders kunden jehen, die mohtenz dâ mit wârheite spehen: Feirefiz truoc vremdiu mâl. Gawan sprach ze Parzival: »neve, tuo den gesellen dîn mir kunt; er treit sô wæhen schîn, dem ich gelîchez nie gesach.« Parzival zuo sîme wirte sprach: »bin ich dîn mâc, daz ist ouch er; des sî Gahmuret dîn wer. diz ist der künec von Zazamanch. mîn vater dort mit prîse erranc Belakanen, diu disen rîter truoc.« Gawan den heiden dô genuoc kuste. der rîche Feirefiz was beidiu swarz und wîz über al sîn vel, wan daz der munt gein halbem zil tet rœte kunt. Man brâht in beidesamt gewant, daz was vür tiwer kost erkant; ûz Gawans kamern truoc manz dar. dô kômen vrouwen lieht gevar. diu herzogîn liez Cundrie unt Sangiven küssen ê; si selbe unt Arnive in dô kusten. Feirefiz was vrô, daz er sô clâre vrouwen sach; ich wæne im liebe dran geschach.

*m Dô daz harnasch wart von in getân, dô schouweten disen bunten man alle, die wunders kunden jehen, die mohtenz dâ mit wârheit spehen: Ferefiz truoc vremdiu mâl. Gawan sprach zuo Parcifal: »neve, tuo den gesellen dîn mir kunt; er treit sô wæhen schîn, dem ich glîches nie gesach.« Parcifal ze Gawane sprach: »bin ich dîn mâc, daz ist ouch er; des sî Gahmuret dîn wer. daz ist der künic von Zazamanc. mîn vater dort mit prîse erranc Belakanen, diu disen ritter truoc.« Gawan den heiden dô genuoc kuste, den rîchen Ferefiz was beidiu swarz und wîz über al sîn vel, wan daz der munt gegen halbem zil tet rœte kunt. man brâht in beiden sament gewant, daz was vür tiure koste erkant; ûz Gawanes kamer truoc manz dar. dô kômen vrowen lieht gevar. diu herzogîn liez Condrie und Sangiven küssen ê; si selbe und Arnive in dô kusten. Ferefiz was vrô, dô er sô clâre vrowen sach; ich wæne im liebe dâr an geschach.

*G daz harnasch was von im getân. dô schouweten disen man alle, die werdes kunden jehen, daz mohtens dâ mit wârheit sehen: Feirafiz truoc vremdiu mâl. Gawan sprach ze Parzival: »neve, tuo den gesellen dîn mir kunt; er treit sô wæhen schîn, dem ich glîches nie gesach.« Parzival ze sînem wirte sprach: »bin ich dîn mâc, daz ist ouch er; des sî Gahmuret dîn gewer. ditze ist der künic von Zazamanc. mîn vater dort mit prîse erranc Belacanen, diu disen rîter truoc.« Gawan den heiden dô genuoc kuste, den rîchen Feirafiz. er was beidiu swarz unde wîz über al sîn vel, wan dâ der munt gein blanken teil tet rœte kunt. man brâhte in beiden sament gewant, daz was vür tiure kost erkant; ûz Gawans kamer truoc man dar. dô kômen vrouwen lieht gevar. diu herzogîn liez Gundrie unde Sagiven küssen ê; si selbe unde Arnive dô kusten. Feirafiz was vrô, daz er sô clâre vrouwen sach; ich wæne im liebe dran geschach.

*T der harnasch was von im getân. dô schouweten disen bunten man alle, die wunders kunden jehen, die mohten dâ mit wârheit sehen: Ferefis truoc vremdiu mâl. Gawan sprach zuo Parcifal: »neve, tuo den gesellen dîn mir kunt; er treit sô wæhen schîn, dem ich glîches nie gesach.« Parcifal zuo sîme wirte sprach: »bin ich dîn mâc, daz ist ouch er; des sî Gahmuret dîn wer. diz ist der künec von Zazamanc. mîn vater dort mit prîse erranc Belacanen, diu disen rîter truoc.« Gawan den heiden genuoc kuste. der rîche Ferefis was beidiu swarz und wîz über al sîn vel, wan daz der munt gein halbem teile tet rœte kunt. man brâht in beiden samt gewant, daz was vür tiure kost erkant; ûz Gawans kamer truoc man dar. dar kômen vrouwen lieht gevar. diu herzogîn liez Kundrie und Seyven küssen ê; si selbe und Arnyve dô kusten. Ferefis was vrô, daz er sô clâre vrouwen sach; ich wæne im liebe dran geschach.