*D sine müesen dienst gein iu tragen. nû welt ir prîs an im bejagen? ir soltet kraft gein kreften geben und liezet Gawanen leben siech mit sînen wunden unt twinget die gesunden. Maneger hât von minnen sanc, den nie diu minne alsô getwanc. Ich möhte nû wol stille dagen, ez solten minnære klagen, waz dem von Norwæge was, dô er der âventiwer genas, daz in bestuont der minnen schûr âne helfe gar ze sûr. Er sprach: »owê, daz ich ie erkôs disiu bette ruowelôs! einez hât mich versêret unt daz ander mir gemêret gedanke nâch minne. Orgeluse, diu herzoginne, muoz genâde an mir begên, ob ich bî vreuden sol bestên.« Vor ungedult er sich sô want, daz brast etslîch sîn wunden bant. in solhem ungemache er lac. nû seht, dô schein ûf in der tac; des het er unsanfte erbiten. er hete dâ vor dicke erliten mit swerten manegen scharpfen strît sanfter danne die ruowens zît.

*m si †müeste† dienst gegen iu tragen. nû wolt ir prîs an im bejagen? ir sullet kraft gegen krefte geben und liezet Gawan leben siech mit sînen wunden und twingen die gesunden. maniger het von einem gesanc, den nie diu minne alsô betwanc. ich möhte nû wol stille dagen, ez solten minner klagen, waz dem von Norwæge was, dô er der âventiur genas, daz in bestuont der minnen schûr âne helf gar zuo sûr. er sprach: »owê, daz ich erkôs diz bette ruowelôs! einez het mich versêret, daz ander mir gemêret gedanc nâch minne. Urgeluse, diu herzoginne, muoz gnâde an mir begân, ob ich bî gnâden sol bestân.« vor ungedult er sich want, daz brast etlîch sîn wuntgebant. in solichem ungemach er lac. nû seht, dô schein ûf in der tac; des heter unsanft erbiten. er hât dô vil dicke erliten mit swerten manigen herten strît sanfter dan die ruowens zît.

*G sine müesen dienst gein iu tragen. welt ir nû prîs an im bejagen? ir möht kraft gein krefte geben unde liezet Gawanen leben siech mit sînen wunden unde wundet die gesunden. maniger hât von minnen sanc, den doch diu minne nie bedwanc. ich möhte nû wol stille dagen unde liez mîn klagen, waz dem von Norwæge was, dô er der âventiure genas, daz in bestuont der minne schûr âne helfe gar ze sûr. dô sprach er: »wê, daz ich erkôs disiu bette riuwelôs! daz eine hât mich versêret, daz ander mir gemêret gedanke nâch minne. Orgeluse, diu herzoginne, muoz genâde an mir begên, ob ich bî vröuden sol bestên.« von ungedult er sich want, daz brast eteslîch sîn wunden bant. in solhem ungemache er lac. nû sehet, dô schein ûf in der tac; des het er nû samfte erbiten. er het ouch dâ vor erliten mit swerten manigen herten strît, doch senfter denne diu trûrens zît.

*T si müesten dienst gên iu tragen. wolt ir nû prîs an in bejagen? ir möht kraft gên kreften geben und liezet Gawanen leben siech mit sînen wunden und wundet die gesunden. maneger hât von minnen sanc, den doch diu minne nie betwanc. ich möhte nû wol stille dagen und liez mîne klagen, waz dem von Norwæge was, dô er der âventiur genas, daz in bestuont der minne schûr âne hilfe gar zuo sûr. dô sprach er: »wê, daz ich erkôs disiu bette ruowelôs! daz ein hât mich versêret, daz ander mir gemêret gedanke nâch minne. Orgeluse, diu herzoginne, muoz gnâde an mir begên, ob ich mit vreuden sol bestên.« von ungedult er sich sô want, daz brast etslîch sîn wunden bant. in solchem ungemache er lac. nû seht, dô schein ûf in der tac; des het er unsanfte erbiten. er het ouch vor erliten mit swerten manegen herten strît, doch senfter danne dise ruowens zît.