*D Der wirt ân allez bâgen begunde in vürbaz vrâgen: »neve, noch hân ich niht vernomen, wannen dir diz ors sî komen.« »hêrre, daz ors ich erstreit, dô ich von Sigunen reit. vor einer klôsen ich die sprach. dar nâch ich vlügelingen stach einen rîter drabe unt zôch ez dan. von Munsalvæsche was der man.« Der wirt sprach: »ist aber der genesen, des ez von rehte sol wesen?« »hêrre, ich sach in vor mir gên unt vant daz ors bî mir stên.« »wil dûs Grâles volc sus rouben unt dâ bî des gelouben, dû gewinnest ir noch minne, sô zweient sich die sinne.« »hêrre, ich namz in eime strît. swer mir dar umbe sünde gît, der prüeve alrêst, wie diu stê. mîn ors het ich verlorn ê.« dô sprach aber Parzival: »wer was ein magt, diu den Grâl truoc? ir mandel lêch man mir.« der wirt sprach: »neve, was er ir - diu selbe ist dîn muome -, sine lêch dirs niht ze ruome. si wânde, dû soldest dâ hêrre sîn des Grâles unt ir, dar zuo mîn.

*m Der wirt âne allez bâgen begunde in vürbaz vrâgen: »neve, noch hân ich niht vernomen, wannen dir daz ros sî komen.« »hêrre, daz ros ich erstreit, dô ich von Sigunen reit. vor einer klûsen ich die sprach. dar nâch ich vlügelîchen stach einen ritter dar ab und zôch ez dan. von Muntsalvasche was der man.« er sprach: »ist aber der man genesen, des ez von rehte solte wesen?« »hêrre, ich sach in von mir gân und vant daz ros bî mir dâ stân.« »wiltû des Grâles volc sus rouben und dâ bî des glouben, dû gewinnest sîn noch minne, sô zweient sich die sinne.« »hêrre, ich nam ez in einem strît. wer mir dar umbe sünde gît, der brüefe allerêrst, wie ez stê. mîn ros het ich verlorn ê.« Aber sprach Parcifal: »wer was diu maget, diu den Grâl truoc? ir mantel lêch man mir.« der wirt sprach: »neve, was er ir - diu selbe ist dîn muome -, si enlêch dirs niht zuo ruome. si wânte, dû soltest dâ hêrre sîn des Grâles und dar zuo mîn.

*G Der wirt ân allez bâgen begunde in vürbaz vrâgen: »neve, noch enhân ich niht vernomen, wannen dir ditze ors sî komen.« »hêrre, ditze ors ich erstreit, dô ich von Sigunen reit. vor einer klûsen ich die sach. dar nâch ich vlügelingen stach einen rîter drabe unde zôch ez dan. von Muntsalvatsche was der man.« der wirt sprach: »ist aber der genesen, des ez von rehte solde wesen?« »hêrre, ich sach in von mir gên unt vant daz ors bî mir stên.« »wil dûs Grâles volc sus rouben unt dâ bî des gelouben, dû gewinnest ir noch minne, sô zweient sich dîn sinne.« »hêrre, ich nam ez in einem strît. swer mir dar umbe sünde gît, der prüeve alrêrste, wie diu gestê. mîn ors het ich verlorn ê.« dô sprach aber Parzival: »wer was ein maget, diu den Grâl truoc? ir mantel lêch man mir.« der wirt sprach: »neve, was er ir - diu selbe ist dîn muome -, sine lêch dirs niht ze ruome. si wânde, dû soldest dâ hêrre sîn des Grâles unde ir, dar zuo mîn.

*T Der wirt âne allez bâgen begund in vürbaz vrâgen: »neve, noch hân ich niht vernomen, wannen dir daz ors sî komen.« »Hêrre, diz ors ich hie erstreit, dô ich von Sygunen reit. vor einer klôsen ich die gesprach. dar nâch ich vlügelingen stach einen rîter drabe unde zôch ez dan. von Munsalvasche was der man.« Der wirt sprach: »ist aber er genesen, des ez ze rehte solte wesen?« »Hêrre, ich sach in von mir gên unde vant daz ors bî mir stên.« »Wiltû des Grâles volc sus rouben unde dâ bî des gelouben, dû gewinnest ir noch minne, dâ zweient sich die sinne.« »Hêrre, ich nam ez in einem strît. swer mir dar umbe wandel gît, der prüeve aller êrst, wie der gestê. mîn ors het ich verlorn ê.« Eines tages vrâget in Parcifal: »wer was ein maget, diu den Grâl truoc? ir mantel lêch man mir.« Der wirt sprach: »daz sag ich dir: diu selbe ist dîn muome, si enlêch dirn niht ze ruome. si wânde, dû soltest dâ hêrre sîn des Grâles unde ir unde dar zuo mîn.