*D Von der burc die vrouwen dise wirtschaft mohten schouwen. anderhalp anz urvar, manec wert ritter kom al dar. ir bûhurt mit kunst wart getân. disehalp hêr Gawan dankte dem verjen unt der tohter sîn - als tet ouch diu herzogîn -, ir güetlîchen spîse. Diu herzoginne wîse sprach: »war ist der rîter komen, von dem diu tjoste wart genomen gestern, dô ich hinnen reit? ob den iemen überstreit, weder schiet daz leben oder tôt?« Dô sprach Plippalinot: »vrouwe, ich sach in hiute leben, er wart mir vür ein ors gegeben. welt ir ledigen den man, dâr umbe sol ich Swalwen hân, diu der küneginne Secundillen was unt die iu sante Anfortas. mac diu harpfe wesen mîn, ledec ist der herzoge von Gowerzin.« »Die harpfen untz ander krâmgewant«, sprach si, »wil er, mit sîner hant mac geben unt behalden, der hie sitzet. lâts in walden. ob ich im sô liep wart ie, er lœset mir Lischoysen hie,

*m Von der burc die vrouwen dise wirtschaft mohten schouwen. anderhalp an daz urvar, manic wert ritter kam aldar. ir bûhurt wart mit künste getân. disehalp hêr Gawan dankte dem verjen und der tohter sîn - alsô tet ouch diu herzogîn -, ir güetlîchen spîse. diu herzogîn wîse sprach: »war ist der ritter komen, von dem diu just wart benomen gester, dô ich hinnen reit? ob den ieman überstreit, weder schiet daz leben oder tôt?« dô sprach Plippalinot: »vrowe, ich sach in hiute leben, der wart mir vür ein ros gegeben. wolt ir ledigen den selben man, dâr umbe sol ich Swalwen hân, diu künigîn Secundillen was und die iu sante Anfortas. mac diu harpfe wesen mîn, ledic ist ouch †die† Gowertzin.« »die harpfen und daz krâmgewant«, sprach si, »wil er, mit sîner hant mac geben und behalten, †die† hie sitzet. lât es in walten. ob ich im sô liep wart ie, er lœset mir den herzogen hie,

*G von der burc die vrouwen die wirtschaft mohten schouwen. anderhalp anz urvar, manic wert rîter kom al dar. ir bûhurt mit kunst wart getân. disehalp hêr Gawan dankte dem verigen unt der tohter sîn - als tet ouch diu herzogîn -, ir güetlîchen spîse. diu herzoginne wîse Sprach: »war ist der rîter komen, von dem diu tjost wart genomen gester, dô ich hinnen reit? ob den iemen überstreit, weder schiet daz leben oder tôt?« dô sprach Pliplalinot: »vrouwe, ich sach in hiute leben, er wart mir vür diz ors gegeben. welt ir ledegen den man, dâr umbe sol ich Swalwen hân, diu der künegîn Secundillen was unde die iu sande Anfortas. mac diu harpfe wesen mîn, ledic ist der von Gowerzin. in vie der helt.« »wert erkant«, sprach si. »die wîle er mit sîner hant mac gegeben unde behalden, der hie sitzet, lât sîn walden. ob ich im sô liep wart ie, er lœset mir Lishoisen hie,

*T Von der burc die vrouwen die wirtschaft mohten schouwen. anderhalp an daz urvar, manec werder rîter kam al dar. ir bûhurt mit kunst wart getân. disehalp hêr Gawan dankete dem vergen und der tohter sîn - als tet ouch diu herzogîn -, ir güetlîchen spîse. diu herzoginne wîse sprach: »war ist der rîter komen, von dem diu jost wart genomen gestern, dô ich hinnen reit? ob den ieman überstreit, weder schiet daz leben oder der tôt?« dô sprach Plipalinot: »vrouwe, ich sach in hiute leben, er wart mir vür diz ors gegeben. wolt ir ledigen den man, dâr umbe sol ich Swalwen hân, diu der küneginne Secundille was und die iu sante Anfortas. mac diu harpfe wesen mîn, ledic ist der von Gowerzin.« »die harpfe und ander krâmgewant«, sprach si, »die wîl er mit sîner hant mag gegeben und behalten, der hie sitzet, lât es in walten. ob ich im sô liep wart ie, er lœset mir Lyschoysen hie,