*D Diu künegîn sprach: »muoz ich sô spehen, daz ir mir, hêrre, habt verjehen, daz ich iwer meisterinne sî, sô küsset dise vrouwen alle drî. dâ sît ir lasters an bewart: si sint erborn von küneges art.« Dirre bete was er vrô. die clâren vrouwen kuster dô, Sangiven unt Itonje unt die süezen Cundrie. Gawan saz selbe vünfter nider. dô sach er vür und wider an der clâren meide lîp. iedoch twang in des ein wîp, diu in sîme herzen lac. dirre meide blic ein nebeltac was bî Orgelusen gar. diu dûht êt in sô wol gevar, von Logroys diu herzogîn; dâ jagete in sîn herze hin. Nû diz was ergangen, daz Gawan was enpfangen von den vrouwen allen drîn. die truogen sô liehten, süezen schîn, des lîhte ein herze wære versniten, daz ê niht kumbers het erliten. Zuo sîner meisterinne er sprach umbe die sûl, die er dâ sach, daz si im sagete mære, von welher art diu wære.

*m diu künigîn sprach: »sol ich daz spehen, daz ir mir, hêrre, hât verjehen, daz ich iuwer meisterîn sî, sô küsset die vrouwen al drî. dâ sît ir lasters wol bewart: si sint erborn von küniges art.« diser bete was er vrô. die clâren vrouwen kuste er dô, Sangiven und Ithonie und die süezen Condrie. Gawan saz selbe vünfte nider. dô sach er vür und wider zuo der clâren megde lîp. iedoch twanc in daz wîp, diu in sînem herzen lac. diser megde blic ein nebeltac was bî Urgeluse gar. diu dûhte eht in sô wol gevar, von Logrois diu herzogîn; dâ jagete in sîn herz hin. Nû diz was ergangen, daz Gawan was enpfangen von den vrouwen allen drîn. die truogen sô liehten schîn, des lîht ein herz wære versniten, daz ê niht kumbers het erliten. zuo sîner meisterîn er sprach umb die sûle, die er dâ sach, daz si im sagte mær, welicher hant diu wær.

*G diu künegîn sprach: »muoz ich sô spehen, daz ir mir, hêrre, habet verjehen, daz ich iuwer meisterinne sî, sô küsset dise vrouwen drî. dâ sît ir lasters ane bewart: si sint geborn von hôher art.« dirre bete was er vrô. die clâren vrouwen kuste er dô, Sagiven unde Itonien unde die süezen Gundrien. Gawan saz selbe vierde nider. dô sach er vür unde wider an der clâren meide lîp. iedoch dwanc in des ein wîp, diu in sînem herzen lac. dirre meide blic ein nebels tac was bî Orgelusen gar. diu dûht êt in vil wol gevar, von Logroys diu herzogîn; dar jagete in sînes herzen sin. nû diz was ergangen, Gawan was enpfangen von den vrouwen allen drîn. die truogen sô liehten, werden schîn, des lîht ein herze wære versniten, daz ê niht kumbers het erliten. hin ze sîner meisterinne er sprach umb die sûl, die er sach, daz si im sagete mære, von welher art diu sûle wære.

*T diu künigîn sprach: »muoz ich sô spehen, daz ir, hêrre, mir hât verjehen, daz ich iuwer meisterîn sî, sô küsset dise vrouwen alle drî. dâ sît ir lasters an bewart: si sîn geborn von hôher art.« diser bet was er vrô. die klâren vrouwen kust er dô, Seyven und Itonie und die süezen Kundrie. Gawan saz selbe vünfte nider. dô sach er vür und wider an der klâren meide lîp. iedoch twanc in des ein wîp, diu mit stæte in sînem herzen lac. diser meide blic ein nebeltac was bî Orgelusen gar. diu dûht in ouch vil wol gevar, von Logrois diu herzogîn; dar jagte in sînes herzen sin. nû daz was ergangen, Gawan was enpfangen von den vrouwen allen drîn. die truogen sô liehten, werden schîn, des lîht ein herze wære versniten, daz ê niht kumbers het erliten. hin zuo sîner meisterîn er sprach umb die sûl, die er dâ sach, daz si im sagte mære, von welher art diu wære.