*D Gawan hôrte an dem vröuwelîn, daz si bî minne wolde sîn. dar zuo was ouch niht ze laz gein der herzoginne ir haz. sus truoc si minne und haz. ouch het er sich gesundet baz gein der einvaltigen magt, diu im ir kumber hât geklagt, wander ir niht zuo gewuoc, daz in unt si ein muoter truoc. ouch was ir bêder vater Lot. der meide er sîne helfe bôt, dâ engein si tougenlîchen neic, daz er si trœsten niht versweic. Nû was ouch zît, daz man dar truoc tischlachen manegez wîz genuoc untz brôt ûf den palas, dâ manec clâriu vrouwe was. daz het ein underscheit erkant, daz die rîter eine want heten sunder dort hin dan. den sedel schuof hêr Gawan: der Turkote zuo zim saz, Lischoys mit Gawans muoter az, der clâren Sangiven. Mit der küneginne Arniven az diu herzoginne clâr. sîne swester, bêde wol gevar, Gawan zuo zim sitzen liez. iewederiu tet, als er si hiez.

*m Gawan hôrte an dem vröuwelîn, daz si bî minne solte sîn. dar zuo was ouch niht zuo laz gegen der herzogîn ir haz. sus truoc si minne und haz. ouch het er sich gesundet baz gegen der einvalten maget, diu im ir kumber het geklaget, wan er ir niht zuo gewuoc, daz si und †† ein muoter truoc. ouch was ir beider vater Lot. der megde er sîn helfe bôt, dâ gegen si tougenlîchen neic, daz er si trœsten niht versweic. nû was doch zît, daz man dar truoc manic tischlachen wîz genuoc und daz brôt ûf den palas, †daz† manic clâriu vrowe was. daz het ein underscheit erkant, daz die ritter eine want heten sunder dort hin dan. den sedel schuof hêr Gawan: der Turkoite mit im az, Lischois bî Gawans muoter saz, der clâren Sangiven. mit der künigîn Arniven az diu herzogîn clâr. sîn swester, beide wol gevar, Gawan zuo im sitzen liez. ietwederiu tet, als er si hiez.

*G Gawan hôrte an dem vröuwelîn, daz si bî minnen wolde sîn. dar zuo was ouch niht ze laz gein der herzogîn ir haz. sus truoc si minne unde haz. ouch het er sich gesundet baz gein der einvaltigen maget, diu im ir kumber hât geklaget, wan er ir niht zuo gewuoc, daz in unde si ein muoter truoc. ouch was ir beider vater Lot. der meide er sîn helfe bôt, dâ engegen si im tougenlîchen neic, daz er si trôstes niht versweic. nû was zît, daz man dar truoc tischlachen manigez wîz genuoc unde enbôt ûf den palas, dâ manic clâriu vrouwe was. daz het ein underscheit erkant, daz die rîter eine want heten sunder dort hin dan. daz sedel schuof mîn hêrre Gawan: der Turkoite zuo im saz, Lishois mit Gawans muoter az, mit der clâren Sagiven. mit der künegîn Arniven az diu herzoginne clâr. sîne swester wolgevar Gawan zuo zim sitzen liez. ietwederiu tet, als er si hiez.

*T Gawan hôrte an dem vröulîn, daz si bî minne wolte sîn. dar zuo was ouch niht zuo laz gein der herzoginne ir haz. ouch het er sich gesundet baz - sus truoc si minne und haz - gein der einvalten maget, diu im ir kumber hât geklaget, wan er ir niht dar zuo gewuoc, daz in und si ein muoter truoc. ouch was ir beider vater Lot. der megde er sîne helfe bôt, dâ engein si tugentlîche neic, daz er si trôstes niht versweic. Dô was ouch zît, daz man dar truoc tischlachen manegez wîz genuoc und enbôt ûf den palas, dâ manegiu clâriu vrouwe was. daz hete ein underscheit erkant, daz die rîter eine want heten sunder dort hin dan. daz gesitze schuof hêr Gawan: der Turkoyte zuo im saz, Lyschoys mit Gawanes muoter az, mit der clâren Seyven. mit der küneginne Arnyven az diu herzoginne clâr. sîne swester, beide wol gevar, Gawan zuo im sitzen liez. ietweder sîte tet, als er si hiez.