*D Vrâgt er niht bî der êrsten naht, sô zergêt sîner vrâge maht. wirt sîn vrâge an rehter zît getân, sô sol erz künicrîche hân und hât der kumber ende von der hœhesten hende. dâ mit ist Anfortas genesen, ern sol aber niemer künec wesen.‹ sus lâsen wir ame Grâle, daz Anfortases quâle dâ mit ein ende næme, swenne im diu vrâge kæme. wir strichen an die wunden, swâ mit wir senften kunden: die guoten salben nardas unt swaz gedrîakelt was unt den rouch von lignâlôe. im was êt zallen zîten wê. dô zôch ich mich dâ her; swachiu wünne ist mîner jâre wer. sît kom ein rîter dar geriten - der möhtez gerne hân vermiten -, von dem ich dir ê sagte. unprîs der dâ bejagte, sît er den rehten kumber sach, daz er niht zuo dem wirte sprach: ›hêrre, wie stêt iwer nôt?‹ sît im sîn tumpheit daz gebôt, daz er al dâ niht vrâgte, grôzer sælde in dô betrâgte.«

*m vrâgt er niht bî der êrsten naht, sô zergât sîner vrâge maht. wirt sîn vrâge an rehter zît getân, sô sol er daz künicrîche hân und het der kumber ende von der hœhesten hende. dâ mit ist Anfortas genesen, er sol aber niht mê künic wesen.‹ sus lâsen wir an dem Grâl, daz Anfortases quâl dâ mit ein ende næme, wan im diu vrâge kæme. wir strichen an die wunden, wâ mit wir senften kunden: die guoten salben nardas, daz, waz getrîakelt was, und den rouch von lingnum âlôe. im was eht zuo allen zîten wê. dô zôch ich mich dâ her; swachiu wünne ist mîner jâre wer. sît kam ein ritter dar geriten - der möht ez gern hân vermiten -, von dem ich dir sô saget. unprîs er dâ bejaget, sît er den rehten kumber sach, daz er niht zuo dem wirte sprach: ›hêrre, wie stât iuwer nôt?‹ sît im sîn tumpheit daz gebôt, daz er in dâ niht vrâgete, grôzer sælde in dâ betrâgete.«

*G Vrâget er niht bî der êrsten naht, sô zergêt sîner vrâge maht. wirt sîn vrâge an rehter zît getân, sô sol erz künicrîche hân unt hât der kumber ende von der hœhesten hende. dâ mit ist Anfortas genesen, ern sol aber nimer künic wesen.‹ sus lâsen wir ame Grâle, daz Anfortases quâle dâ mit ein ende næme, swenne im diu vrâge kæme. wir strichen an die wunden, swâ mit wir senften kunden: die guoten salben nardas unde swaz gedrîakelt was unt den rouch von lignâlôe. im was êt ze allen zîten wê. dô zôch ich mich dâ her; swachiu wünne ist mîner jâre wer. sît kom ein rîter dar geriten - der möhtez gerner hân vermiten -, von dem ich dir ê sagete. unprîs er dâ bejagete, sît er den rehten kumber sach, daz er niht zem wirte sprach: ›hêrre, wie stêt iuwer nôt?‹ sît im sîn tumpheit daz gebôt, daz er al dâ niht vrâgete, grôzer sælden in dâ betrâgete.«

*T vrâget er niht bî der êrsten naht, sô zergât sîner vrâge maht. wirt sîn vrâge an rehter zît getân, sô sol er daz künecrîche hân unde hât der kumber ende von der hœhesten hende. dâ mit ist Anfortas genesen, er sol aber niht mêr künec wesen.‹ Sus lâse wir an dem Grâle, daz Anfortasses quâle dâ mit ein ende næme, swennim diu vrâge kæme. wir strichen an die wunden, swâ mite wir senften kunden: die guoten salben nardas unde swaz getrîakelt was unde den rouch lingnâlôe. im was eht allenthalben wê. dô zôch ich mich dâ her; swachiu wünne ist mîner jâre wer. Sît kom ein rîter dar geriten - er möhtez gerner hân vermiten -, von dem ich dir ê sagete. unprîs er dâ bejagete, sît er den rehten jâmer sach, daz er niht zuo dem wirte sprach: ›hêrre, wie stât iuwer nôt?‹ sît im sîn tumpheit daz gebôt, daz er dâ niht envrâgete, grôzer sælden in dô betrâgete.«