*D Dô sprach si: »hêrre, dirre stein bî tage unt alle nehte schein, sît er mir êrste wart erkant, al umbe sehs mîle in daz lant. swaz in dem zil geschiht, in dirre sûl man daz siht, in wazzer und ûf velde, des ist er wâriu melde: ez sî vogel oder tier, der gast unt der fôrehtier, die vremden unt die kunden, die hât man drinne vunden. Über sehs mîle gêt sîn glanz; er ist sô veste und ouch sô ganz, daz in mit starken sinnen kunde nie gewinnen weder hamer noch der smit. er wart verstolen ze Thabronit der küneginne Secundillen, ich wæne des, ân ir willen.« Gawan an den zîten sach in der sûl rîten einen rîter und eine vrouwen. moht er dâ beidiu schouwen, dô dûht in diu vrouwe clâr, man und ors gewâpent gar unt der helm gezimieret. si kômen geheistieret durch die passâschen ûf den plân; nâch im diu reise wart getân.

*m dô sprach si: »hêrre, diser stein bî tage und alle naht schein, sît er mir êrste wart erkant, alumbe sehs mîle in diz lant. waz in dem zil geschiht, in diser sûl man daz siht, in wazzer oder ûf velde, daz ist ir wâriu melde: ez sî vogel oder tier, der gast und der fôrehtier, die vremden und die kunden, die het man dâr inne vunden. über sehs mîle gât sîn glanz; er ist sô veste und sô ganz, daz in mit starken sinnen kunde nie gewinnen weder hamer noch smit. er wart verstolen zuo Tabronit †die† künigîn Secundillen, ich wæne es, âne ir willen.« Gawan in den zîten sach in der sûl rîten einen rîter und ein vrouwen. moht er die beidiu schouwen, dô dûhte in diu vrouwe clâr, man und ros gewâpent gar und der helm gezimieret. si kômen geheistieret durch die passâschen ûf den plân; nâch im diu reise wart getân.

*G dô sprach si: »hêrre, dirre stein bî tage unde nahte schein al umbe vier mîle in diu lant, sît er êrste wart erkant. swaz in dem selben zil geschiht, in der sûle man daz siht, in wazzer unde ûf velde, des ist disiu varwe melde, ez sî vogel oder tier. den gast unde den fôrehtier, die vrömeden unde die kunden hât man drinne vunden. über vier mîle gêt sîn glanz; si ist sô veste unde sô ganz, daz si mit deheinen sinnen nie mohte gewinnen weder hamer noch der smit. si wart verstolen ze Tabrunit der künegîn Secundillen, des gihe ich, ân ir willen.« Gawan an den zîten sach in der sûle rîten einen rîter unde ein vrouwen moht er dâ selbe schouwen. dô dûhte in diu vrouwe clâr, man unde ros gewâpent gar unt der helm gezimiert. si kômen geheistiert durch die passâsche ûf den plân; nâch ime diu reise wart getân.

*T dô sprach si: »hêrre, diser stein die tage und alle nehte schein al umb vier mîle in diu lant, sît er mir êrst wart bekant. waz in dem selben zil geschiht, in der sûle man daz siht, in wazzer und ûf velde, des ist si wâriu melde, ez sî vogel oder tier. den gast und den fôrehtier, die vremden und die kunden hât man drinne vunden. über sehs mîle gêt sîn glanz; er ist sô veste und sô ganz, daz in mit keinen sinnen nie mohte gewinnen weder hamer noch der smit. er wart verstolen zuo Tabrunit der künigîn Secundillen, ich wæne des, ân ir willen.« Gawan an den zîten sach in der sûle rîten einen ritter und eine vrouwen. moht er dô bêdiu schouwen, dô dûht in diu vrouwe clâr, man und ros gewâpent gar und der helm gezimieret. si kam geheistieret durch die passâsche ûf den plân; nâch im diu reise wart getân.