*D Gahmurete, ir hêrren. die selben wâren die êrren. Dô hete Prothizilas, der von arde ein vürste was, lâzen ein herzentuom. daz lêch er dem, der manegen ruom mit sîner hant bejagete. gein strîte er nie verzagete: Lachfilirost schahtelakunt nam ez mit vanen sân zestunt. Von Azagouc die vürsten hêr nâmen den Schotten Hiuteger unt Gaschieren den Orman. si giengen vür ir hêrren sân. der liez si ledic umb ir bete. des danketen si dô Gahmurete. Hiuteger den Schotten si bâten sunder spotten: »lât mîme hêrren daz gezelt hie umbe âventiure gelt. ez zucket uns Isenhartes leben, daz Vridebrande wart gegeben diu zierde unsers landes. sîn vreude diu stuont pfandes.

*m Gahmuret, ir hêrren. die selben wâren die êrren. Dô het Protizilas, der von art ein vürste was, lâzen ein herzentuom. daz lêch er dem, der manigen ruom mit sîner hant bejagete. gegen strîte er nie verzagete: Lachfillirost schahtelakunt nam †erz† die vanen sân zestunt. von Azagouc die vürsten hêr nâmen den Schotten Huteger und Gaschieren den Oriman. si giengen vür ir hêrren sân. der liez si ledic umb ir bete. des danketen si dô Gahmurete. Hutegeren den Schotten si bâten sunder spotten: »lât mînem hêrren daz gezelt hie umb âventiure gelt. ez zuckete uns Ysenhartes leben, daz Fridebrande wart gegeben diu zierde unsers landes. sîn vröude diu stuont pfandes.

*G Gahmuret, ir hêrren. die selben wâren die êrren. nâher drungen die von Zazamanc mit grôzer vuore, niht ze kranc, unde enpfiengen, als ir hêrre hiez, von im ir lant und des geniez, als iegelîchen ane gezôch. diu armuot ir hêrren vlôch. dô hete Prozitalas, der von arde ein vürste was, lâzen ein herzentuom. daz lêch er dem, der manigen ruom mit sîner hant bejagete. an strît er nie verzagete: Lafilirost schahtelakunt nam ez mit vanen sân zestunt. von Azagouch die vürsten hêr nâmen den Schotten Huteger unde Gatschieren den Norman. si giengen vür ir hêrren stân. der lie si ledec durch sîne bet. des dankten si dô Gahmuret. Hutegeren den Schotten si bâten sunder spotten: »lât mînem hêrren diz gezelt hie umbe âventiure gelt. ez zuct uns Ysenhartes leben, daz Fridebrande wart gegeben diu gezierde unsers landes. sîn vröude stuont dô pfandes.

*T Gahmuret, ir hêrren. die selben wâren die êrren. nâher drungen die von Zazamanc mit grôzer vuore, niht ze kranc. si entviengen, als ir vrouwe hiez, von im ir lant und des geniez, als iegelîchem an gezôch. diu armuot ir hêrren vlôch. nû hete Protizalas, der von art ein vürste was, verlâzen ein herzogentuom. daz lêch er dem, der manegen ruom mit sîner hant bejagete. an strîte er nie verzagete: Lafillirost schahtelakunt nam ez mit vanen sân zestunt. von Azagouc die vürsten hêr nâmen den Schotten Huteger und Gatschier den Norman. si giengen vür ir hêrren stân. der liez si ledic umb ir bet. des genâdeten si Gahmuret. Hutegern den Schotten si bâten sunder spotten: »lât mînem hêrren diz gezelt hie ûf âventiure gelt. ez zuht uns Isenhartes leben, daz Fridebrant wart gegeben diu zierde unsers landes. sîn vreude stuont pfandes.