*D Doch engezwîvelte nie sîn wille. diu küneginne Secundille, die Feirefiz mit rîters hant erwarp, ir lîp unt ir lant, diu hete in ir rîche hart unlougenlîche von alter dar der liute vil mit verkêrtem antlützes zil; si truogen vremdiu, wilden mâl. dô sagete man ir umbe den Grâl, daz ûf erde niht sô rîches was unt des pflæge ein künec, hiez Anfortas. daz dûhte si wunderlîch genuoc, wan vil wazzer in ir lant truoc vür den griez edel gesteine. grôz, niht ze kleine, hete si gebirge guldîn. dô dâhte diu edele künegîn: »wie gewinne ich künde disses man, dem der Grâl ist undertân?« Si sant ir kleinœde dar, zwei mensch wunderlîch gevar, Cundrien unt ir bruoder clâr. si sante im mêr dennoch vür wâr, daz niemen möhte vergelten; man vündz veile selten. Dô sande der süeze Anfortas, wander êt ie vil milte was, Orgelusen de Logrois disen knappen kurtois.

*m doch gezwîvelt nie sîn wille. diu künigîn Secundille, die Ferefiz mit ritters hant erwarp, ir lîp und ir lant, diu het in ir rîche harte unlougenlîche von alter dar der liute vil mit verkêrtem antlitze zil; si truogen vrömdiu, wildiu mâl. dô sagt man ir umb den Grâl, daz ûf erde niht sô rîches was, des pflæge ein künic, hiez Anfortas. daz dûhte si wunderlîch genuoc, wan vil wazzer in ir lant truoc vür den griez edel gestein. grôz, niht zuo klein, het si gebirge guldîn. dô dâhte diu edel künigîn: »wie gewinne ich künde dises man, dem der Grâl ist undertân?« si sante ir kleinœte dar, zwei mensch wunderlîch gevar, Condrien und ir bruoder clâr. si sante im mê dannoch vür wâr, daz niemen möhte vergelten; man vünde ez veil selten. dô sante der süeze Anfortas, wan er eht ie vil milte was, Urgeluse de Logrois disen knappen kurtois.

*G Doch gezwîvelte nie sîn wille. diu künegîn Secundille, die Feirafiz mit rîters hant erwarp, ir lîp unde ir lant, diu het in ir rîche harte unlougenlîche von alter dô der liute vil mit verkêrtem antlützes zil; si truogen vrömdiu, wildiu mâl. dô sagete man ir umben Grâl, daz ûf erden niht sô rîches was unde es pflæge ein künic, hiez Anfortas. daz dûhte si wunderlîch genuoc, wan vil wazzer in ir lant truoc vür den griez edel gesteine. grôz, niht ze kleine, het si gebirge guldîn. dô dâhte diu edel künigîn: »wie gewinne ich künde dises man, dem der Grâl ist undertân?« si sande ir kleinœde dar, zwei mensche wunderlîch gevar, Gundrien unde ir bruoder clâr. si sande im mêr dannoch vür wâr, daz niemen möhte vergelten; man vünde ez veile selten. dô sande der süeze Anfortas, wan er êt ie vil milte was, Orgelusen de Logrois disen knappen kurtois.

*T Doch enzwîvelte nie sîn wille. diu künegîn Secundille, die Ferefis mit rîters hant erwarp, ir lîp unde ir lant, diu hete in ir rîche harte unlougenlîche von alter dâ der liute vil mit verkêrten antlitzes zil; si truogen vremdiu, wilt mâl. dô seite man ir umbe den Grâl, daz ûf erde niht sô rîches was unde des pflæge ein künec, hiez Anfortas. Daz dûht si wunderlîch genuoc, wande vil wazzer in ir lande truoc vür den griez edel steine. grôze, niht ze kleine, hete si gebirge guldîn. dô dâhte diu edele künegîn: »wie gewinnich künde disses man, dem der Grâl ist undertân?« si sante ir kleinœte dar, zwei menschen wunderlîch gevar, Kundrien unde ir bruoder clâr. si santim mêr dannoch vür wâr, daz nieman möhte vergelten; man vündez veile selten. Dô sante der süeze Anfortas, wander eht ie vil milte was, disen knappen kurtois Orgelusen de Logrois.