*D Dô hôrt er ein gebrummen, als der wol zweinzec trummen slüege hie ze tanze. sîn vester muot der ganze, den diu wâre zagheit nie verscherte noch versneit, dâhte: »waz sol mir geschehen? ich möhte nû wol kumbers jehen. wil sich mîn kumber mêrn, ze wer sol ich mich kêrn.« Nû sach er geins gebûwers tür. ein starker lewe spranc dar vür; der was als ein ors sô hôch. Gawan, der ie ungerne vlôch, den schilt mit den riemen nam. er tet, als ez der wer gezam: er spranc ûf den estrîch. durch hunger was vreislîch dirre starke lewe grôz, des er doch wênec dâ genôz. Mit zorne lief er an den man, ze wer stuont hêr Gawan. er hete im den schilt nâch genomen: sîn êrster grif was alsô komen durch den schilt mit al den klân. von tiere ist selten ê getân sîn grif durch solhe herte. Gawan sich zuckes werte: ein bein hin ab er im swanc. der lewe ûf drîen vüezen spranc;

*m dô hœret er ein brummen, als der wol zweinzic trummen slüege dâ zuo tanze. sîn vester muot der ganze, den diu wâre zagheit nie versêrt noch versneit, er dâht: »waz sol mir geschehen? ich möhte nû wol kumbers jehen. wil sich mîn kumber mêren, zuo wer sol ich mich kêren.« nû sach er gegen gebûres tür. ein starker lewe spranc her vür; der was als ein ros sô hôch. Gawan, der ie †gerne† vlôch, den schilt er mit den riemen nam. er tet, als ez der wer gezam: er spranc ûf dem estrîch. dô was durch hunger vreislîch diser starke lewe grôz, des er doch wênic dâ genôz. mit zorne lief er an den man, zuo wer stuont hêr Gawan. er het im den schilt nâhe genomen: sîn êrster grif was alsô komen durch den schilt mit al den klân. von tier ie selten wart getân ein grif durch solich herte. Gawan sich zuckens werte: ein bein hin ab er im swanc. der lewe ûf drîn vüezen spranc;

*G Dô hôrt er ein gebrummen, als der wol zweinzec trummen slüege hie ze tanze. sîn vester muot der ganze, den diu wâre zageheit nie verscherte noch versneit, dâhte: »waz sol mir geschehen? ich möhte nû wol kumbers jehen. wil sich mîn kumber mêren, ze wer sol ich mich kêren.« nû sach er geines gebûres tür. ein grôzer lewe spranc her vür; der was als ein ors als hôch. Gawan, der ie ungerne vlôch, den schilt er mit den riemen nam. er tet, als ez der wer gezam: er spranc ûf den estrîch. durch hunger was vreislîch dirre starke lewe grôz, des er doch wênic dâ genôz. mit zorne lief er an den man, ze wer stuont hêr Gawan. er het im den schilt nâch genomen: sîn êrster grif was alsô komen durch den schilt mit den klân. von tiere ist selten ê getân sîn grif durch solhe herte. Gawan sich zuckes werte: ein bein hin abe er im swanc. der lewe ûf drîn vüezen spranc;

*T Dô gehôrt er ein gebrummen, alse der zwênzic trummen slüege hie ze tanze. sîn vester muot der ganze, den diu wâre zageheit nie versêrte noch versneit, dâhte: »waz sol mir geschehen? ich möhte nû wol kumbers jehen. wil sich mîn kumber mêren, ze wer sol ich mich kêren.« Nû sach er gegen jenes gebûres tür. ein starker lewe spranc her vür; der was als ein ors sô hôch. Gawan, der ie ungerne vlôch, den schilt er mit den riemen nam. er tet, als ez der wer gezam: er spranc ûf den estrîch. durch hunger was vreislîch dirre starke lewe grôz, des er doch wênic dâ genôz. mit zorne lief er an den man, ze wer stuont hêr Gawan. er het im den schilt nâch genomen: sîn êrster grif was alsô komen durch den schilt mit alden klân. von tieren ist selten ê getân ein grif durch solhe herte. Gawan sich zuckes werte: ein bein hin abe er im swanc. der lewe ûf drîn vüezen spranc;