*D sô geheilet wæren, daz die mâsen in niht swæren. Er wolde baneken den lîp, sît sô manec man unt wîp sînen kampf solden sehen, dâ die wîsen rîter mohten spehen, ob sîn unverzagtiu hant des tages gein prîse würde erkant. Einen knappen het er des gebeten, daz er im bræhte Gringuljeten. daz begunder leischieren. er wolde sich môvieren, daz er untz ors wæren bereit. mir wart sîn reise nie sô leit: Als eine reit mîn hêr Gawan von dem her verre ûf den plân. gelücke müezes walden! er sach einen rîter halden bî dem wazzer Sabbins, den wir wol möhten heizen vlins der manlîchen krefte. er, schûr der rîterschefte, sîn herze valsch nie underswanc; er was des lîbes wol sô kranc, swaz man heizet unprîs, daz entruog er nie decheinen gewîs halbes vingers lanc noch spanne. von dem selbem werden manne muget ir wol ê hân vernomen: an den rehten stam diz mære ist komen.

*m sô geheilet wæren, daz die mâsen in niht swæren. er wolte baneken den lîp, sît sô manic man und wîp sînen kampf dâ solten sehen, daz die wîsen ritter mohten spehen, ob sîn unverzagtiu hant des tages gegen prîs würde erkant. einen knappen het er des gebeten, daz er im bræhte Gringuleten. den begunde er leischieren. er wolte sich môvieren, daz er und daz ros wæren bereit. mir wart sîn reise nie sô leit: Al ein reit mîn hêr Gawan von dem her verre ûf dem plân. glücke müeze es walten! einen ritter sach er halten bî dem wazzer Sabbins, den wir wol möhten heizen vlins der manlîchen krefte, ein schûr der ritterschefte. sîn herze valsch nie underswanc; er was des lîbes wol sô kranc, waz man heizet unprîs, daz truoc er niht dekein wîs halbes vingers lanc und spanne. von dem selben werden manne moget ir wol ê hân vernomen: an den rehten stam diz mær ist komen.

*G sô geheilt wæren, daz die mâsen in niht swæren. Er wolde baneken den lîp, sît sô manic maget unde wîp sînen kampf solden sehen, daz die wîsen rîter mohten spehen, op sîn unverzagetiu hant des tages gein brîse würde erkant. einen knappen het er des gebeten, daz er im bræhte Gringulieten. dô begunde er leisieren. er wolde sich môvieren, daz er unde daz ors wæren bereit. mirne was sîn reise nie sô leit: al eine reit mîn hêr Gawan von dem her verre ûf den plân. gelücke muozes walden! er sach einen rîter halden bî dem wazzer Sabins, den wir möhten heizen vlins der manlîchen krefte. er, schûr an rîterschefte, sîn herze valsch nie verswanc; er was des lîbes wol sô kranc, swaz man heizet unbrîs, daz getruoc er nie neheine wîs halbes vingers lanc noch spanne. von dem selben werden manne muget ir ê wol hân vernomen: an den rehten stam ist ditze mære komen.

*T sô geheilt wæren, daz die mâsen in niht swæren. er wolt baneken den lîp, sît sô manic man und wîp sînen kampf solde sehen, dâ die wîsen rîter mohten spehen, ob sîn unverzagtiu hant des tages gên prîse würde erkant. einen knaben het er des gebeten, daz er im bræhte Kryngulieten. daz begund er leisieren. er wolt sich môvieren, daz er und daz ros wæren bereit. mir wart sîn reise nie sô leit: alein reit mîn hêr Gawan von dem her verre ûf den plân. gelücke müez es walten! er sach einen ritter halten bî dem wazzer Sabins, den wir wol möhten heizen vlins der menlîchen krefte. er, schûr der ritterschefte, sîn herze valsch nie underswanc; er was des lîbes wol sô kranc, waz man heizet unprîs, daz getruoc er nie keinen wîs halbes vingers lanc noch spanne. von dem selben werden manne mugt ir wol ê hân vernomen: an den rehten stam ist diz mære komen.