*D Man truog im zimierde dar von tiwerre koste alsô gevar, swem diu minne ie des betwanc, daz er nâch wîbe lône ranc, ez wære Gahmuret oder Galoes oder der künec Kyllicrates, der decheiner dorfte sînen lîp nie baz gezieren durch diu wîp. von Ipopotiticon oder ûz der wîten Acraton oder von Kalomidente oder von Agatyrsjente wart nie bezzer pfelle brâht, denne dâ zer zimierde wart erdâht. Dô kuster daz vingerlîn, daz Itonje, diu junge künegîn, im durch minne sande. ir triwe er sô bekande, swâ im kumbers wære bevilt, dâ was ir minne vür ein schilt. Der künec was gewâpent nuo. zwelf vrouwen griffen zuo ûf starken runzîden, sine solten daz niht mîden, diu clâre geselleschaft, ieslîchiu hete an einen schaft den tiwern pfelle genomen, dar unde der künec wolde komen; den vuorten si durch schate dan ob dem strît gernden man.

*m man truoc im zimierde dar von diser koste alsô gevar, †wan† diu minne ie des betwanc, daz er nâch wîbe lône ranc, ez wære Gahmuret oder Galoes oder der künic Killicrates, der dekeiner dorft sînen lîp nie baz gezieren durch diu wîp. von Ipopotiticon oder ûz der wîten Acraton oder von Kalomidente oder von Agathirsiente wart nie bezzer †† verbrâht, dan sîn zimierde was erdâht. dô kust er daz vingerlîn, daz Ithonie, diu junge künigîn, im durch minne sante. ir triuwe in sô bekante, wâ in kumbers wær bevilt, dâ was ir minne vür ein schilt. Nû daz der künic gewâfent wart, zwelf juncvrowen an der vart bescheiden wâren ûf schœnen runzîden. dô ensolte niht vermîden diu clâre geselleschaft, ieglîchiu het an einen schaft den tiuren pfelle genomen, dar unde der künic wolte komen; den vuorten si durch schate dan ob dem strît gernden man.

*G Man truoc im zimier dar von rîcher kost unde sô gevar, swen ie diu minne des betwanc, daz er nâch wîbe lône ranc, ez wære Gahmuret oder Galoes oder der künic Galicrates, der deheiner dorfte sînen lîp baz gezieren durch diu wîp. von Ipopotiticon noch von der wîten Acraton noch von Kalimodente noch von Accratirsiente wart nie bezzer pfelle brâht, danne dâ zer zimiere wart erdâht. dô kêrte er daz vingerlîn, daz Itonie, diu junge künigîn, im durch minne sande. ir triwe er wol bekande: het iener kumbers in bevilt, dâ engegene was ir minne ein schilt. der künic was gewâpent nuo. zwelf juncvrouwen griffen zuo ûf schœnen runzîden, diene solden des niht mîden, diu clâre geselleschaft, ieslîchiu het an einen schaft einen tiuren pfelle genomen, dar under der künic wolde komen; den vuorten si durch schate dan obe dem strît gernden man.

*T man truoc sîn zimierde dar von rîcher kost und sô gevar, wen ie diu minne des betwanc, daz er nâch wîbes lône ranc, ez wære Gahmuret oder Galoes oder der künec Kyllicrates, der dekeiner dorfte sînen lîp baz zimieren durch diu wîp. von Ipopotiticon oder ûz der wîten Acraton oder von Kalomidente oder von Agatirsente wart nie bezzer pfelle brâht, dan des zuo der zimierde wart gedâht. dô kuster daz vingerlîn, daz Itonie, diu junge künegîn, im durch minne sante. ir triuwe er sô bekante: hæte iener kumber in bevilt, dâ engein was ir minne ein schilt. Der künec was gewâpent nuo. zwelf juncvrouwen griffen zuo ûf schœnen runzîden, die ensolten des niht mîden, diu clâre geselleschaft, ieglîchiu het an einen schaft den tiuren pfelle genomen, dar under der künec wolte komen; den vuorten si durch schaten dan ob dem strît gernden man.