*D Dar nâch schiere ein ende nam der tanz. juncvrouwen mit varwen glanz sâzen dort und hie, die rîter sâzen zwischen sie. des vreude sich an sorgen rach, swer dâ nâch werder minne sprach, ob er vant süeziu gegenwort. von dem wirte wart gehôrt, man soltz trinken vür in tragen. daz mohten werber klagen. der wirt warp mit den gesten, in kunde ouch minne lesten. ir sitzen dûht in gar ze lanc, sîn herze ouch werdiu minne twanc. Daz trinken gab in urloup. manegen kerzînen schoup truogen knappen vor den rîtern dan. dô bevalch mîn hêr Gawan dise zwêne geste in allen; daz muose in wol gevallen. Lischoys unt Florant vuoren slâfen al zehant. diu herzoginne was sô bedâht, diu sprach, si gunde in guoter naht. Dô vuor ouch al der vrouwen schar, dâ si gemaches nâmen war. ir nîgens si begunden mit zuht, die si wol kunden. Sangive und Itonje vuoren dan, als tet ouch Cundrie.

*m dar nâch nam ein ende der tanz. juncvrowen mit varwe glanz, die sâzen dort und hie, die ritter sâzen zwischen sie. des vröude sich an sorgen rach, wer dar nâch werder minne sprach, ob er †nante† süeziu gegenwort. von dem wirt wart gehôrt, man solt daz trinken vür in tragen. daz mohten werbære klagen. der wirt †wart† mit den gesten, in kunde ouch minne lesten. ir sitzen dûhte in gar zuo lanc, sîn herze ouch werdiu minne twanc. daz trinken gap in urloup. manigen kerzînen schoup truoc man vor den rittern dan. dô bevalch mîn hêr Gawan dise zwêne geste in allen; daz muoste in wol gevallen. Lischois und Florant vuoren slâfen al zehant. diu herzogîn wart sô bedâht, si sprach, si gonde in guoter naht. dô vuor ouch al der vrowen schar, dâ si gemaches nâmen war. ir nîgens si begunden mit zuht, die si wol kunden. Sangive und Ithonie vuoren dan, als tet ouch Condrie.

*G Dar nâch schier nam ende der tanz. juncvrouwen mit varwe glanz sâzen dort unde hie, die rîter sâzen zwischen sie. des vröude sich an sorgen rach, swer dâ nâch werder minne sprach, obe er vant süeziu gegenwort. von dem wirt wart gehôrt, man solde trinken vür in tragen. daz mohten minnære wol klagen. der wirt warp mit den gesten, in kunde ouch minne lesten. ir sitzen dûhte in gar ze lanc, sîn herze ouch werdiu minne twanc. daz trinken gab in urloup. manic kerzînen schoup truogen knappen vor den rîtern dan. dô bevalch mîn hêrre Gawan dise zwêne geste in allen; daz muos in wol gevallen. Lishois unde Florant vuoren slâfen sân zehant. diu herzogîn was sô bedâht, si jach, si gunde in guoter naht. dô vuor ouch al der vrouwen schar, dâ si gemaches nâmen war. ir nîgens si begunden mit zühten, die si kunden. Sagive unde Itonie vuoren dan, als tet Gundrie.

*T Dar nâch schiere ende nam der tanz. juncvrouwen mit varwe glanz sâzen dort und hie, die rîter sâzen zwischen sie. des vreude sich an sorgen rach, wer dâ nâch werder minne sprach, ob er vant süeziu gegenwort. von dem wirte wart gehôrt, man solte trinken vür si tragen. daz mohten die werbære wol klagen. der wirt warp mit den gesten, in kunde ouch minne lesten. ir sitzen dûht in gar zuo lanc, sîn herze ouch werdiu minne twanc. daz trinken gap in urloup. manegen kerzen schoup truogen knappen vor den rîtern dan. dô bevalch mîn hêr Gawan - daz muose wol gevallen - dise zwêne geste in allen. Lyschoys und Florant vuoren slâfen al zehant. Diu herzogîn was sô bedâht, si sprach, si gunde in guoter naht. dô vuor ouch al der vrouwen schar, dâ si gemaches nâmen war. ir nîgens si begunden mit zühten, die si wol kunden. Seyve und Itonje vuoren dan, als tet ouch Kuondrie.