*D Gawan unt Sangive unt diu künegîn Arnive sâzen stille bî des tanzes schar. diu herzoginne wol gevar her umbe zuo Gawane sitzen gienc; ir hant er in die sîne enpfienc, si sprâchen sus und sô. ir komens was er zuo zim vrô. sîn riwe smal unt sîn vreude breit wart dô, sus swant im al sîn leit. was ir vreude ame tanze grôz, Gawan noch minre hie verdrôz. Diu künegîn Arnive sprach: »hêrre, nû prüevet iwer gemach. ir solt an disen stunden ruowen. ziwern wunden hât sich diu herzogîn bewegen, daz si iwer wil mit decke pflegen noch hînte geselleclîche; diu ist helfe unt râtes rîche.« Gawan sprach: »des vrâget sie.« »in iwer bêder gebot ich hie gar bin«, sus sprach diu herzogîn. »er sol in mîner pflege sîn. Lât diz volc slâfen varn. ich sol in hînte sô bewarn, daz sîn nie vriwendinne baz gepflac. Floranden von Itolac unt den herzogen von Gowerzin lât in der rîter pflege sîn.«

*m Gawan und Sangive und diu künigîn Arnive sâzen stille bî des tanzes schar. diu herzogîn wol gevar her umb zuo Gawan sitzen gienc; ir hant er in die sîn enpfienc, si sprâchen sus und sô. ir komens was er vrô. sîn riuwe smal, sîn vröude breit wart dô, sus swant im sîn leit. was ir vröude an dem tanze grôz, Gawan noch minner hie verdrôz. diu künigîn Arnive sprach: »hêrre, nû brüefet iuwer gemach. ir solt an disen stunden ruowen. zuo iuwern wunden het sich diu herzogîn erwegen, daz si iuwer wil mit decke pflegen noch hînt geselleclîch; daz ist helfe und râtes rîch.« Gawan sprach: »des vrâget sie.« »in iuwer beider gebot hie bin ich«, sprach diu herzogîn. »er sol in †iuwer† pflege sîn. lât diz volc slâfen varn. ich sol in hînt wol bewarn, daz sîn nie vriundîn baz gepflac. Floranden von Itolac und den herzogen von Gowertzin lât in der ritter †pfleger† sîn.«

*G Gawan unde Sagive unde diu künegîn Arnive sâzen stille bî des tanzes schar. diu herzoginne wolgevar her umbe ze Gawane gienc; ir hant er in die sîne vienc, si sprâchen sus unde sô. ir komens was er zuo im vrô. sîn riuwe smal, sîn vröude breit wart dô, sus verswant im al sîn leit. was ir vröude an tanze grôz, Gawan noch minner hie verdrôz. diu künegîn Arnive sprach: »hêrre mîn, prüevet iuwer gemach. ir soldet an disen stunden ruowen. †† iuwern wunden hât sich diu herzogîn bewegen, daz si iwer mit decke wil pflegen noch hînt geselleclîch; diu ist helfe unde râtes rîch.« Gawan sprach: »des vrâget sie, ze iuwer beider gebot ich hie bin.« dô sprach diu herzogîn: »er sol in mîner pflege sîn. lât ditze volc slâfen varen. vrouwe, ich wil in sô bewaren, daz sîn vriundîn nie baz gepflac. Floranden von Ytolac unde den herzogen von Gowerzin lât in der rîter pflege sîn.«

*T Gawan und Seyve und diu küneginne Arnyve sâzen stille bî des tanzes schar. diu herzoginne wol gevar her umb zuo Gawane sitzen gienc; ir hant er in die sîne vienc, Si sprâchen sus und sô. ir komens was er zuo in vrô. sîn riuwe val, sîn vreude breit wart dô, sus verswant im sîn leit. was ir vreude an tanze grôz, Gawan noch minre hie verdrôz. diu küneginne Arnyve sprach: »hêrre, nû prüevet iuwer gemach. ir solt an disen stunden ruowen. zuo iuwern wunden het sich diu herzogîn bewegen, daz si iuwer dicke wolle pflegen noch hînaht geselleclîche; diu ist helfe und râtes rîche.« Gawan sprach: »des vrâget sie.« »zuo iuwer beider gebote ich hie bin«, sprach diu herzogîn. »er sol in mîner pflege sîn. lât diz volc slâfen varn. vrouwe, ich wil in sô bewarn, daz sîn vriundîn nie baz gepflac. Florant von Itolac und den herzogen von Gowerzin lât in der rîter pflege sîn.«