*D Swaz dâ was spîse vür getragen, beliben si dâ nâch ungetwagen, daz enschadet in an den ougen niht, als man vischigen handen giht. ich wil vür mich geheizen, man möhte mit mir beizen, wære ich vür vederspil erkant, ich swünge al gernde von der hant; bî sölhen kröpfelînen tæte ich vliegen schînen. wes spotte ich der getriwen diet? mîn alt unvuoge mir daz riet. ir hât doch wol gehœret, waz in rîcheit hât gestœret, warumbe si wâren vreuden arm, dicke kalt unt selten warm. si dolten herzen riwe niht wan durch rehte triwe ân alle missewende. von der hœhesten hende enpfiengens umb ir kumber solt; got was und wart in bêden holt. si stuonden ûf unt giengen dan, Parzival unt der guote man, zem orse gein dem stalle. mit kranker vreuden schalle der wirt zem orse sprach: »mir ist leit dîn hungerbæriu arbeit durch den satel, der ûf dir ligt, der Anfortases wâpen pfligt.«

*m waz dâ was spîse vür getragen, bliben si dâ nâch unbetwagen, daz schadet in an den ougen niht, als man vischigen henden giht. ich wil vür mich geheizen, man möhte mit mir beizen, wær ich von vederspil erkant, ich swünge algerne von der hant; bî solhen kröpfelînen tæte ich vliegen schînen. wes spot ich der getriuwen diet? mîn altiu unvuoge mir daz riet. ir hât doch wol gehœret, waz rîcheit het zerstœret, war umb si wâren vröiden arm, dicke kalt und selten warm. si dolten herzen riuwe niht wan durch rehte triuwe âne alle missewende. von der hœhesten hende enpfiengens umb ir kumber solt; got was und wart in beiden holt. si stuonden ûf und giengen dan, Parcifal und der guote man, zuom rosse gegen dem stalle. mit kranker vröuden schalle der wirt zuo dem rosse sprach: »mir ist leit dîn hungerigiu arbeit durch den satel, der ûf dir liget, der Anfortases wâpen pfliget.«

*G Swaz dâ was spîse vür getragen, beliben si dâ nâch ungetwagen, daz enschât in an den ougen niht, als man vische an den handen giht. ich wil vür mich geheizen, man möhte mit mir beizen, wære ich vür vederspil erkant, ich swünge al gerne von der hant; bî solhen kröpfelînen tæte ich vliegen schînen. wes spotte ich der guoten diet? mîn altiu ungevüege mir daz riet. ir habet iedoch wol gehœret, waz in rîcheit hât zerstœret, warumbe si wâren vröuden arm, dicke kalt und selten warm. si dolten herzeriuwe niht wan durch rehte triuwe âne alle missewende. von der hœhesten hende enpfiengens umbe ir kumber solt; got was unde wart in beiden holt. si stuonden ûf unde giengen dan, Parzival unde der guote man, ze dem orse gein dem stalle. mit kranker vröuden schalle der wirt ze dem orse sprach: »mirst leit dîn hungerbæriu arbeit durch den satel, der ûf dir liget, der Anfortases wâpen pfliget.«

*T Swaz dâ was spîse vür getragen, bliben si dâ nâch ungetwagen, daz enschadet in an den ougen niht, als man vischigen handen giht. ich wil vür mich geheizen, man möhte mit mir beizen, wærich vür vederspil erkant, ich swünge algernde vür die hant; bî sölhen kröpfelînen tætich vliegen schînen. Wes spottich der getriuwen diet? mîn alt unvuoge mir daz riet. ir habt doch wol gehœret, waz in rîcheit hât zerstœret, warumbe si wâren vröuden arm, dicke kalt unde selten warm. Si dolten herzeriuwe niht wan durch rehte triuwe âne alle missewende. von der hœhesten hende enpfiengens umbir kumber solt; got was unde wart in beiden holt. Si stuonden ûf unde giengen dan, Parcifal unde der guote man, zem orse gegen dem stalle. mit kranker vröude schalle Der wirt sprach zem orse: »mir ist leit dîn hungerbæriu arbeit durch den satel, der ûf dir liget, der Anfortasses wâfen pfliget.«