*D Lât nâher gên, hêr minnen druc. ir tuot der vreude alsolhen zuc, daz sich dürkelt vreuden stat unt bant sich der riwen pfat. sus breitet sich der riwen slâ. gienge ir reise anderswâ danne in des herzen hôhen muot, daz diuhte mich gein vreuden guot. Ist minne unvuoge balt, dar zuo dunket si mich zalt; oder giht sis ûf ir kintheit, swem si vüeget herzeleit? unvuoge gan ich baz ir jugent, denne daz si ir alter bræche tugent. Vil dinges ist von ir geschehen. wederhalp sol ich des jehen? wil si mit jungen ræten ir alten site unstæten, sô wirt si schiere an prîse laz. man sol sis underscheiden baz. Lûter minne ich prîse unt alle, die sint wîse, ez sî wîp oder man, von den ichs ganze volge hân. swâ liep gein liebe erhüebe lûter âne trüebe, denne wederz des verdrüzze, daz minne ir herze slüzze mit minne, von der wanc ie vlôch - diu minne ist ob den andern hôch.

*m Lât nâher gân, hêr minnen druc. ir tuot der †† alsolichen zuc, daz sich dürkelt vröuden stat und bant sich der riuwen pfat. sus bereitet sich der riuwe slâ. giengen ir reise anderswâ dan in des herzen hôhen muot, daz diuhte mich gegen vröuden guot. ist minne ir ungevüege balt, dar zuo dunket si mich zuo alt; oder giht si es ûf ir kintheit, wem si vüeget herzeleit? ungevüege gan ich baz ir jugent, dan daz si alter bræch ir tugent. vil dinges ist von ir geschehen. wederhalp sol ich des jehen? wil si mit jungen ræten ir alten sit unstæten, sô wirt si schier an prîse laz. man sol sus underscheiden baz: lûter minne ich prîse und alle, die sint wîse, ez sî wîp oder man, von den ich ganze volge hân. wâ liep gegen liebe erhüebe lûter âne trüebe, der enwederz des verdrüzze, daz minne ir herz slüzze mit minnen, von der wanc ie vlôch - diu minne ist ob den andern hôch.

*G Lât nâher gên, hêr minnen druc. ir tuot der vröuden alsolhen zuc, daz sich dürkelt der vröuden stat unt bant sich der triuwen pfat. sus breitet sich der riuwen slâ. gienge ir reise anderswâ danne in des herzen hôhen muot, daz diuhte mich gein vröuden guot. ist minne ir ungevüege balt, dar zuo dunket si mich ze alt; ode giht sis ûf ir kintheit, swem si vüeget herzeleit? ungevüege gan ich baz ir jugent, danne daz si ir alter bræche tugent. vil dinges ist von ir geschehen. wederhalp sol ich des jehen? wil si mit jungen ræten ir alten site unstæten, sô wirt si schiere an brîse laz. man sol sis underscheiden baz. lûter minne ich prîse unde alle, die sint wîse, ez sî wîp ode man, von den ichs ganze volge hân. swâ lieb gein liebe erhüebe lûter âne trüebe, der enwederz des verdrüzze, daz minne ir herze slüzze mit minnen, von der wanc ie vlôch - diu minne ist obe den andern hôch.

*T Lât nâher gên, hêr minnen druc. ir tuot der minne sölhen zuc, daz sich dürkelt vröuden stat unde bant sich der riuwen pfat. sus breitet sich der riuwen slâ. gienge ir reise anderswâ danne in des herzen hôhen muot, daz diuhte mich gegen vröuden guot. dar zuo dunket si mich ze alt, ist minne ir unvuoge balt; oder giht sis ûf ir kintheit, dem si vüeget herzeleit? unvuoge gan ich baz ir jugent, danne si dem alter bræche ir tugent. vil dinges ist von ir geschehen. wederhalp sol ich des jehen? wil si mit jungen ræten ir alte site unstæten, sô wirt si schiere an witzen laz. man sol sis underwîsen baz. Lûter minne ich prîse unde alle, die sint wîse, ez sî wîp oder man, von den ichs ganze volge hân. swâ liep gegen liebe erhüebe lûter âne trüebe, dâ dewederz des verdrüzze, ob minne ir herze slüzze mit minne, die der wanc ie vlôch - diu minne ist ob den andern hôch.