*D Vür die küneginne man dô truoc daz trinken. trunken si genuoc, die rîter unt die vrouwen gar, si wurden deste baz gevar. Man truog ouch trinken dort hin în Artus unde Brandelidelin. der schenke gienc her wider dan; Artus sîne rede alsus huob an: »hêr künec, nû lât siz alsô tuon, daz der künec, iwerre swester sun, mîner swester sun mir het erslagen. wolt er denne minne tragen gein mîner niftel, der magt, diu im ir kumber ouch dort klagt, dâ wir si liezen sitzen, vüere si denne mit witzen, si würde im nimmer drumbe holt unt teilte im solhen hazzes solt, dês den künec möhte erdriezen, wolt er ir iht geniezen. swâ haz die minne undervert, dem stætem herzen vreude er wert.« Dô sprach der künec von Punturtoys zArtuse dem Bertenoys: »hêrre, si sint unserer swester kint, die gein ein ander in hazze sint; wir sulen den kampf understên. dâne mac niht anders an ergên, wan daz si ein ander minnen mit herzenlîchen sinnen.

*m vür die künigîn man dô truoc daz trinken. trunken si genuoc, die ritter und die vrowen gar, si wurden deste baz gevar. man truoc ouch trinken dort hin în Artuse und Brandelidelin. der schenke gienc hin wider dan; Artus sîn rede alsus huop an: »hêr künic, nû lât daz alsô sîn, daz iuwer neve den neven mîn in einem kreize habe erslagen. wolte er danne minne tragen gegen mîner niftel, der maget, diu im ir kumber ouch dort klaget, dâ wir si liezen sitzen, vüere si dan mit witzen, si würde im nimmer dâr umb holt und teilte im solichen hazzes solt, dês in möhte verdriezen, wolte er ir iht geniezen. wâ haz die minne undervert, dem stæten herzen vröude ez wert.« dô sprach der künic von Ponturteis zuo Artuse dem Brituneis: »hêrre, si sint unser swester kint, die gegen ein ander in hazze sint; wir sollen den kampf understân. dan ez mac niht anders ergân, wan daz si ein ander minnen mit herzelîchen sinnen.

*G vür die küngîn man truoc daz trinken. trunken si genuoc, die rîter unde die vrouwen gar, si wurden deste baz gevar. man truoc ouch trinken hin în Artus unde Brandelidelin. der schenke gie her wider dan; Artus sîn rede alsus huop an: »hêr künic, nû lât siz alsô tuon, daz der künic, iwer swester sun, mîner swester sun mir het erslagen, unde wolde er dane minne tragen gein sîner swester, der maget, diu im ir kumber ouch dort klaget, dâ wir si liezen sitzen, vüere si danne mit witzen, Sine würde im drumbe nimmer holt unde teilte im sölchen hazzes solt, deis den künic möht erdriezen, wolde er ir iht geniezen. swâ haz die minne undervert, dem stæten herzen ez vröude wert.« dô sprach der künic ûz Ponturteis ze Artus dem Britaneis: »hêrre, si sint unser swester kint, die gein ein ander in hazze sint; wir sülen den kampf understên. dâne mac niht anders an ergên, wan daz si ein ander minnen mit herzen unde mit sinnen.

*T vür die küneginne man truoc daz trinken. trunken si genuoc, die rîter und die vrouwen gar, si wurden deste baz gevar. man truoc ouch trinken dort hin în Artuse und Brandelidelin. der schenke gienc her wider dan; Artus sîne rede alsus huop an: »hêr künec, nû lât si ez alsô tuon, daz der künec, iuwer swester sun, mîner swester sun habe erslagen, und wolt er dan minne tragen gein mîner nifteln, der maget, diu im ir kumber ouch dort klaget, dâ wir si liezen sitzen, vüere si danne mit witzen, si enwürde im dâr umb niemer holt und teilt im hazzes solichen solt, daz ez den künec möhte erdriezen, wolt er ir geniezen. Wâ haz die minne undervert, dem stæten herzen ez vreude wert.« dô sprach der künec von Punterteis zuo Artuse dem Brituneis: »hêrre, si sint unser swester kint, die gein ein ander in hazze sint; wir soln den haz understân. dâ enmac niht anders ane ergân wan daz ein ander minnen mit herzen und mit sinnen.