*D Si erbeizten, die dâ komen sint. des künec Gramoflanzes kint manegiu vor im sprungen, inz poulûn si sich drungen. die kamerære wider strît rûmten eine strâzen wît gein der Bertenoyse künegîn. sîn œheim Brandelidelin vorem künege inz poulûn gienc; Ginover den mit kusse enpfienc. Der künec wart ouch enpfangen sus. Bernouten unt Affinamus die künegîn man ouch küssen sach. Artus ze Gramoflanze sprach: »ê ir sitzens beginnet, seht, ob ir decheine minnet dirre vrouwen, und küsset sie; iu beiden sî daz erloubet hie.« im sagete, wer sîn vriwendinne was, ein brief, den er ze velde las. ich meine, daz er ir bruoder sach, diu im vor alder werlde jach ir werden minne tougen. Gramoflanzes ougen si erkanten, diu im minne truoc. sîn vreude hôch was genuoc, sît Artus het erloubet daz, daz si beide ein ander âne haz mit gruoze enpfâhen tâten kunt: er kuste Itonjen an den munt.

*m si erbeizten, die dâ komen sint. des künic Gramolanzes kint manigiu vor in sprungen, in die pavelûn si sich drungen. die kamerer in wider strît rûmden ein strâze wît gegen der Brituneise künigîn. der künic Brandelidelin vor Gramolanz †und† daz pavelûn gienc; Ginover den mit kiusch enpfienc. der künic wart enpfangen sus. Bernouten und Offinamus die künigîn man ouch küssen sach. Artus zuo Gramolanze sprach: »ê ir sitzens beginnet, seht, ob ir dekein minnet diser vrowen, und küsset sie; iu beiden sî daz erloubet hie.« dô sagte im, wer sîn vriundîn was, ein brief, den er zuo velde las. ich mein, daz er ir bruoder sach, diu im vor aller der werlte jach ir werden minne tougen. Gramolanzes ougen si erkanten, diu im minne truoc. sîn vröude was hôch genuoc, sît Artus het erloubet daz, daz si beide ein ander âne haz mit gruoze enpfâhen tâten kunt: er kuste Ithonien an den munt.

*G Si erbeizten, die dâ komen sint. des künic Gramoflanzes kint manigiu vor im sprungen, in daz pavelûn si drungen. die kamerære ze bêder sît rûmden eine strâze wît gein der britanischer künigîn. sîn œheim Brandelidelin hiez er vor im gên dar în; den kuste Schinover, diu künigîn. der künic wart ouch enpfangen sus. Beakurs unde Affinamus die künigîn man küssen sach. Artus ze Gramoflanze sprach: »ê ir sitzen beginnet, sehet, obe ir deheine minnet dirre vrouwen, unde küsset die; iu beiden sîz erloubet hie.« im sagte, wer sîn vriundinne was, ein brief, den er ze velde las. ich meine, daz er ir bruoder sach, dem si vor alder werlde jach ir werden minne tougen. Gramoflanzes ougen erkanden si, diu im minne truoc. des was sîn vröude hôch genuoc, sît Artus erloubte daz, daz si beidiu ein ander âne haz mit gruoze enpfâhen tâten kunt: er kuste Itonien an den munt.

*T si erbeizten, die dâ komen sint. des küneges Gramoflanzes kint manegiu vor in sprungen, in daz pavelûn si drungen. die kamerære in wider strît rûmten eine strâze wît gein der Brituneiser künegîn. sîn œheim Brandelidelin vorme künege in daz pavelûn gienc; Gynover den mit kusse entvienc. der künec wart ouch entvangen sus. Bernuot und Affinamus die küneginne man küssen sach. Artus zuo Gramoflanze sprach: »ê ir sitzen beginnet, sehet, ob ir dekeine minnet dirre vrouwen, und küsset die; iu beiden sî daz erloubet hie.« im sagete, wer sîn vriundîn was, ein brief, den er zuo velde las. ich meine, daz er ir bruoder sach, diu im vor aller der werlde jach ir werden minne tougen. Gramoflanzes ougen erkanten si, diu im minne truoc. dô was sîn vreude hôch genuoc, sît Artus erloubete daz, daz si beide ein ander âne haz mit gruoze tâten entvâhen kunt: er kuste Itonien an den munt.