*D Iu sînen prîs hie lâzen hât, der manege rîterlîche tât gevrümt hât, der süeze? von rehte ich in alsus grüeze. mit ellen ist sîn rîterschaft; sô manege tugent diu gotes kraft in mannes herze nie gestiez, ân Ithern von Gaheviez. der Ithern vor Nantes sluoc, mîn schif in gestern übertruoc. er hât mir vünf ors gegeben - got in mit sælden lâze leben -, diu herzogen und künege riten. swaz er hât ab in erstriten, daz wirt ze Pelrapeire gesagt; ir sicherheit hât er bejagt. sîn schilt treit maneger tjoste mâl. er reit hie vorschen umben Grâl.« Gawan sprach: »war ist er komen? saget mir, wirt, hât er vernomen, dô er sô nâhe was hie bî, waz disiu âventiure sî?« »Hêrre, ern hâts niht ervarn. ich kunde mich des wol bewarn, daz ich es im zuo gewüege: unvuoge ich danne trüege. het ir selbe vrâgens niht erdâht, nimmer wæret irs innen brâht von mir, waz hie mæres ist, mit vorhten scharpf ein strenger list.

*m iu sînen prîs gelâzen hât, der manige ritterlîch getât gevromt het, der süeze? von reht ich in alsus grüeze. mit ellen ist sîn ritterschaft; sô manige tugent diu gotes kraft in mannes herz nie gestiez, âne Ithern von Gaheviez. der Ithern vor Nantes sluoc, mîn schif in gestern übertruoc. er het mir vünf ros gegeben - got in mit sælden lâze leben -, diu herzogen und künige riten. waz er het ab in erstriten, daz wart zuo Pelraperie gesaget; ir sicherheit het er bejaget. sîn schilt treit maniger juste mâl. er reit hie vorschende umb den Grâl.« Gawan sprach: »war ist er komen? sagt mir, wirt, hât er vernomen, dô er sô nâhe was hie bî, daz disiu âventiur sî?« »hêrre, er het es niht ervarn. ich kunde mich des wol bewarn, daz ichs im zuo gewüege: ungevüege ich dan trüege. het ir selbe vrâgens niht erdâht, niemer wæret irs innen brâht von mir, waz hie mæres ist, mit vorhten †starp† ein strenger list.

*G Nû sînen brîs hie lâzen hât, der manige rîterlîche tât gevrümet hât, der süeze? von rehte ich in alsus grüeze. mit ellen ist sîn rîterschaft; sô manige tugent diu gotes kraft in mannes herze nie gestiez, âne Itheren von Kahaviez. der Ithern vor Nantis sluoc, mîn schif in gester übertruoc. er hât mir vünf ors gegeben - got in mit sælden lâze leben -, diu herzogen unde künige riten. swaz er hât abe den gestriten, daz wirt ze Pelrapeire gesaget; ir sicherheit er hât bejaget. sîn schilt treit maniger tjoste mâl. er reit hie vorschende umbe den Grâl.« Gawan sprach: »war ist er komen? saget mir, wirt, hât er vernomen, dô er sô nâhen was hie bî, waz disiu âventiure sî?« »hêrre, ern hât es niht ervaren. ich kunde mich des wol bewaren, daz ich es im zuo gewüege: ungevüege ich danne trüege. het ir selbe vrâgens niht erdâht, nimmer wært irs innen brâht von mir, waz hie mæres ist, mit vorhten scharpf ein strenger list.

*T iu sînen prîs hie gelâzen hât, der manege rîterlîche tât gevrümt hât, der süeze? von rehte ich in sus grüeze. mit ellen ist sîn rîterschaft; sô manege tugent diu gotes kraft in mannes herze nie gestiez, âne Ithern von Kaheviez. der Ithern vor Nantes sluoc, mîn schif in gester übertruoc. er hât mir vünf ors gegeben - got in mit sælden lâze leben -, diu künege unde herzogen riten. swaz er hât an in erstriten, daz wirt ze Peilrapere gesaget; ir sicherheit hât er bejaget. sîn schilt treit maneger tjoste mâl. er reit ie vorschen umbe den Grâl.« Gawan sprach: »war ist der komen? saget, hêrre wirt, hât er vernomen, dô er sô nâhe was hie bî, waz dirre âventiure sî?« »Hêrre, er hât ir niht ervarn. ich kunde mich des wol bewarn, daz ichz im zuo gewüege: unvuoge ich danne trüege. het ir vrâgens niht gedâht, niener wæret irs innen brâht von mir, swaz hie mæres ist, mit vorhten starker, strenger list.