*D Bene und Arnive dô schuofen, daz ez stuont alsô, dâ von der wirt gemach erleit. diu herzogîn daz niht vermeit, dâne wære ir helfe nâhe bî. Gawanen vuorten dise drî mit in dan durch sîn gemach. In einer kemenâten er ersach zwei bette sunder ligen. nû wirt iu gar von mir verswigen, wie diu gehêrt wæren; ez næhet andern mæren. Arnive zer herzoginne sprach: »nû sult ir schaffen guot gemach disem rîter, den ir brâhtet her. ob der helfe an iu ger, iwerer helfe habt ir êre. ine sage iu nû niht mêre, Wan daz sîne wunden mit kunst sô sint gebunden, er möhte nû wol wâpen tragen; doch sult ir sînen kumber klagen, ob ir im senftet, daz ist guot. lêret ir in hôhen muot, des muge wir alle geniezen; nû lâts iuch niht verdriezen.« Diu künegîn Arnive gienc, dô si ze hove urloup enpfienc; Bene ein lieht vor ir truoc dan. die tür beslôz hêr Gawan.

*m Bene und Arnive dô schuofen, daz ez stüende alsô, dâ von der wirt gemach erleit. diu herzogîn daz niht vermeit, dâ wær ir helfe nâhe bî. Gawanen vuorten dise drî mit in dan durch sîn gemach. in einer kemenâten er sach zwei bette sunder ligen. nû wirt ouch gar von mir verswigen, wie diu gehêret wæren; ez nâhet andern mæren. Arnive zer herzogîn sprach: »nû solt ir schaffen guot gemach disem ritter, den ir brâhtet her. dô der an iu helfe ger, iuwer helfe habt ir êre. ich sage iu nû niht mêre, wan daz sîn wunden mit kunst sint sô gebunden, er möhte nû wol wâpen tragen; doch solt ir sînen kumber klagen, ob ir im in senftet, daz ist guot. gelêret ir in hôhen muot, des mugen wir als geniezen; nû lâts iuch niht verdriezen.« diu künigîn Arnive ouch gienc, dô si zuo hof urloup enpfienc; Bene ein lieht truoc vür in dan. die tür beslôz hêr Gawan.

*G Bene unde Arnive dô schuofen, daz ez stuont alsô, dâ von der wirt gemach erleit. diu herzogîn daz niht vermeit, dâne wære ir helfe nâhen bî. Gawan vuorte dise drî mit im dan durch sîn gemach. in einer kemenâten er sach vier bette sunder ligen. nû wirt iuch gar von mir verswigen, wie diu gehêrt wæren; ez nâhet nû andern mæren. Arnive zer herzoginne sprach: »nû sult ir schaffen guoten gemach disem rîter, den ir brâhtet her. op der helfe an iu ger, iwer helfe habet ir êre. ichn sage iu nû niht mêre, wan daz sîne wunden mit kunst sô sint gebunden, er möht nû wol wâpen tragen; doch sult ir sînen kumber klagen, ob ir in senftet, daz ist guot. lêrt ir in nû hôhen muot, des muge wir alle geniezen; nû lâts iuch niht verdriezen.« diu künegîn Arnive gienc, dô si ze hove urloup enpfienc; Bene ein lieht vor in truoc dan. die tür beslôz mîn hêr Gawan.

*T Bene und Arnyve dô schuofen, daz ez stuont alsô, dâ von der wirt gemach erleit. diu herzogîn daz niht vermeit, dâ enwære ir helfe nâhe bî. Gawan vuorten dise drî mit in dan durch sîn gemach. in einer kemenâten er sach zwei bette sunder ligen. nû wirt iu gar von mir verswigen, wie diu gehêret wæren; ez nâhet nû andern mæren. Arnyve zuo der herzoginne sprach: »nû solt ir schaffen guot gemach disem rîter, den ir brâhtet her. ob der helfe an iu ger, iuwer helfe habet ir êre. ich ensage iu niht mêre, wan daz sîne wunden mit kunst dô sint verbunden, er möhte nû wol wâpen tragen; doch solt ir sînen kumber klagen, ob ir in senftet, daz ist guot. lêret in nû hôhen muot, des mogen wir alle geniezen; nû lât es iuch niht verdriezen.« diu küneginne Arnyve gienc, dô si zuo hove urloup entvienc; Bene ein lieht truoc vor ir dan. die türe beslôz hêr Gawan.