*D Got müeze ir wîplîch êre sehen. ich wil immer vrouwen sælden jehen; ich scham mich noch sô sêre, ungern ich gein in kêre.« »Ez muoz doch sîn«, sprach Gawan. der vuorte Parzivaln dan, dâ in kusten vier künegîn. die herzogîn ez lêrte pîn, daz si den küssen solde, der ir gruozes dô niht wolde, dô si minne unt ir lant im bôt - des kom si hie von scham in nôt -, dô er vor Logroys gestreit unt si sô verre nâch im reit. Parzival, der clâre, wart des âne vâre überparlieret, daz wart gecondwieret elliu scham ûz sîme herzen dô. âne bliwecheit wart er vrô. Gawan von rehten schulden gebôt bî sînen hulden vroun Benen, daz ir süezer munt Itonjen des niht tæte kunt, »daz mich der künec Gramoflanz sus hazzet umbe sînen kranz unt daz wir morgen ein ander strît sulen geben ze rehter kampfes zît. mîner swester soltû des niht sagen unt solt dîn weinen gar verdagen.«

*m got müez ir wîplîche êre sehen. ich wil iemer vrowen sælde jehen; ich scham mich noch sô sêre, ungern ich gegen in kêre.« »ez muoz doch sîn«, sprach Gawan. er vuorte Parcifalen dan, dâ in kusten vier künigîn. die herzogîn er lêrte pîn, daz si den küssen solte, der ir gruozes dô niht wolte, dô si minne und ir lant im bôt - des kam si hie von scham in nôt -, dô er vor Logrois gestreit und si sô verre nâch im reit. Parcifal, der clâre, wart des âne vâre überparlieret, daz wart gecondwieret alliu scham ûz sînem herzen dô. âne blœdeheit wart er vrô. Gawan von rehten schulden gebôt bî sînen hulden vrowe Benen, daz ir süezer munt Ithonien des niht tæte kunt, daz in der künic Gramolanz sô hazzete umb sînen kranz und daz si morne ein ander strît solten geben zuo rehter kampfzît. er sprach: »dîn weinen soltû verdagen und solt niht mîner swester sagen.«

*G Got müeze ir wîplîch êre sehen. ich wil mîner vrouwen sælden jehen; ich scham mich noch sêre, ungerne ich gein in kêre.« »ez muoz doch sîn«, sprach Gawan. er vuorte Parzivaln dan, dâ in kusten vier künigîn. die herzogîn ez lêrte pîn, daz si den küssen solde, der doch ir gruozes niene wolde, dô sir lant unde ir minne im bôt - des wart si hie vor schame rôt -, dô er vor Logroys gestreit unde si sô verre nâch im reit. Parzival, der clâre, wart des âne vâre überparlieret. ez wart condewieret elliu scham ûz sînem herzen dô. âne blûkeit wart er vrô. Gawan mit rehten schulden gebôt bî sînen hulden vroun Benen, daz ir munt Itonien daz niht tæte kunt, »daz mich der künic Gramoflanz sus hazzet umbe sînen kranz unde daz wir morgen ein ander strît sülen geben ze rehter kampfzît. mîner swester soltû des niht sagen unde solt dîn weinen gar verdagen.«

*T got müeze ir wîplîche êre sehen. ich wil mîner vrouwen sælde jehen; ich schame mich noch sô sêre, ungerne ich gein in kêre.« »ez muoz doch sîn«, sprach Gawan. er vuorte Parcifaln dan, dâ in kusten viere künegîn. die herzoginne ez lêrte pîn, daz si den küssen solte, der doch ir gruozes niht enwolte, dô si ir lant und minne im bôt - des wart si hie von schame rôt -, dô er vor Logrois gestreit und si sô verre nâch im gereit. Parcifal, der clâre, wart des âne vâre überparlieret. ez wart gecundwieret alliu schame ûz sîme herzen dô. âne blœdekeit wart er vrô. Gawan mit rehten schulden gebôt bî sînen hulden vrou Bene, daz ir süezer munt Itonien daz niht tæte kunt, »daz mich der künec Gramoflanz sus hazzet umb sînen kranz und daz wir morne ein ander strît soln geben zuo rehter kampfzît. mîner swester solt dû des niht sagen und solt dîn weinen gar verdagen«.