*D was worden dâ ze Zazamanc. sîn hant die gunst erranc. dennoch swebt er ûf dem sê; die snellen winde im tâten wê. einen sîdînen segel sach er rôten. den truoc ein kocke unt ouch die boten, die von Schotten Vridebrant vroun Belakanen hete gesant. er bat si, daz si ûf in verkür, swier den mâg durch si verlür, daz si von im gesuochet was. dô vuorten si den adamas unt ein swert, einen halsberc und zwô hosen. hie muget ir grôz wunder losen, daz im der kocke widervuor, als im diu âventiure swuor. si gâbenz im. dô lobt ouch er: sîn munt der botschefte ein wer würde, swenner kœme zir. si schieden sich. man sagete mir, daz mer in truoc in eine habe. ze Sibilje kêrt er drabe. mit golde galt der küene man sînem marnære sân harte wol sîn arbeit. si schieden sich. daz was dem leit. Dâ ze Spane ime lande er den künec erkande. daz was sîn neve Kaylet. nâch dem kêrt er ze Dolet.

*m was worden dâ ze Zazamanc. sîn hant dâ den sic erranc. dannoch swebete er ûf dem sê; die snellen winde tâten im wê. einen sîdînen segel sach er rôten. den truoc ein kocke und ouch die boten, die von Schotten lant Fridebrant vrowen Belakanen hete gesant. er bat si, daz si ûf in verkür, wie er den mâc durch si verlür, daz si von ime gesuochet was. dô vuorten si den adamas, ein swert, einen halsberc und zwô hosen. hie muget ir grôz wunder losen, daz ime der kock widervuor, als mir diu âventiure swuor. si gâbenz ime. dô lobete ouch er: sîn munt der botschaft ein wer würde, wenne er kœme zuo ir. si schieden sich. man sagete mir, daz mer ir trüege, in einer habe ze Sibilie kêrt er drabe. mit golde galt der küene man sînem marnære sân harte wol sîn arbeit. si schieden sich. daz was dem leit. Dâ ze Spane in dem lande er den künic erkande. daz was sîn neve Kailet. mit dem kêrter ze Dolet.

*G wart dâ ze Zazamanc. sîn hant dâ sigenunft erranc. dannoch swebter ûf dem sê; die snellen winde im tâten wê. dô sach er einen segel rôten. den truogen kocken und die boten, die von Schotten Fridebrant vroun Belacanen hete gesant. er bat si, daz si ûf in verkür, swier den mâc durch si verlür, daz si von im gesuochet was. dô vuorten si den adamas, ein swert, den halsberc und zwô hosen. hie muget ir grôzes wunders losen, daz im der kocke widervuor, als mir diu âventiure swuor. si gâbenz im. dô lobt ouch er: sîn munt der botschefte eine wer wære, swenner kœme zir. si schieden sich. man sagte mir, daz mer warf in in eine habe. ze Sibilje kêrter abe. mit golde galt der küene man sînem marnære sân harte wol sîn arbeit. si schieden sich. daz was dem leit. ze Spange in dem lande den künic er erkande. daz was sîn neve Kailet. Nâch dem kêrter ze Dolet.

*T was worden dâ zuo Zazamanc. sîn hant dâ sigenunft erranc. dannoch swebet er ûf dem sê; die snellen winde im tâten wê. einen sîdînen segel sach er rôten. den truoc ein kocke und ouch die boten, die von Schotten Fridebrant vrouwe Belacane hete gesant. er bat si, daz si ûf in verkür, wie er den mâc durch si verlür, daz si von im gesuochet was. dô vuorten si den adamas, ein swert, einen halsberc und zwô hosen. hie muget ir grôz wunder losen, daz im der kocke widervuor, als mir diu âventiure swuor. si gâbenz im. dô lobete ouch er: sîn munt der botschefte ein wer wære, sô er kæme wider zuo ir. si schieden sich. man saget mir, daz mer trüege in in eine habe. zuo Sybilie dô kêrte er abe. mit golde galt der küene man sîme marnære sân harte wol sîn arbeit. si schieden sich. daz was dem leit. Ze Spanie in dem lande den künec er bekande. daz was sîn neve Kaylet. nâch dem kêrter zuo Dolet.