*D ZArniven sprach Gawan: »vrouwe, ich sol einen boten hân.« ein juncvrouwe wart gesant, diu brâhte einen sarjant, manlîch, mit zühten wîse, in sarjandes prîse. Der knappe swuor des einen eit, er würbe lieb oder leit, daz er des niemen dâ gewüege noch anderswâ, wan dâ erz werben solte. Gawan bat, daz man im holte tincten und permint. Gawan, des künec Lotes kint, schreip gevuoge mit der hant. er enbôt ze Lœver in daz lant Artuse unt des wîbe dienst von sîme lîbe mit triwen unverschertet; unt het er prîs behertet, der wære an werdecheite tôt, sine hülfen im ze sîner nôt, daz si beide an triwe dæhten unt ze Joflanze bræhten die messenîe mit vrouwen schar; unt er kœme ouch selbe gein in dar durch kampf ûf al sîn êre. Ernbôt im dennoch mêre, der kampf wære alsô genomen, daz er werdeclîche müese komen.

*m zuo Arniven sprach Gawan: »vrowe, ich sol einen boten hân.« ein juncvrowe wart gesant, diu brâht einen sarjant, manlîch, mit zühten wîse, in sarjandes prîse. der knappe swuor des einen eit, er würbe liep oder leit, daz er des niemen dâ gewüege noch anderswâ, wan dâ erz werben solte. er bat, daz man im holte tinten und permint, Gawan, des küniges Lotes kint, schreip gevuoge mit der hant. er enbôt zuo Lover in daz lant Artuse und des wîbe dienst von sînem lîbe mit triuwen unverschertet; und het er prîs behertet, der wær an werdicheit tôt, si hülfen ime zuo sîner nôt, daz si beide an triuwe dæhten und zuo Joflanze bræhten die massenîe mit vrowen schar; und er †kam† ouch selbe dar durch kampf ûf al sîn êre. er enbôt in dannoch mêre, der kampf wær alsô genomen, daz er werlîch müeste komen.

*G ze Arniven sprach Gawan: »vrouwe, ich sol einen boten hân.« ein juncvrouwe wart gesant, diu brâht im einen sarjant, manlîch, mit zühten wîse, in sarjandes prîse. der knappe swuor des einen eit, er würbe liep oder leit, daz er des niemen dâ zuo gewüege noch anderswâ, wan dâ erz werben solde. er bat, daz man im holde tinten unde permint, Gawan, des künic Lotes kint, schreip gevuoge mit der hant. er enbôt ze Lover in daz lant Artuse unde des wîbe dienst von sînem lîbe mit triuwen unverschert unde het ir brîs behert, der wære an werdecheit tôt, sine hülfen im ze sîner nôt, daz si beide an triuwe dæhten unde ze †Tschanfenzune† bræhten die massenîe mit vrouwen schar unde kœmen ouch selbe gein im dar durch kampf ûf alle sin êre. ernbôt in dannoch mêre, der kampf wære alsô genomen, daz er werdeclîche müese komen.

*T Zuo Arnyven sprach Gawan: »vrouwe, ich sol einen boten hân.« ein juncvrouwe wart gesant, diu brâhten einen sarjant, manlîch, mit zühten wîse, in sarjandes prîse. der knappe des swuor einen eit, er würbe liep oder leit, daz er des niemanne dâ zuo gewüege noch anderswâ, wan daz er daz werben solte. er bat, daz man im holte tinten und permint, Gawan, des küneges Lotes kint, schreip gevuoge mit der hant. er enbôt zuo Lover in daz lant Artuse und des wîbe dienst von sîme lîbe mit triuwen unverschertet; und heter prîs behertet, der wære an wirdecheit tôt, si enhülfen im zuo sîner nôt, daz si beide an triuwe gedæhten und zuo Tschoflanze bræhten die massenîe von vrouwen schar und kœmen ouch selbe beidiu gein im dar durch kampf ûf alle sîn êre. er enbôt in dannoch mêre, der kampf wære alsô genomen, daz er wirdeclîche muoze komen.