*D Sus sint diu alten wâpen mîn ê dicke und aber worden schîn, daz ich gein dem werden Gawan al hie mîn strîten hân getân. ich hân mich selben überstriten unt ungelückes hie erbiten. dô des strîtes wart begunnen, dô was mir sælde entrunnen.« Gawan die klage hôrte und sach; zuo sîme kampfgenôze er sprach: »owî, hêrre, wer sît ir? ir sprechet gnædeclîch gein mir. wan wære diu rede ê geschehen, die wîle ich krefte mohte jehen, sône wære ich niht von prîse komen. ir habt den prîs alhie genomen. Ich hete iwer gerne künde, wâ ich her nâch vünde mînen prîs, ob ich den suochte. die wîle es mîn sælde ruochte, sô gestreit ich ie wol einer hant.« »Neve, ich tuon mich dir bekant dienstlîche nû unt elliu mâl: ich binz, dîn neve Parzival.« Gawan sprach, dô was ez reht: »hie ist krumbiu tumpheit worden sleht. hie habent zwei herzen einvalt mit hazze erzeiget ir gewalt. dîn hant uns bêde überstreit; nû lâ dirz durch uns bêde sîn leit.

*m sus sint diu alten wâpen mîn ê dicke und aber worden schîn, daz ich gegen dem werden Gawan alhie mîn strîten hân getân. ich hân mich selben überstriten und ungelückes hie erbiten. dô des strîtes wart begunnen, dô was mir sælde entrunnen.« Gawan die klage hôrte und sach; zuo sînem kampfgenôz er sprach: »owê, hêrre, wer sît ir? ir sprecht sô vriuntlîch gegen mir. wan wær diu rede ê geschehen, die wîle ich krefte mohte jehen, sô wær ich niht von prîse komen. ir habt den prîs alhie genomen. ich het iuwer gerne künde und zuo einem vriunde mînen prîs, ob ich den suochte. die wîle es mîn sælde ruochte, sô gestreit ich ie wol einer hant.« »neve, ich tuon dir mich erkant dienstlîch nû und alliu mâl: ich binz, dîn neve Parcifal.« Gawan sprach, sô was ez reht: »hie ist krumbiu tumpheit worden sleht. hie habent zwei herzen einvalt mit haz erzöuget ir gewalt. dîn hant uns beide überstreit; nû sî dirs durch uns beide leit.

*G Sus sint diu alten wâpen mîn ie dicke unde aber worden schîn, daz gein dem werden Gawan al hie mit strîte ist getân. ich hân mich selben überstriten, ungelückes hie erbiten. dô des strîtes wart begunnen, dô was mir sælde entrunnen.« Gawan die rede hôrte und sach; ze sînem kampfgenôze er sprach: »owê, hêrre, wer sît ir? ir sprechet gnâde nû gein mir. wære diu rede ê geschehen, die wîle ich krefte mohte jehen, sône wære ich niht von brîse komen. ir habet den brîs alhie genomen. ich hiet iwer gerne künde, wâ ich her nâch vünde mînen brîs, obe ich den suochte. die wîle es mîn sælde ruochte, sô gestreit ich ie wol einer hant.« »neve, ich tuon mich dir erkant dienstlîch elliu mâl: ich bin dîn neve Parzival.« Gawan sprach: »sô ist ez reht. hie ist tumbiu tumpheit worden sleht. hie hânt zwei herze einvalt mit hazze erzeiget ir gewalt. dîn hant uns bêde überstreit; lâ dirz sîn durch uns bêde leit.

*T sus sint diu alten wâpen mîn ê dicke und aber worden schîn, daz ich gein dem werden Gawan alhie mit strîte hân getân. ich hân mich selber überstriten und ungelückes hie erbiten. dô des strîtes wart begunnen, dô was mir sælde ertrunnen.« Gawan die klage hôrte und sach; hin zuo sîme kampfgenôz er sprach: »owê, hêrre, wer sît ir? ir sprechet gnædeclîche zuo mir. wan wære diu rede ê geschehen, die wîl ich krefte mohte jehen, sô enwære ich niht von prîse komen. ir hât den prîs alhie genomen. ich hete iuwer gerne künde, wâ ich her nâch vünde mînen prîs, ob ich den suochte. die wîl es mîn sælde ruochte, sô gestreit ich wol einer hant.« »neve, ich tuon mich dir bekant dienstlîche alliu mâl: ich bin ez, dîn neve Parcifal.« Gawan sprach: »sô ist ez reht. hie ist krumbiu tumpheit worden sleht. hie hânt zwei herze einvalt mit hazze erzeiget ir gewalt. dîn hant uns beide überstreit; lâz dir ez sîn durch uns beide leit.