*D Mit Beacurse komen sint mêr danne vünfzec clâriu kint, die von ir art gâben liehten schîn, herzogen und grævelîn. dâ reit ouch etslîch küneges sun. dô sach man grôz enpfâhen tuon von den kinden ze bêder sît; si enpfiengen ein ander âne nît. Beacurs pflac varwe lieht. der künec sich vrâgens sûmte niht, Bene im sagete mære, wer der clâre rîter wære: »ez ist Beacurs, Lotes kint.« dô dâhter: »herze, nû vint si, diu dem gelîche, der hie rîtet sô minneclîche. si ist vür wâr sîn swester, diu, geworht in Sinzester, mit ir spærwære sande mir den huot. ob si mir mêr genâde tuot, al irdischiu rîcheit, ob derde wære noch als breit, dâ vür næme ich si einen. si solz mit triwen meinen. ûf ir genâde kum ich hie; si hât mich sô getrœstet ie, ich getrûwe ir wol, daz si mir tuot, dâ von sich hœhert baz mîn muot.« Er nam ir clâren bruoder hant in die sîne; diu was ouch lieht erkant.

*m Mit Beacurs komen sint mê dan vünfzic kint, die von ir art gâben liehten schîn, herzogen und grævelîn. dâ reit ouch etlîches küniges sun. dô sach man grôz enpfâhen tuon von den kinden zuo beider sît; si enpfiengen ein ander âne nît. Beacurs pflac varwe lieht. der künic sich vrâgens sûmte niht, Bene im sagte mære, daz der clâre ritter wære Beacurs, Lotes kint. dô gedâht er: »herze, nû vint si, diu dem glîche, der hie rîtet minneclîche. si ist vür wâr sîn swester, diu, geworht in Sinzester, mit ir sperwære sante mir den huot. ob si mir mê genâden tuot, alliu irdenschiu rîcheit, wær diu erde noch alsô breit, dâ vür næme ich si einen. si solz mit triuwen scheinen. ûf ir gnâde kome ich hie; si het mich sô getrœstet ie, ich getriuwe ir wol, waz si mir tuot, dâ von sich hœhet baz mîn muot.« er nam ir clâren bruoder hant in die sîne; diu was ouch lieht erkant.

*G Mit Beakurs komen sint mê dane vünfzec clâriu kint, die von arde gâben liehten schîn, herzogen unde grævelîn. dâ reit ouch etslîch küniges sun. man sach dâ grôz enpfâhen tuon von den kinden ze bêder sît; die enpfiengen ein ander âne nît. Beakurs truog varwe lieht. der künic sich vrâge sûmte niht, im sagte Bene mære, wer der clâre rîter wære: »ez ist Beakurs, Lotes kint.« dô dâht er: »herze, nû vint si, diu dem glîche, der hie rîtet sô minniclîche. si ist benamen sîn swester, diu, geworht in Sincester, mit ir sparwære sande ir huot. op si mir gnâde tuot? op diu erde wære sô breit, alle irdeschen rîcheit, dâ vür næme ich si einen. si solz mit triwen meinen. ûf ir gnâde kum ich hie; si hât mich doch getrœstet ie, ich getrûwe ir wol, daz si mir tuot, dâ von sich hœhet baz mîn muot.« er nam ir clâren bruoder hant in die sîne; diu ouch was lieht erkant.

*T mit Beakurse komen sint wol vünfzic clâriu kint, die von arte gâben liehten schîn, herzogen und grævelîn. dâ reit ouch etlîch küneges sun. man sach dâ grôz entvâhen tuon von den kinden zuo beider sît; die entviengen ein ander âne nît. Beakurs truoc varwe lieht. der künec sich vrâge sûmete niht, im sagete Bene mære, wer der clâre rîter wære: »ez ist Beakurs, Lotes kint.« »nû, herze«, dâhter, »vint si, diu dem sî gelîch, der hie rîtet sô minneclîch. si ist bînamen sîn swester, diu, geworht in Sincester, mit ir sperwære sante mir ir huot. ob si mir gnâde tuot? ob diu erde wære alsô breit, alle irdische rîcheit, dâ vür næme ich si einen. si sol ez mit triuwen meinen. ûf ir gnâde kome ich hie; si hât mich sô getrœstet ie, ich getrûwe wol, daz si mir tuot, dâ von sich hebet baz mîn muot.« er nam ir clâren bruoder hant in die sîne; diu was ouch lieht erkant.