*D von der küneginne rîch. si kuste den degen minneclîch. er was ir mannes muomen sun - si moht ez wol mit êren tuon - Unde was von arde ein künic hêr. der wirt sprach lachende mêr: »Got weiz, hêr Kaylet, ob ich iu næme Dolet unt iwer lant ze Spane durch den künec Gascane, der iu dicke tuot mit zornes gir, daz wære ein untriwe an mir, wan ir sît mîner muomen kint. die besten gar mit iu hie sint, der rîterschefte herte. wer twang iuch dirre verte?« sô sprach der stolze degen junc: »mir gebôt mîn veter Schiltunc, des tohter Vridebrant dâ hât, daz ich im diende; ez wære sîn rât. der hât von sîme wîbe hie von mîn eines lîbe sehs tûsent rîter wol bekant; die tragent werlîche hant. ich brâht ouch rîter mêr durch in; der ist ein teil gescheiden hin. hie wâren durch die Schotten die werlîche rotten. im kom von Gruonlanden helde zen handen,

*m von der küniginne rîch. si kuste den degen minneclîch. er was ir mannes muomen sun - si mohte ez wol mit êren tuon - und was von art ein künic hêr. der wirt sprach lachende mêr: »goteweiz, hêr Kailet, obe ich iu næme Dolet und iuwer lant ze Spane durch den künic von Saltane, der iu dicke tuot mit zornes gir, daz wære ein untriuwe an mir, wanne ir sît mîner muomen kint. die besten gar mit iu hie sint, der ritterschefte herte. wer twanc iuch dirre verte?« Dô sprach der stolze degen junc: »mir gebôt mîn veter Schildunc, des tohter Fridebrant dâ hât, daz ich im diente; ez wær sîn rât. der het von sînem wîbe hie von mîn eines lîbe sehs tûsent ritter wolbekant; die tragent werlîche hant. ich brâhte ouch ritter mêr durch in; der ist ein teil gescheiden hin. hie wâren ouch durch die Schotten die werlîchen rotten. im kamen von Grunlanden helde zen handen,

*G von der küniginne rîch. diu kuste den degen minneclîch. Si mahtz wol mit êren tuon, er was ir mannes muomen sun und was von arde ein künic hêr. der wirt sprach lachende mêr: »got weiz, hêr Kailet, obe ich iu næme Dolet unde iwer lant Spaninge durch den künic von Gasconinge, der iu dicke tuot mit zornes gir, daz wære ein untriwe an mir. ir sît doch mîner muomen kint. die besten gar mit iu hie sint, der rîterschefte herte. waz twang iuch dirre verte?« dô sprach der stolze degen junc: »mir gebôt mîn veter Schiltunc, des tohter Fridebrant dâ hât, daz ich im diente; ez wære sîn rât. er hât von sînem wîbe hie von mîn eines lîbe sehs tûsent rîter wol bekant; die tragent werlîche hant. hie wâren durch die Schotten die werlîchen rotten. hie was von Gruonlanden helde zir handen,

*T von der küneginne rîch. ir kus, der was minneclîch, den si dem degen bôt mit ir munde rôsenrôt. er was ir mannes muomen sun - si moht ez wol mit êren tuon -, von küneges art ein künec hêr. der wirt sprach lachende mêr: »got weiz, hêr Kaylet, ob ich iu næme Dolet und iuwer lant Spanie durch den künic von Kasganie, der iu tet dicke zornes gir, daz wære ein untriuwe an mir. ir sît doch mîner muomen kint. die besten gar mit iu hie sint, der ritterschefte herte. wer twanc iuch zuo dirre verte?« dô sprach der stolze degen junc: »mir gebôt mîn veter Schiltunc, des tohter Fridebrant dâ hât, daz ich im diente; ez wære sîn rât. er hât von sînem wîbe hie von mîme einigen lîbe sehs tûsent ritter wol bekant; die tragent werlîchiu bant. hie was ouch ritter mêr durch in; der ist ein teil gescheiden hin. hie wâren durch den Schotten die werlîchen rotten. hie was von Gruonlanden helde zuo handen,