*D Sus gît man vome Grâle dan offenlîchen meide, verholne die man, durch vruht ze dienste wider dar, ob ir kint des Grâles schar mit dienste suln mêren; daz kan si got wol lêren. swer sich dienstes geinme Grâle hât bewegen, gein wîben minne er muoz verpflegen. wan der künec sol haben eine ze rehte, eine konen reine, unt ander, die got gesant ze hêrren in hêrrenlôsiu lant. über daz gebot ich mich bewac, daz ich nâch minnen dienstes pflac. mir geriet mîn vlæteclîchiu jugent unt eines werden wîbes tugent, daz ich in ir dienst reit, dâ ich dicke herteclîchen streit. die wilden âventiure mich dûhten sô gehiure, daz ich selten turnierte. ir minne condwierte mir vreude inz herze mîn; durch si tet ich vil strîtens schîn. des twanc mich ir minnen kraft gein der wilden verren rîterschaft. ir minne ich alsus koufte: der heiden unt der getoufte wâren mir strîtes al gelîch; si dûhte mich lônes rîch.

*m sus gît man von dem Grâle dan offenlîch megde, verholn die man, durch vruht zuo dienst wider dar, ob ir kint des Grâles schar mit dienste sollen mêren; daz kan si got wol lêren. wer sich dienstes dem Grâl het bewegen, wîbe minne er muoz verpflegen. wan der künic sol haben eine zuo reht, ein konen reine, und ander, die got hât gesant zuo hêrren in hêrrenlôsiu lant. über daz gebot ich mich bewac, daz ich nâch minnen dienste pflac. Mir geriet mîn †gevlehteclîche† jugent und eines werden wîbes tugent, daz ich in ir dienste reit und dicke herzelîchen streit. die wilden âventiure mich dûhten gehiure, daz ich selten turnierte. ir minne condewierte mit vröuden in daz herze mîn; durch si tet ich vil strîtes schîn. des twanc mich ir minne kraft gegen der wilden verren ritterschaft. ir minne ich alsus kouft: der heiden und der getouft wâren mit strîten alglîch; si gedâht mich lônes rîch.

*G Sus gît man vonem Grâle dan offenlîche die meide, verholn die man, durch vruht ze dienste wider dar, obe ir kint des Grâles schar mit dienste suln mêren; daz kan si got wol lêren. swer sich dienstes dem Grâle hât bewegen, gein wîbe er minne muoz verpflegen. der künic sol haben eine, ein konen reine, unde ander, die got hât gesant ze hêrren in hêrrenlôsiu lant. über daz gebot ich mich bewac, daz ich nâch minne dienstes pflac. mir geriet mîn vlætigiu jugent unde eines werden wîbes tugent, daz ich in ir dienste reit, dâ ich dicke herticlîchen streit. die wilden âventiure mich dûhten sô gehiure, daz ich selten turnierte. ir minne condewierte mir vröude in daz herze mîn; durch si tet ich vil strîtes schîn. des twanc mich ir minnen kraft gein der wilden verren rîterschaft. ir minne ich alsus koufte: der heiden unde der getoufte wâren mir strîtes al gelîche; si dûhte mich lônes rîche.

*T Sus gît man vonme Grâle dan offenlîche die megde, verholne die man, durch vruht ze dienste wider dar, ob ir vruht des Grâles schar mit dienste suln mêren; daz kan si got wol lêren. swer aber dem Grâle hât dienstes sich bewegen, gegen wîben minne er muoz verpflegen. wan der künec sol haben eine ze rehte, eine konen reine, unde ander, die got hât gesant ze hêrren in hêrrenlôsiu lant. über daz gebot ich mich bewac, daz ich durch minne dienstes pflac. mir riet mîn vlætigiu jugent unde eines werden wîbes tugent, daz ich in ir dienst reit, dâ ich dicke herteclîche streit. die wilden âventiure sîn mohten sô gehiure, daz ich selten turnierte. ir minne condewierte mit vröude in daz herze mîn; durch si tet ich vil strîtes schîn. des twanc mich ir minnen kraft gegen der wilden verren rîterschaft. ir minne ich alsus koufte: der heiden unde der getoufte wâren mir strîtes alglîch; si dûhte mich sô lônes rîch.