*D Si kômen alle dar vür kint, die nû dâ grôze liute sint. wol die muoter, diu daz kint gebar, daz sol ze dienste hœren dar. der arme unt der rîche vriunt sich al gelîche, ob man ir kint eischet dar, daz siz sulen senden an die schar. man holt si in manegen landen. vor sündebæren schanden sint si immer mêr behuot unt wirt ir lôn ze himel guot. swenne in erstirbet hie daz leben, sô wirt in dort der wunsch gegeben. die newederthalp gestuonden, dô strîten begunden Lucifer unt Trinitas, swaz der selben engel was, die edelen unt die werden muosen ûf die erden zuo dem selbem steine. der stein ist immer reine. ich enweiz, ob got ûf si verkôs ode ob ers vürbaz verlôs. was daz sîn reht, er nam si wider. des steines pfligt iemer sider, die got dar zuo benande unt in sînen engel sande. hêrre, sus stêt ez umben Grâl.« dô sprach aber Parzival:

*m si kômen alle dar vür kint, die nû dâ grôze liute sint. wol die muoter, diu daz kint gebar, daz zuo dienst sol hœren dar. der arm und der rîche vröuwent sich alle gelîche, ob man ir kint eischet dar, daz si sullen senden an die schar. man holt si in manigen landen. vor sündebæren schanden sint si iemer mê behuot und wirt ir lôn zuo himel guot. wan †im† erstirbet hie daz leben, sô wirt in dort der wunsch gegeben. die eintwederhalp gestuonden - zuo strîten begunden Lucifer und Trinitas -, waz der selben engel was, die edeln und die werden muosten ûf die erden zuo dem selben stein. der stein ist iemer rein. ich weiz, ob got ûf si verkôs oder ob er si vürbaz verlôs. was daz sîn reht, er nam si wider. des steines pflâgen iemer sider, die got dar zuo benante und in sînen engel sante. hêrre, sus stât ez umb den Grâl.« dô sprach aber Parcifal:

*G Si kômen alle dar vür kint, die nû dâ grôze liute sint. wol der muoter, diu daz kint gebar, daz ze dienste sol hœren dar. der arme unde der rîche vröunt sich algelîche, ob man ir kint eischet dar, daz si ez suln senden an die schar. man holt si in manigen landen. vor sündebæren schanden sint si immer mê behuot unde wirt ir lôn ze himel guot. swenne in erstirbet hie daz leben, sô wirt in dort der wunsch gegeben. die newederhalp gestuonden, dô strîten begunden Lucifer unde Trinitas, swaz der selben engel was, die edelen unde die werden muosen ûf die erden zuo dem selben steine. der stein ist immer reine. ichne weiz, ob got ûf si verkôs ode ob ers vürbaz verlôs. was daz sîn reht, er nam si wider. des steines pflegent imer sider, die got dâ zuo benante unt in sînen engel sante. hêrre, sô stêt ez umben Grâl.« dô sprach aber Parzival:

*T Si kômen alle dar vür kint, die nû dâ grôze liute sint. wol der muoter, diu daz kint gebar, daz ze dienste sol komen dar. der arme unde der rîche vröunt sich alglîche, ob man ir kint eischet dar, daz siz suln senden an die schar. man holt si in manegen landen. vor sündebæren schanden sint si iemer mêr behuot unde wirt ir lôn ze himele guot. swennin erstirbet hie daz leben, sô wirt in dort der wunsch gegeben. Dien wederhalp gestuonden, dô strîten begunden Luzifer unde Trinitas, swaz der selben engele was, die edeln unde die werden muosen ûf die erden zuo dem selben steine. der stein ist iemer reine. ine weiz, ob got ûf si verkôs oder ober si vürbaz verlôs. was daz sîn reht, er nam si wider. des steines pfliget iemer sider, die got dar zuo benande unde in sînen engel sande. hêrre, sus stêt ez umben Grâl.« Dô sprach aber Parcifal: