*D Nû diz was unwendec. der komende was genendec; alsô was ouch, der dâ beite. zer tjost er sich bereite. dô sazter die glevîn vorn ûf des satels vilzelîn, des Gawan vor het erdâht. sus wart ir bêder tjoste brâht: diu tjost ieweder sper zerbrach, daz man die helde ligen sach. Dô strûchte der baz geriten man, daz er unt mîn hêr Gawan ûf den bluomen lâgen. wes si dô bêde pflâgen? ûf springens mit den swerten; si bêde strîtes gerten. die schilde wâren unvermiten; die wurden alsô hin gesniten, ir beleip in lützel vor der hant, wan der schilt ist immer strîtes pfant. man sach dâ blicke unt helmes viwer. ir megts im jehen vür âventiwer, swen got den sic dan læzet tragen, der muoz vil prîses ê bejagen. Sus tûwerten si mit strîte ûf des angers wîte. es wæren müede zwêne smide, ob si halt heten starker lide, von alsô manegen grôzem slage. sus rungen si nâch prîses bejage.

*m nû diz was unwendic. der komende was genendic; alsô was ouch, der dâ beite. zuor juste er sich bereite. dô sat er die glevîn vornen ûf des satels vilzelîn. daz Gawan vor het gedâht. sus wart ir beider juste brâht: diu just ietweder sper zerbrach, daz man die helde ligen sach. dô strûhte der baz geriten man, daz er und ouch Gawan beide ûf den bluomen lâgen. wes si dô beide pflâgen? ûf springens mit den swerten; si beide strîtes gerten. die schilt wâren unvermiten und wurden alsô hin gesniten, in bleip lützel vor der hant; wan der schilt ist iemer strîtes pfant. man sach dâ buoc und helmes viur. ir megt es im jehen vür âventiur, wen got den sige dannen lât tragen, der muoz vil prîses ê bejagen. sus tûrten si mit strîte ûf des angers wîte. es wæren müede zwên smide, ob si halt heten starker lide, von alsô manigem grôzem slage. sus rungen si nâch prîses bejage.

*G Nû diz was unwendic. der komende was genendic; als was ouch, der dâ beite. zer tjost er sich bereite. dô sazete er die glevîn vor ûf des satels vilzelîn, des Gawan vor hete erdâht. sus was ir bêder tjoste brâht: diu tjoste ietweder sper zerbrach, daz man die helde ligen sach. dô strûhte der baz geriten man, daz er unde mîn hêrre Gawan ûf den bluomen lâgen. wes si dô bêde pflâgen? ûf springens mit den swerten; si bêde strîtes gerten. die schilde wâren unvermiten; die wurden alsô hin gesniten, ir beleip in lützel vor der hant, wan der schilt ist immer strîtes pfant. man sach dâ blicke unde helmes viur. ir mugts im jehen vür âventiur, swen got den sic dannân læzet tragen, der muoz vil brîses ê bejagen. sus tûrten si mit strîte ûf des angers wîte. es wæren müede zwêne smide, op si halt heten starker lide, von alsô manigem grôzem slage. sus rungen si nâch prîses bejage.

*T Nû diz was unwendic. der komende was genendic; alse was ouch, der dâ beite. zer tjoste er sich bereite. dô sazter die glevîn vor ûf des satels vilzelîn, des Gawan vor hâte gedâht. sus wart ir beider tjost brâht: diu tjost ietweders sper zerbrach, dô man die helde ligen sach. dô strûhte der wol geritene man, daz er unde mîn hêr Gawan ûf den bluomen lâgen. wes si dô beide pflâgen? ûf springens mit den swerten; prîses si beide gerten. die schilte wâren unvermiten; die wurden alsô hin gesniten, in bleip ir wênic vor der hant, wan der schilt ist iemer strîtes pfant. man sach dâ blicke unde helmes viur. ir mugets im jehen vür âventiur, swen got den sic dâ lât tragen, der muoz vil prîses ê bejagen. sus dructen si mit strîte ûf des angers wîte. es wæren müede zwêne smide, ob si halt trüegen starkiu lide, von alsô manegem starken slage. sus rungen si nâch prîses bejage.