*D Als tet diu küneginne, sîn wîp. diu enpfienc Gawans lîp unt ander sîne geselleschaft mit getriulîcher liebe kraft. Dâ wart manec kus getân von maneger vrouwen wolgetân. Artus sprach zem neven sîn: »wer sint die gesellen dîn?« Gawan sprach: »mîne vrouwen, sol ich si küssen schouwen, daz wære unsanfte bewart; si sint wol bêde von der art.« Der Turkote Florant wart dâ geküsset al zehant unt der herzoge von Gowerzin von Ginovern, der künegîn. Si giengen wider inz gezelt. manegen dûhte, daz daz wîte velt vollez vrouwen wære. dô warp niht sô der swære Artus spranc ûf ein kastelân. al dise vrouwen wolgetân unt al die ritter beneben in, er reit den rinc alumbe hin. mit zühten Artuses munt si enpfienc an der selben stunt. daz was Gawans wille, daz si alle habten stille, unze daz er mit in dannen rite; daz was ein höveschlîcher site.

*m alsô tet diu künigîn, sîn wîp. diu enpfienc Gawanes lîp und ander sîn geselleschaft mit getriuwelîcher wirde kraft. dâ wart manic kus getân von maniger vrowen wol getân. Artus sprach zuom neven sîn: »wer sint die gesellen dîn?« Gawan sprach: »mîne vrouwen, sol ich si küssen schouwen, daz wær unsanfte bewart; si sint wol beide von der art.« der Turkoite Florant wart dâ geküsset alzehant und der herzoge von Gowertzin von Ginoveren, der künigîn. si giengen wider in daz gezelt. manigen dûhte, daz daz velt vollez vrowen wære. dô warp niht sô der swære Artus spranc ûf ein kastelân. al dise vrowen wol getân und alle die ritter beneben in, er reit den rinc al umbe hin. mit zühten Artuses munt si enpfienc an der selben stunt. daz was Gawanes wille, daz si alle habten stille, unz daz er mit in dannen rite; daz was ein hovelîcher site.

*G Alsô tet diu künigîn, sîn wîp. si enpfiengen Gawans lîp unde ander sîne geselleschaft mit zuhtlîcher liebe kraft. dâ wart manic kus getân von maniger vrouwen wolgetân. Artus sprach zem neven sîn: »wer sint die gesellen dîn?« Gawan sprach: »mîne vrouwen sol ich küssen schouwen, daz wære unsanfte bewart; si sint wol bêde von der art.« der Turkoite Florant wart geküsset sân zehant unde der herzoge von Gowerzin von Schinoveren, der künigîn. si giengen wider in daz gezelt. manigen dûhte, daz daz velt vollez rîter wære. dô warp niht sô der swære Artus spranc ûf ein kastelân. al dise vrouwen wolgetân unde al die rîter neben in, er reit den rinc alumbe hin. mit zühten Artuses munt si enpfienc an der selben stunt. daz was Gawans wille: si alle habten stille, unze daz er mit in dannen rite; daz was ein hovelîcher site.

*T als tet diu künigîn, sîn wîp. si enpfiengen Gawans lîp und ander sîn geselleschaft mit getriulîcher liebe kraft. dâ wart manic kus getân von maneger vrouwen wol getân. Artus sprach zuom neven sîn: »wer sint die gesellen dîn?« Gawan sprach: »mîne vrouwen, sol ich si küssende schouwen, daz wære unsanfte bewart; si sint wol bêde von der art.« der Turkoyte Florant wart geküsset sân zehant und der herzoge von Gowerzin von Gynovern, der künigîn. si giengen wider in daz gezelt. manegen dûhte, daz daz velt vollez ritter wære. dô warp niht sô der swære Artus spranc ûf ein kastelân. al die vrouwen wol getân und alle die ritter neben in, er reit den rinc al umbe hin. mit zühten Artuses munt si enpfienc an der selben stunt. daz was Gawans wille, daz si alle habten stille, unz daz er danne mit im rite; daz was ein hovelîcher site.