*D Ez næht nû wilden mæren, die vreuden kunnen læren unt die hôch gemüete bringent; mit den bêden si ringent. nû was ez ouch über des jâres zît. gescheiden was des kampfes strît, den der lantgrâve zem Plimizœl erwarp. der was ze Barbigœl von Schanpfanzun gesprochen; dâ beleip ungerochen der künec Kingrisin. Vergulaht, der sun sîn, kom gein Gawane dar. dô nam diu werlt ir sippe war und schiet den kampf ir sippe maht, wand ouch der grâve Ehkunaht ûf im die grôzen schulde truoc, der man Gawanen zêch genuoc. des verkôs Kingrimursel ûf Gawanen, den degen snel. si vuoren beide sunder dan, Vergulaht unt Gawan, an dem selbem mâle durch vorschen nâch dem Grâle. al dâ si mit ir henden manege tjoste muosen senden. wan swers Grâles gerte, der muose mit dem swerte sich dem prîse nâhen. sus sol man prîses gâhen.

*m Ez nâhet nû wilden mæren, die vröude kunnen læren und die hôchgemüete bringent; mit den beiden si ringent. nû was ez ouch über des jâres zît. gescheiden was des kampfes strît, den der lantgrâve zuom Plimizol erwarp. der was zuo Barbigol von Schanfanzun gesprochen; dô beleip ungerochen der werde künic Kingrisin. Vergulaht, der sun sîn, kam gegen Gawane dar. dô nam diu werlt ir sippe war und schiet den kampf ir site maht, wenne ouch der grâve Ehkunaht ûf im die grôzen schulde truoc, der man zêch Gawan genuoc. daz verkôs Kingrimursel ûf Gawanen, den degen snel. si vuoren beide sunder dan, Vergulaht und Gawan, an dem selben mâl durch vorschen nâch dem Grâl. alsô si mit ir henden manige juste muosten senden. wan wer des Grâles gerte, der muoste mit dem swerte sich dem prîse nâhen. sus sol man prîses gâhen.

*G Ez nâhet nû wilden mæren, die vröuden kunnen læren unde die hôchgemüete bringent; mit den beiden si ringent. nû was ez ouch über des jâres zît, daz gescheiden was des kampfes strît, den der lantgrâve ze dem Blimzol erwarp. der was ze Barbigol von Tschanfenzun gesprochen; dâ beleip ungerochen der künic Kingrisin. Vergulaht, der sun sîn, kom gein Gawane dar. dô nam diu werlt ir sippe war unde schiet den kampf ir sippe maht, wan ouch der grâve Ehkunat ûf im die grôzen schulde truoc, der man Gawanen zêch genuoc. dô verkôs Kingrimursel ûf Gawanen, den degen snel. si vuoren bêde sunder dan, Vergulaht unde Gawan, an dem selben mâle durch vorschen nâch dem Grâle. al dâ si mit ir henden manige tjoste muosen senden. wan swers Grâles gerte, der muose mit dem swerte sich dem brîse nâhen. sus sol man brîses gâhen.

*T Ez nâhet nû wilden mæren, Die vröude kunnen læren unde die hôchgemüete bringent; mit den beiden si ringent. nû was ez über des jâres zît. gescheiden was des kampfes strît, den der grâve zem Plymizol erwarp. der was ze Barbigol von Tschampfenzun gesprochen; dâ bleip ungerochen der künec Kyngrisin. Vergulaht, der sun sîn, der kom gegen Gawane dar. dô nam diu werlt ir sippe war unde schiet den kampf ir sippe maht, wande ouch der grâve Ehkunaht ûf im die swæren schulde truoc, der man Gawanen zêch genuoc. daz verkôs Kyngrimursel ûffe Gawanen, den degen snel. si vuoren beide sunder dan, Vergulaht unde Gawan, an dem selben mâle durch vorschen nâch dem Grâle. aldâ si mit ir henden manege tjost muosen senden. wande swer des Grâles gerte, der muose mit dem swerte sich dem prîse nâhen. sus sol man prîses gâhen.