*D Dô was bî dem selben tage über al daz her gemeiniu klage, daz Parzival, der werde man, von in was gescheiden dan. Artus mit râte sich bewac, daz er unz an den ahten tac Parzivals dâ wolde bîten unt von der stat niht rîten. Gramoflanzes her was ouch komen; dem was manec wîter rinc genomen mit zelten wol gezieret. dâ was geloschieret den stolzen werden liuten. man möhtez den vier briuten niht baz erbieten mit vreude siten. von Schastel Marvale geriten kom ein man zer selben zît; der seite alsus, ez wære ein strît ûfem warthûs in der sûl gesehen. swaz ie mit swerten wære geschehen, »daz ist gein disem strîte ein niht«. vor Gawane er des mæres giht, dâ der bî Artuse saz. manec rîter dâ mit rede maz, von wem der strît dâ wære getân. Artus, der künec, sprach dô sân: »Den strît ich einhalp wol weiz. in streit mîn neve von Kanvoleiz, der von uns schiet hiute vruo.« dô riten ouch dise zwêne zuo.

*m ouch was bî dem selben tage über al daz her gemeiniu klage, daz Parcifal, der werde man, von in was sus gescheiden dan. Artus mit râte sich bewac, daz er unz an den ahten tac Parcifals dâ wolte bîten und von der stat niht rîten. Gramolanzes her was komen; dem was manic wîter rinc genomen mit zelten wol gezieret. dâ was geloschieret den stolzen werden liuten. man möhte ez den vier briuten niht baz erbieten mit vröuden siten. von Schahtel Marveile geriten kam ein man zer selben zît; der seite alsus, ez wære ein strît ûf dem warthûs in der sûl gesehen. waz ie mit swerten was geschehen, »daz ist gegen disem strît ein niht«. vor Gawan er des mæres giht, dâ der bî Artuse saz. manic man dâ mit rede maz, von wem der strît dâ wær getân. Artus, der künic, sprach dô sân: »den strît ich einhalp wol weiz. in tet mîn neve von Kanvoleiz, der von uns schiet hiute vruo.« dô riten ouch die zwêne zuo.

*G Dô was bî dem selben tage über al daz her gemeiniu klage, daz Parzival, der werde man, sus was von in gescheiden dan. Artus mit râte sich bewac, daz er unze an den vierden tac Parzivals dâ wolde bîten unde von der stat niht rîten. Gramoflanzes her was komen; dem was manic wîte rinc genomen mit gezelten wol geziert. dâ was geloisiert den stolzen werden liuten. man möhtez den vier briuten baz erbieten niht mit vröuden siten. von Tschastel Marveile geriten kom ein man zer selben zît; der seite alsus, ez wære ein strît ûf dem warthûse in der sûl gesehen. swaz ie von swerten wære geschehen, »daz ist gein disem strîte ein niht«. vor Gawan er des mæres giht, dâ der bî Artuse saz. manic rîter dâ mit rede maz, von wem der strît dâ wære getân. Artus, der künic, sprach dô sân: »den strît ich einhalp wol weiz. in streit mîn neve von Kanvoleiz, der von uns schiet hiute vruo.« dô riten ouch dise zwêne zuo.

*T Dô was bî dem selben tage über al daz her gemeiniu klage, daz Parcifal, der werde man, sus was von in gescheiden dan. Artus mit râte sich bewac, daz er unz an den vierden tac Parcifals dâ wolte bîten und von der stat niht rîten. Gramoflanzes her was ouch komen; dem was manec wîter rinc genomen mit gezelten wol gezieret. dâ was geloschieret den stolzen werden liuten. man möht ez den vier briuten niht baz erbieten mit vreude siten. von Tschahtel Marvele geriten kom ein man zuo der selben zît; der sagete alsus, ez wære ein strît ûf dem warthûse in der sûl gesehen. waz ie mit swerten wære geschehen, »daz ist gein disem strîte ein niht«. vor Gawane er der mære giht, dâ der bî Artuse saz. manec rîter dâ mit rede maz, von wem der strît wære getân. Artus, der künec, sprach dô sân: »den strît ich einhalp wol weiz. in streit mîn neve von Kanvoleiz, der von uns schiet hiute morgen vruo.« dô riten ouch dise zwêne zuo.