*D Der heiden truoc zwô geselleschaft, dâr an doch lac sîn meistiu kraft: einiu, daz er minne pflac, diu mit stæte in sîme herzen lac; daz ander wâren steine, die mit edelem arde reine in hôchgemüete lêrten unt sîne kraft gemêrten. Mich müet, daz der getoufte an strîte und an loufte sus müedet unt an starken slegen. ob im nû niht gehelfen megen Condwiramurs noch der Grâl, werlîcher Parzival, sô müezest einen trôst doch haben, daz die clâren, süezen knaben sus vruo niht verweiset sîn, Kardeiz unt Loherangrin, die bêde lebendic truoc sîn wîp, dô er jungest umbevienc ir lîp. mit rehter kiusche erworben kint, ich wæne, diu smannes sælde sint. Der getoufte nam an kreften zuo. er dâhte - des was im niht ze vruo - an sîn wîp, die küneginne, unt an ir werden minne, die er mit swertes schimpfe erranc, dâ viwer von slegen ûz helmen spranc, vor Pelrapeire an Clamide. Thabronit unde Thasme,

*m der heiden truoc zwô geselleschaft, dâr an doch lac sîn meistiu kraft: einiu, daz er minne pflac, diu mit stæte in sînem herzen lac; daz ander wâren steine, die mit edelm arde reine hôchgemüete in lêrten und sîn kraft gemêrten. mich müet, daz der getoufte an strîte und ouch an loufte sus müedet und an starken slegen. ob im nû niht gehelfen megen Condwieramurs noch der Grâl, vil werlîcher Parcifal, sô muost dû einen trôst doch haben, daz die clâren, süezen knaben sus vruo niht verweiset sîn, Cardeiz und Lohelangrin, die beide lebendic truoc sîn wîp, dô er jungst umbevienc ir lîp. mit rehter kiusche erworben kint, ich wæne, diu des mannes sælde sint. der getoufte nam an kreften zuo. er gedâht - daz was im niht ze vruo - an sîn wîp, die küniginne, und an ir werden minne, die er mit swertes schimpf erranc, dâ viur ûz helmen spranc, vor Pelraperie an Clamide. Tabronit und Thasme,

*G Der heiden truoc geselleschaft, dâr an doch lac sîn meistiu kraft: einiu, daz er minne pflac, diu mit stæte in sînem herzen lac; daz ander wâren steine mit edelm arde reine in hôchgemüete lêrten unde sîne kraft mêrten. mich müet, daz der getoufte an strîte unde an loufte müedet unde an starken slegen. obe im nû niht gehelfen megen Condwiramurs noch der Grâl, werlîcher Parzival, nû muostû einen trôst doch haben, daz die clâren, süezen knaben ††, Karadeiz unde Loherangrin, die bêde lebende truoc sîn wîp, dô er jungest umbevienc ir lîp. der getoufte nam an kreften zuo. er dâhte - ez was im niht ze vruo - an sîn wîp, die kuniginne, unde an ir werde minne, die er mit swertes schimpfe erranc, daz viur ûz helmen von slegen spranc, von Pelrapeire Clamide. Tabrunit unde Tasme,

*T der heiden truoc geselleschaft, dâr ane ouch lac sîn meistiu kraft: einiu, daz er minnen pflac, diu mit stæte an sîme herzen lac; daz ander wâren steine, die mit edelme arde reine in hôchgemüete lêrten und sîne kraft gemêrten. mich müete, daz der getoufte an strîte und an loufte sus muote und an starken slegen. ob im nû niht gehelfen megen Kundewiramurs und der Grâl, werlîcher Parcifal, nû muostû einen trôst haben, daz die clâren, süezen knaben sô vrüeje niht verwîset sîn, Kardeiz und Lohrangrin, die bêde lebendic truoc ein wîp, dô er jungest umbevienc ir lîp. mit rehter kiusche erworben kint, ich wæne, diu des mannes sælde sint. der getoufte nam an kreften zuo. er gedâhte - des was im niht zuo vruo - an sîn wîp, die küneginne, und an ir werde minne, die er mit swertes schimpfe erranc, dâ viur ûz den helmen von slegen spranc, vor Peilrapere an Clamide. Tabrunit und Tasme,