*D Artus erbeizte unt gienc dar în. er saz zuo dem neven sîn; den bestuont er sus mit mæren, wer die vünf vrouwen wæren. Dô huop mîn hêr Gawan an der eldesten zem êrsten an. sus sprach er zuo dem Bertun: »erkant ir Utepandragun, sô ist diz Arnive, sîn wîp; von den zwein kom iwer lîp. sô ist diz diu muoter mîn, von Norwæge diu künegîn. dise zwô mîne swester sint. nû seht, wie vlætigiu kint!« Ein ander küssen dâ geschach. vreude unt jâmer sach al die daz sehen wolten; von der liebe si daz dolten. beidiu lachen und weinen kunde ir munt vil wol bescheinen; von grôzer liebe daz geschach. Artus ze Gawane sprach: »neve, ich bin des mæres noch vrî, wer diu clâre vürste vrouwe sî.« dô sprach Gawan, der kurtoys: »ez ist diu herzoginne von Logroys, in der gnâden bin ich hie. mir ist gesagt, ir habt gesuochet sie. swaz ir des habt genozzen, daz zeiget unverdrozzen.

*m Artus erbeizte und gienc dar în. er saz zuo dem neven sîn; den bestuont er sus mit mæren, wer die vünf vrowen wæren. dô huop mîn hêr Gawan an der altesten zem êrsten an. sus sprach er zuo dem Britun: »erkant ir Utrapandragun, sô ist diz Arnive, sîn wîp; von den zwein kam iuwer lîp. sô ist diz diu muoter mîn, von Norwæge diu künigîn. die zwô mîn swester sint. nû seht, wie vlætigiu kint!« ein ander küssen dâ beschach. vröude und jâmer dâ sach alle, die ez sehen wolten; von der liebe si daz dolten. beidiu lachen und weinen kunde ir munt wol bescheinen; von grôzer liebe daz geschach. Artus zuo Gawane sprach: »neve, ich bin noch mæres vrî, wer diu clâre vünfte vrowe sî.« dô sprach Gawan, der kurtois: »ez ist diu herzogîn von Logrois, in der gnâden bin ich hie. mir ist gesaget, ir habt gesuochet sie. waz ir des habt genozzen, daz zöuget unverdrozzen.

*G Artus erbeizte unde gie dar în. er saz zuo dem neven sîn; den bestuont er sus mit mæren, wer die vier vrouwen wæren. dô huop mîn hêr Gawan an der eltesten alrêrst an. sus sprach er zuo dem Britun: »erkandet ir Utpandragun, sô ist ditze Arnive, sîn wîp; von den zwein kom iu der lîp. sô ist ditze diu muoter mîn, von Norwæge diu künigîn. dise zwô mîne swester sint. nû seht, wie vlætigiu kint!« ein ander küssen dâ geschach. vröude unde jâmer sach alle, die daz sehen wolden; von der liebe si daz dolden. lachen unde weinen si kunden wol erscheinen; von grôzer liebe daz geschach. Artus ze Gawane sprach: »neve, ich bin des mæres noch vrî, wer diu clâre vrouwe sî.« dô sprach Gawan, der kurtois: »ez ist diu herzogîn von Logrois, in der gnâden bin ich hie. mir ist geseit, ir habet gesuochet sie. swaz ir des habet genozzen, daz zeiget unverdrozzen.

*T Artus erbeizet und gienc dar în. er saz zuo dem neven sîn; den bestuont er sus mit mæren, wer die vier vrouwen wæren. dô huop mîn hêr Gawan an der eltesten alrêst an. sus sprach er zuo dem Britun: »erkant ir Utpandragun, sô ist diz Arnyve, sîn wîp; von den zweien kom iu der lîp. sô ist diz diu muoter mîn, von Norwæge diu künigîn. dise zwô mîn swester sint. nû seht, wie vlætigiu kint!« ein ander küssen dô geschach. vreude und jâmer sach alle, die daz sehen wolten; von der liebe si daz dolten. beidiu lachen und weinen kund ir munt wol bescheinen; von grôzer liebe daz geschach. Artus zuo Gawane sprach: »neve, ich bin des mæres noch vrî, wer diu clâre vrouwe sî.« dô sprach Gawan, der kurtois: »ez ist diu künigîn von Logrois, in der gnâde bin ich hie. mir ist gesagt, ir habt gesuochet sie. waz ir des habt genozzen, daz zeiget unverdrozzen.