*D Swer im nû ruowe næme, ob ruowens in gezæme, ich wæne, der hetes sünde. nâch der âventiure urkünde het er sich gearbeitet, gehœhet unt gebreitet sînen prîs mit grôzer nôt. swaz der werde Lanzilot ûf der swertbrücke erleit unt sît mit Meljacanze streit, daz was gein dirre nôt ein niht, unt des man Garele giht, dem stolzem künege rîche, der alsô rîterlîche den lewen von dem palas warf, der dâ ze Nantes was. Garel ouchz mezzer holte, dâ von er kumber dolte in der marmelînen sûl. trüege dise pfîle ein mûl, er wære ze vil geladen dâr mite, die Gawan durch ellens site gein sîme verhe snurren liez, als in sîn manlîch herze hiez. Ligweiz Prelljus, der vurt, und Erek, der Schoydelakurt erstreit ab Mabonagrin, der newederz gap sô hôhen pîn, noch dô der stolze Iwan sînen guz niht wolde lân

*m Wer im nû ruowe næme, ob ruowens im gezæme, ich wæne, der hete es sünde. nâch der âventiur urkünde het er sich ê erarbeitet, gehœhet und gebreitet sînen prîs mit grôzer nôt. waz der werde Lanzelot ûf der swertbrücke erleit und sît mit Melianz streit, daz was gegen diser nôt ein niht, und des man Garelle giht, dem stolzen künic rîche, der alsô ritterlîche den lewen von dem palas warf, der zuo Nantes was. Garel ouch daz mezzer holt, dâ mit er kumber dolt in der marmelînen sûl. trüege dise pfîle ein mûl, er wær geladen wol dâ mite, die Gawan mit ellens site gegen sînem verhe snurren liez, als in sîn manlîch herz hiez. Ligweis Prellius, der vurt, und Erec, der Schoidelacurt erstreit ab Mobonagrin, der †ietweder† gap sô hôhe pîn, noch dô der stolze Iwan sînen guz niht wolte lân

*G Swer im nû ruowe næme, ob ruowens in gezæme, ich wæne, er hetes sünde. nâch der âventiure urkünde het er sich gearbeitet, gehœhet unde gebreitet sînen brîs mit grôzer nôt. swaz der werde Lanzelot ûf der swertbrücke erleit unde sît mit Melianzen streit, daz was gein dirre nôt ein niht, unde des man Garel giht, dem werden künege rîche, der alsô rîterlîche den lewen von dem palas warf, der dâ ze Nantis was. Garel daz mezzer holte, dâ von er kumber dolte in der marmelsûl. trüege dise pfîle ein mûl, der wære ze vil geladen dâr mite, die Gawan durch ellens site gein sînem verhe snurren liez, als in sîn manlîch ellen hiez. Lishoys Prillius, der vurt, unde Erek de Tschoidelakurt erstreit abe Mobonagrin, der dewederz gap sô hôhen pîn, noch der stolze Ywan sînen gruoz niht wolde lân

*T Wer im nû ruo næme, ob ruowens in gezæme, ich wæn, er het es sünde. nâch der âventiur künde het er sich gearbeitet, gehœhet und gebreitet sînen prîs mit grôzer nôt. waz der werde Lanzelot ûf der swertbrücke erleit oder sît mit Melyanz streit, daz was gên diser nôt ein niht, und des man Garel giht, dem werden künige rîche, der alsô ritterlîche den lewen von dem palas warf, der dâ ze Nantis was. Garel daz mezzer holte, dâ von er kumber dolte in der marmelînen sûl. trüege dise pfîle ein mûl, der wære zuo vil geladen mite, die Gawan durch êren site gên sînem verhe snurren liez, als in sîn menlîch êre hiez. Lygweiz Prillus, der vurt, und Erec, der Schoydelakurt erstreit ab Mobonagrin, der dewederz gap sô hôhen pîn, noch der stolze Ywan sînen gruoz niht wolte lân