*D Dô disiu rede von im geschach, Parzival zem heiden sprach: »wâ von sît ir ein Anschevin? Anschouwe ist von erbe mîn, bürge, lant unt stete. hêrre, ir sult durch mîne bete einen anderen namen kiesen. solt ich mîn lant verliesen unt die werden stat Bealzenan, sô het ir mir gewalt getân. ist unser deweder ein Anschevin, daz sol ich von arde sîn. Doch ist mir vür wâr gesagt, daz ein helt unverzagt won in der heidenschaft, der habe mit rîterlîcher kraft minne unt prîs behalten, daz er muoz beider walten. der ist ze bruoder mir benant; si hânt in dâ vür prîs erkant.« Aber sprach dô Parzival: »hêrre, iwers antlützes mâl, het ich diu kuntlîche ersehen, sô würde iu schiere von mir verjehen, als er mir kunt ist getân. hêrre, welt irz an mich lân, sô enblœzet iwer houbet. ob ir mirz geloubet, mîn hant iuch strîtes gar verbirt, unz ez ander stunt gewâpent wirt.«

*m Dô disiu rede von im geschach, Parcifal zuo dem heiden sprach: »wâ von sît ir ein Anschevin? Anschouwe ist von erbe mîn, bürge, lant und stete. hêrre, ir sulet durch mîn bete einen andern namen kiesen. solt ich mîn lant verliesen und die werden stat Bealtzenan, sô het ir mir gewalt getân. ist unser deweder ein Anschevin, daz sol ich von arde sîn. doch ist mir vür wâr gesaget, daz ein helt unverzaget won in der heidenschaft, der hab mit ritterlîcher kraft minne und prîs behalten, daz er muoz beider walten. der ist zuo bruoder mir genant; si hânt in dâ vür prîs erkant.« aber sprach Parcifal: »hêrre, iuwer antlitzes mâl, het ich diu kuntlîch ersehen, sô würde iu schier von mir verjehen, als er mir kunt ist getân. hêrre, welt irz an mich lân, sô enblœzet iuwer houbet. ob ir mirz gloubet, mîn hant iuch strîtes gar verbirt, unz ez ander stunt gewâpent wirt.«

*G Dô disiu rede von im geschach, Parzival zem heiden sprach: »wâ von sît ir ein Anschevin? Anschouwe ist von erbe mîn, bürge, lant unde stete. hêrre, ir sult durch mîne bete iu einen andern namen kiesen. sol ich mîn lant verliesen unde die werden stat Belzenan, sô het ir mir gewalt getân. unde ist unser deweder ein Anschevin, daz sol ich von arde sîn. doch ist mir vür wâr gesaget, daz ein helt unverzaget wone in der heidenschaft unde habe mit rîterlîcher kraft minne unde brîs behalten, daz er müeze bêder walten. der ist ze bruoder mir genant; si hânt in dâ vür brîs erkant.« aber sprach dô Parzival: »hêrre, iwers antlützes mâl, het ich diu kuntlîche ersehen, sô würde iu schiere von mir verjehen, als mir kunt ist getân. hêrre, welt irz ane mich lân, sô enblœzet iwer houbet. obe ir mirz gloubet, mîn hant iuch strîtes gar verbirt, unze ez ander stunt gewâpent wirt.«

*T dô disiu rede von im geschach, Parcifal zuo dem heiden sprach: »wâ von sît ir ein Anschevin? Anschouwe ist von erbe mîn, bürge, lant und stete. hêrre, ir sult durch mîne bete iu einen andern namen kiesen. solt ich mîn lant verliesen und die werden stat zuo Bealzenan, sô hetet ir mir gewalt getân. sîn wir beide ein Anschevin, daz sol ich von arde sîn. doch ist mir vür wâr gesaget, daz ein helt unverzaget won in der heidenschaft und habe mit rîterlîcher kraft minne und prîs behalten, daz er müeze beider walten. der ist zuo bruoder mir benant; si hânt in dâ vür prîs erkant.« Aber sprach dô Parcifal: »hêrre, iuwers antlitzes mâl, hete ich diu kuntlîche ersehen, sô würde iu schiere von mir verjehen, als mir kunt ist getân. hêrre, wolt ir ez an mich lân, sô enblœzet iuwer houbet. ob ir mir ez geloubet, mîn hant iuch strîtes gar verbirt, unz daz ez ander stunt gewâpent wirt.«