*D Kunnen si zwei nû minne steln, daz mag ich unsanfte heln. ich sage vil lîhte, daz dâ geschach, wan daz man dem unvuoge ie jach, der verholniu mære ie machte breit. Ez ist ouch noch den höfschen leit, ouch unsæliget er sich dâr mite. zuht sî des slôz ob minne site. Nû vuogete diu strenge minne unt diu clâre herzoginne, daz Gawans vreude was verzert: er wære immer unerwert sunder âmîen. die philosophîen unt alle, die ie gesâzen, dâ si starke liste mâzen, Kancor unt Thebit unt Trebuchet, der smit, der Frimutels swert ergruop, dâ von sich starkez wunder huop, Dar zuo al der arzâte kunst, ob si im trüegen guote gunst mit temperîe ûz würze kraft, âne wîplîch geselleschaft sô müeser sîne scherpfe nôt hân brâht unz an den sûren tôt. Ich wil iuz mære machen kurz: er vant die rehten hirzwurz, diu im half, daz er genas, sô daz im arges niht enwas;

*m künnen si zwei nû minne steln, daz mac ich unsanfte heln. ich sage vil lîht, waz dâ geschach, wan daz man ungevüege ie jach, der verholniu mære mahte breit. ez ist ouch noch den hœhesten leit, ouch unsæliget er sich dâ mite. zuht ist daz slôz ob minnen site. Nû vuoget diu strenge minne und diu clâre herzoginne, daz Gawans wer was verzert: er wær iemer unernert sunder âmîen. die philosophîen und alle, die ie gesâzen, dâ si starke liste mâzen, Kanchor und Thebit und Trebuchet, der smit, der †Frimutel† swert ergruop, dâ von sich starkez wunder huop, dar zuo aller der arzet kunst, ob si im trüegen guote gunst mit temperîe ûz würze kraft, âne wîplîch geselleschaft sô mües er sîn scharpfe nôt hân brâht unz an sînen tôt. ich wil daz mære machen kurz: er vant die rehten hirzwurz, diu im half, daz er genas, sô daz im arges niht enwas;

*G Kunnen si zwei nû minne steln, daz mag ich unsanfte heln. ich sage vil lîhte, waz dâ geschach, wan daz man dem ie ungevüege jach, der verholniu mær machet breit. ez ist noch den hovescharn leit, ouch unsæliget er sich dâr mite. zuht ist ein slôz op minne site. nû vuoget diu strenge minne unde diu clâre herzoginne, daz Gawans sorge wart verzert: er wær immer unernert sunder âmîen. die philosophîen unde alle, die ie gesâzen, dâ si starke liste mâzen, Charncor unde Bebit unde Trebuchet, der smit, der Frimutels swert ergruop, dâ von sich starkez wunder huop, dar zuo al der arzet kunst, ob si im trüegen guote gunst mit temperîe unde mit würze kraft, âne wîplîche geselleschaft sô müese er sîne swære nôt hân brâht unze an sînen tôt. ich wil iu daz mære machen kurz: er vant die rehten hirzwurz, diu im half, daz er genas, sô daz im arges niene was;

*T kunnen si zwei nû minne stelen, daz mac ich unsanfte helen. ich sage vil lîhte, waz geschach, wan daz man dem ie unvuoge jach, der verholniu mære machet breit. ez ist noch den höveschsten leit, ouch unsæliget er sich dâ mite. zuht sî des slôz ob minne site. nû vuogte diu strenge minne und diu clâre herzoginne, daz Gawans vreude was verzert: er wære immer unernert sunder âmîen. die philosophîen und alle, die ie gesâzen, dâ si starke liste mâzen, Kanchor und Thepit und Trebuket, der smit, der Frimutels swert ergruop, dâ von sich starkez wunder huop, dâ zuo der arzet kunst, ob si im trüegen guote gunst mit temperîe ûz würze kraft, âne wîplîch geselleschaft sô müest er sîne scharpfe nôt hân brâht unz an den sûren tôt. ich wil iu daz mære machen kurz: er vant die rehten hirzwurz, diu im half, daz ers genas, sô daz im arges nie enwas;