*D Immer, als dicke er trat, daz bette vuor von sîner stat, daz ê was gestanden. Gawane wart enblanden, daz er den swæren schilt getruoc, den im sîn wirt bevalch genuoc. Er dâhte: »wie kum ich ze dir, wiltû wenken sus vor mir? ich sol dich innen bringen, ob ich dich mege erspringen.« dô gestuont im daz bette vor. er huop sich zem sprunge enbor unt spranc rehte mitten dran. die snelheit vreischet nie mêr man, wie daz bette her unt dar sich stiez. der vier wende decheine ez liez: mit hurte an ieslîchez swanc, daz al diu burc dâ von erklanc. Sus reit er manegen poynder grôz. swaz der doner ie gedôz unt al die busûnære, ob der êrste wære bî dem jungesten dinne und bliesen nâch gewinne, ez endorfte niht mêr dâ krachen. Gawan muose wachen, swie er an dem bette læge. wes der helt dô pflæge? des galmes het in sô bevilt, daz er zucte über sich den schilt.

*m iemer, als dicke er trat, daz bette vuor von sîner stat, daz ê was gestanden. Gawan wart enblanden, daz er den swæren schilt getruoc, den im sîn wirt bevalch genuoc. er dâhte: »wie kom ich zuo dir, wiltû wenken sus vor mir? ich sol dich innen bringen, ob ich dich müge erspringen.« dô gestuont im daz bette vor. er huop sich zuom sprunge enbor und spranc enmitten dar an. die snelheit vreischet dekein man, wie daz bette her und dâ sich stiez. der vier wende dekeinez liez: mit hurte an ieglîch ez swanc, daz al diu burc dâ von erklanc. sus reit er manigen †kumber† grôz. waz der toner ie gedôz und alle busûnære, ob der êrste wære bî dem jungsten dâr in und bliesen nâch gewin, ez durft niht mê dâ krachen. Gawan muoste wachen, wie er an dem bette læge. wes der helt dô pflæge? des galmes het in sô bevilt, daz er zuhte über sich den schilt.

*G Immer, als dicke er trat, daz bette vuor von sîner stat, daz ê was gestanden. Gawane wart enblanden, daz er den swæren schilt getruoc, den im sîn wirt bevalch genuoc. er dâhte: »wie kume ich ze dir, wil dû wenken sus vor mir? ich sol dich innen bringen, ob ich dich muge erspringen.« dô gestuont im daz bette vor. er huop sich zem sprunge enbor unde spranc rehte enmitten dran. die snelheit gevreischet niemer man, wie daz bette her unde dar sich stiez. der vier wende deheinez liez: mit hurte an ieteslîche ez swanc, daz al diu burc dâ von erklanc. sus reit er manigen poynder grôz. swaz der doner ie gedôz unde al die busûnære, op der êrste wære bî dem jungesten dinne unde bliesen nâch gewinne, ez endorfte niht mê dâ krachen. Gawan muose wachen, swie er an dem bette læge. wes der helt dô pflæge? des galmes hete in sô bevilt, daz er zucte über sich den schilt.

*T iemer, alse dicke er trat, daz bette vuor von der stat, dâ ez ê was gestanden. Gawan wart enblanden, daz er den swæren schilt truoc, den im sîn wirt bevalch genuoc. Er gedâhte: »wie kum ich zuo dir, wiltû wenken sus von mir? ich sol dich innen bringen, ob ich dich muge erspringen.« dô gesaz im daz bette vor. er huop sich zem sprunge enbor unde spranc enmitten dran. die snelheit vriesch nie kein man, wie daz bette her unde dar sich stiez. der vier wende deheine ez liez: mit hurte an iegeslîchez swanc, daz diu burc dâ von erklanc. Sus reit er manegen poynder grôz. swaz der doner ie gedôz unde alle die busûnære, ob der êrste wære bî dem andern drinne unde bliesen nâch gewinne, ez endorfte nimer dâ krachen. Gawan muose wachen, swie er an dem bette læge. wes der helt dô pflæge? des galmes het in dô bevilt, daz er zucte über sich den schilt.