*D Artus ze Parzivale sprach: »neve, sît dir sus geschach, daz dû des kampfes bæte unt manlîche tæte unt Gawan dirz versagete, daz dîn munt dô sêre klagete, nû hâstû den kampf iedoch gestriten gein im, der sîn dâ het erbiten, ez wære uns leit oder liep. dû sliche von uns als ein diep. wir heten anders dîne hant dises kampfes wol erwant. nû darf Gawan des zürnen niht, swaz man dir drumbe prîses giht.« Gawan sprach: »mir ist niht leit mînes neven hôhiu werdecheit. mir ist dennoch morgen al ze vruo, sol ich kampfes grîfen zuo. wolte michs der künec erlâzen, des jæhe ich im gein mâzen.« Daz her reit în mit maneger schar. man sach dâ vrouwen wol gevar unt manegen zimierten man, daz nie dechein her mêr gewan solher zimierde wunder. die von der tavelrunder unt diu messenîe der herzogîn, ir wâpenröcke gâben schîn mit pfelle von Cynidunte und brâht von Pelpiunte;

*m Artus zuo Parcifal sprach: »neve, sît dir sus geschach, daz dû des kampfes bæte und manlîche tæte und Gawan dirz versagte, daz dîn munt sô sêre klagte, nû hâstû den kampf doch gestriten gegen im, der sîn dâ het erbiten, ez wær uns leit oder liep. dû sliche von uns als ein diep. wir heten anders dîne hant dises kampfes wol erwant. nû darf Gawan des zürnen niht, waz man dir dar umbe prîses giht.« Gawan sprach: »mir ist †noch† leit mînes neven hôhiu wirdicheit. mir ist dannoch morgen alzuo vruo, sol ich kampfes grîfen zuo. wolt michs der künic erlâzen, daz gihe ich im gegen mâzen.« daz her reit în mit maniger schar. man sach dâ vrowen wol gevar und manigen gezimierten man, daz nie kein her mê gewan solich zimierde wunder. die von der tavelrunder und diu massenîe der herzogîn, ir wâpenröcke gâben schîn mit pfelle von Zunidunte und brâhte von Pelpiunte;

*G Artus ze Parzivale sprach: »neve, sît dir sus geschach, daz dû des kampfes bæte unde manlîche tæte unde Gawan dirz versagte, daz dîn munt dô sêre klagte, nû hâstû den kampf iedoch gestriten mit im, der sîn dâ het erbiten, ez wære uns leit ode liep. dô ersliche dûn als ein diep. wir heten anders dîne hant disses kampfes wol erwant. nûne darf Gawan daz zürnen niht, swaz man dir brîses drumbe giht.« Gawan sprach: »mirn ist niht leit mînes neven hôhiu werdecheit. mir ist dannoch morgen al ze vruo, sol ich kampfes grîfen zuo. wolde michs der künic erlâzen, des jæhe ich im ze mâzen.« daz her reit în mit maniger schar. man sach dâ vrouwen wolgevar unde manigen gezimierten man, daz nie dehein her mê gewan sölher zimierde wunder. die von der tavelrunder unde diu messenîe der herzogîn, ir wâpenröcke gâben schîn von pfelle von Zididunt unde brâht von Pelimunt;

*T Artus zuo Parcifal sprach: »neve, sît dir sus geschach, daz dû des kampfes bæte und manlîchen tæte und Gawan dir ez versagete, daz dîn munt dô klagete, nû hâst dû den kampf dô gestriten gein im, der sîn dâ hete erbiten, ez wære im leit oder liep. doch ersliche dû in als ein diep. wir heten anders dîne hant dis kampfes wol erwant. nû endarf Gawan des zürnen niht, waz man dir dar umb prîses giht.« Gawan sprach: »mir ist niht leit mînes neven hôhiu wirdecheit. mir ist morne dannoch alzuo vruo, sol ich kampfes grîfen zuo. wolte mich es der künec erlâzen, des jæhe ich im zuo mâzen.« daz her în reit mit maneger schar. man sach dâ vrouwen wol gevar und manegen gezimierten man, daz nie kein her mêr gewan solich zimierde wunder. die von der tavelrunder und diu massenîe der herzogîn, ir wâpenröcke gâben schîn mit pfelle von Zinidunt und brâhte von Pelpunt;