*D Diu botschaft den knappen twanc, daz ern ruochte, wer in dranc, unz in der künec selbe sach, der sîn grüezen gein im sprach. Der knappe gab im einen brief, der Artuse in sîn herze rief, dô er von im wart gelesen, dô muoser bî beiden wesen: daz eine was vreude untz ander klage. Er sprach: »wol disem süezem tage, bî des liehte ich hân vernomen: mir sint diu wâren mære komen umbe mîner werden swester sun. kan ich manlîch dienst tuon durch sippe unt durch geselleschaft, ob triwe an mir gewan ie kraft, sô leist ich, daz mir Gawan hât enboten, ob ich kan.« Hin zem knappen sprach er dô: »nû sage mir, ist Gawan vrô?« »jâ, hêrre, ob ir wellet, zer vreude er sich gesellet«, sus sprach der knappe wîse. »er schiede gar von prîse, ob ir in liezet under wegen. wer solt ouch dâ bî vreuden pflegen? iwer trôst im zücket vreude enbor, unz ûzerhalp der riwe tor von sîme herzen kumber jagt, daz ir an im iht sît verzagt.

*m diu botschaft den knappen dranc, daz er enruochte, wer in twanc, unz in der künic selber sach, der sîn grüezen gegen im sprach. der knappe gap im einen brief, der Artuse in sîn herze rief, dô er von im wart gelesen, dô muost er bî in beiden wesen: daz ein was vröude, daz ander klage. er sprach: »wol disem tage, bî des lieht ich hân vernomen liebiu mære, diu mir sint komen umb mînen werden swester sun. kan ich im manlîch dienst tuon durch sippe und durch geselleschaft, ob triuwe an mir gewan ie kraft, sô leist ich, daz mir Gawan het enboten, ob ich kan.« hin zem knappen sprach er dô: »nû sage mir, ist Gawan vrô?« »jâ, hêrre, ob ir wellet, zer vröude er sich gesellet«, sus sprach der knappe wîse. »er schiede gar von prîse, ob ir in liezet under wegen. wer solte ouch dâ bî vröude pflegen? iuwer trôst im zücket vröude enbor, unz ûzerhalp der riuwe tor von sînem herzen kumber jaget, daz ir an im iht sît verzaget.

*G Diu botschaft den knappen twanc, daz ern ruochte, wer in dranc, unze in der wirt selbe ersach, der sînen gruoz gein im sprach. in die hant gab er im einen brief, der Artus in sîn herze rief, dô er von im was gelesen, dô muos er bî den beiden wesen: daz ein was vröude, daz ander klage. er sprach: »wol disem süezem tage, bî des liehte ich hân vernomen: mir sint diu wâren mære komen umbe mînen werden swester sun. kan ich manlîchen dienst tuon durch sippe unde durch geselleschaft, ob triuwe gewan ie an mir kraft, sô leist ich, daz mir Gawan hât enboten, ob ich kan.« hin ze dem knappen sprach er dô: »sag an, ist Gawan vrô?« »jâ, hêrre, ob ir wellet, ze vröuden er sich gesellet«, sprach der knappe wîse. »er schiede ouch gar von brîse, ob ir in liezet under wegen. wer solde ouch dâ bî vröude pflegen? iuwer trôst im zücket vröude enbor, unze ûzerhalp der riuwen tor ûz sînem herzen sorge jaget, daz ir an im niht sît verzaget.

*T diu botschaft den knaben twanc, daz ern ruochte, wer in dranc, unz in der künic selbe ersach, der sînen gruoz gên im ouch sprach. der knabe gap im einen brief, der Artuse in sîn herze rief, dô er von im was gelesen, dô muost er bî den beiden wesen: daz ein was vreude, daz ander klage. er sprach: »wol disem süezen tage, bî des lieht ich hân vernomen, mir sîn diu wâren mære komen umb mînen werden swester sun. kan ich menlîchen dienst tuon durch sippe und durch geselleschaft, ob triuwe an mir gewan ie kraft, sô leist ich, daz mir Gawan hât enboten, ob ich kan.« hin zuom knaben sprach er dô: »nû sag mir, ist Gawan vrô?« »jâ, hêrre, ob ir wellet, zuo der vreude er sich gesellet«, sprach der knabe wîse. »er schiede ouch gar von prîse, ob ir in liezet under wegen. wer solt ouch dâ bî vreuden pflegen? iwer trôst im zücket vreude enbor, unz ûzerhalp der riwen tor von sînem herzen kumber jaget, daz ir von im niht sît verzaget.