*D Dô Frimutel den lîp verlôs, mîn vater, nâch im man dô kôs sînen eldesten sun ze künege dar, ze vogte dem Grâle unt des Grâles schar. daz was mîn bruoder Anfortas, des krône und rîcheit wirdec was. dannoch wir wênec wâren. dô mîn bruoder gein den jâren kom vür der gran sprünge zît, mit sölher jugent hât minne ir strît. sô twinget si ir vriunt sô sêre, man mac es ir jehen zunêre. swelch Grâles hêrre aber minne gert anders, denne diu schrift in wert, der muoz es komen ze arbeit unt in siufzebæriu herzeleit. mîn hêrre unt der bruoder mîn kôs im eine vriundîn, des in dûhte mit guotem site. swer diu was, daz sî dâ mite. in ir dienst er sich zôch, sô daz diu zagheit in vlôch. des wart von sîner clâren hant verdürkelt manec schildes rant. dâ bejagte an âventiure der süeze unt der gehiure: wart ie hôher prîs erkant über elliu rîterlîchiu lant, von dem mære was er der vrîe. ›Amor‹ was sîn krîe.

*m dô Frimutel den lîp verlôs, mîn vater, nâch im man dô kôs sînen altesten sun zuo künige dar, zuo vogte dem Grâl und sîner schar. daz was mîn bruoder Anfortas, der krône und rîcheit wirdic was, wan er sich ie sêre verliez ûf triuwe und êre. dannoch wir wênic wâren. dô mîn bruoder gegen den jâren kam vür der gransprunge zît, mit solicher jugent het minne strît. sô twinget si ir vriunt sô sêre, man mac es jehen vür unêre. welich Grâles hêrre aber minne gert anders, dan diu schrift in wert, der muoz es komen zuo arbeit und in siufzebæriu herzeleit. mîn hêrre und der bruoder mîn kôs im ein künigîn, diu in dûhte solicher site, daz triuwe und zuht im wonte mite. in der dienst er sich zôch, sô daz diu zagheit in vlôch. des wart von sîner clâren hant verdürkelt maniges schiltes rant. dô bejagete an âventiure der süeze und der gehiure: wart ie hôher prîs erkant über alliu ritterlîchiu lant, vor dem mære was er der vrîe. ›Amor‹ was sîn krîe.

*G dô Frimutel den lîp verlôs, mîn vater, nâch im man dô kôs sînen eltesten sun ze künige dar, ze vogete dem Grâl unde des Grâles schar. daz was mîn bruoder Anfortas, der krône unde rîcheit wirdic was. dannoch wir wênic wâren. dô mîn bruoder gegen den jâren kom vür der gran sprünge zît, mit solher jugent hât minne ir strît. sô twinget si ir vriunt sô sêre, man mac es ir jehen ze unêre. swelch Grâles hêrre aber minne gert anders, danne diu schrift in wert, der muoz des komen in arbeit unde in siuftebæriu herzeleit. mîn hêrre und der bruoder mîn kôs im eine vriundîn, des in dûhte mit guotem site. swer diu was, daz sî dâ mite. in ir dienste er sich zôch, sô daz diu zageheit in vlôch. des wart von sîner clâren hant verdürkelt maniges schildes rant. dâ bejaget an âventiure der süeze unde der gehiure: wart ie hôher brîs erkant über elliu rîterlîchiu lant, von dem mære was er vrîe. ›Amor‹ was sîn krîe.

*T Dô Frimutel den lîp verlôs, mîn vater, nâch im man dô kôs sînen eltesten sun ze künege dar, ze vogete dem Grâle unde des schar. daz was mîn bruoder Anfortas, der krône unde rîcheit wirdic was. dannoch wir wênic wâren. Dô mîn bruoder gegen den jâren kom vür der gran sprünge zît, mit sölher jugent hât minne strît. sô twinget sir vriunt sô sêre, man mac es ir jehen zunêre. swelch Grâles hêrre aber minnen gert anders, danne diu schrift in wert, der muoz es komen in arbeit unde in siuftebærez herzeleit. Mîn hêrre unde der bruoder mîn kôs im eine vriundîn, diu in dûhte in guotem site. swer diu was, daz sî dâ mite. in ir dienste er sich zôch, sô daz diu zageheit in vlôch. des wart von sîner clâren hant verdürkelt manec schiltes rant. dâ bejagete an âventiure der süeze unde der gehiure: wart ie hôher prîs bekant über alliu rîterlîchiu lant, vor dem mære was er dô der vrîe. ›Amor‹ was sîne krîe.