*D Swaz dâ stuonden bluomen lieht, die wâren gein dirre varwe ein nieht, die Orgeluse brâhte. Gawan an si dâhte, sô daz sîn êrst ungemach im deheines kumbers jach. Sus reit si mit ir gaste von der burc wol eine raste eine strâzen wît und sleht vür ein clârez fôreht. der art des boumes muosen sîn tämris unt prisîn; daz was der Clinschors walt. Gawan, der degen balt, sprach: »vrouwe, wâ brich ich den kranz, des mîn dürkel vreude werde ganz?« Er solts êt hân gedûhet nider, als dicke ist geschehen sider maneger clâren vrouwen. si sprach: »ich lâze iuch schouwen, al dâ ir prîs megt behaben.« über velt gein eime graben riten si sô nâhen, des kranzes boum si sâhen. Dô sprach si: »hêrre, jenen stam, den heiet, der mir vreude nam. bringet ir mir dar ab ein rîs, nie rîter alsô hôhen prîs mit dienste erwarp durch minne.« sus sprach diu herzoginne:

*m waz dâ stuonden bluomen lieht, die wâren gegen diser varwe niht, die Urgeluse brâhte. Gawan an si gedâhte, sô daz sîn êrst ungemach im dekeines kumbers jach. sus reit si mit ir gast von der burc wol ein rast ein strâze wît und sleht vür ein clârez fôreht. der art des boumes muoste sîn tämris und prisîn; daz was des Clinsors walt. Gawan, der degen balt, sprach: »vrouwe, wâ brich ich den kranz, des mîn dürkel vröude wirt ganz?« er sol si hân gedûhet nider, alsô dicke ist geschehen sider maniger clâren vrouwen. si sprach: »ich lâze iuch schouwen, aldâ ir prîs muget behaben.« über velt gegen einem graben riten si sô nâhen, des kranzes boum si sâhen. dô sprach si: »hêrre, jenen stam, den heiet, der mir vröude nam. bringet mir dar ab ein rîs, nie ritter alsô hôhen prîs mit dienst erwarp durch minne.« sus sprach diu herzoginne:

*G swaz stuonden bluomen lieht, die wâren gein dirre varwe ein niht, die Orgeluse brâhte. Gawan an si gedâhte, sô daz sîn êrster ungemach ime deheines kumbers jach. sus reit si mit ir gaste von der bürge wol ein raste ein strâze wît unde sleht vür ein clârez fôreht, dâ die boume muosen sîn tämris unde prisîn; sus was der kleine walt. Gawan, der degen balt, sprach: »wâ briche ich den kranz, des mîn dürkel herze werde ganz?« er solde si hân gedûht nider, als dicke ist geschehen sider maniger clâren vrouwen. si sprach: »ich lâz iuch schouwen, wâ ir prîs muget behaben.« über daz velt gein einem graben riten si dô nâhen. des kranzes boum si sâhen. dô sprach si: »hêrre, jener stam ist des, der mir vröude nam. bringet ir mir dar abe ein rîs, nie rîter alsô hôhen prîs mit dienst erwarp nâch minne.« dô sprach diu herzoginne:

*T waz dâ stuonden bluomen lieht, die wâren gein dirre varwe ein niht, die Orgeluse brâhte. Gawan an si gedâhte, sô daz sîn êrstez ungemach im dekeines kumbers jach. sus reit si mit ir gaste von der burc wol ein raste eine strâze wît und sleht vür ein kleinez fôreht. der art die boume muosen sîn tämris und prisîn; daz was Clynsors walt. Gawan, der degen balt, sprach: »vrouwe, wâ brich ich den kranz, daz mîn dürkel herze würde ganz?« Er solte si hân gedrücket nider, als dicke ist geschehen sider maneger clâren vrouwen. si sprach: »ich lâz iuch schouwen, wâ ir prîs moget behaben.« über velt gein eime graben riten si sô nâhen, des kranzes boum si sâhen. dô sprach si: »hêrre, jener stam, den heiet, der mir vreude nam. bringet ir mir drabe ein rîs, nie rîter als hôhen prîs mit dienste erwarp nâch minne.« sô sprach diu herzoginne: