*D in küssen unt vâhen zir. er sprach: »nû ging ouch her ze mir.« der wirt in kuste selbe dô. si wâren ze sehen ein ander vrô. Gahmuret sprach aber sân: »owê, junc süezer man! waz solte her dîn kranker lîp? sag an, gebôt dir daz ein wîp?« »die gebietent wênic, hêrre, mir. mich hât mîn veter Gaschier her brâht. er weiz wol selbe wie. ich hân im tûsent rîter hie unt stên im dienestlîche bî. ze Rœms in Normandi kom ich zer samnunge. ich brâht im helde junge. Ich vuor von Schampane durch in. nû wil kunst unt sin der schade an in kêren, ir enwelt iuch selben êren. gebietet ir, sô lât in mîn geniezen, semften sînen pîn.« »Den rât nim dû vil gar zuo dir. var dû unt mîn hêr Gaschier unt bringet mir Kayleten her.« dô wurben si des heldes ger, si brâhten in durch sîne bete. dô wart ouch er von Gahmurete minneclîche enpfangen unt dicke umbevangen

*m in küssen und vâhen ze ir. er sprach: »nû ganc ouch her zuo mir.« der wirt in selber kuste dô. si wâren ze sehende ein ander vrô. Gahmuret sprach aber sân: »owê, †juncvrouwen† man! waz solt her dîn kranker lîp? sag an, gebôt dir daz ein wîp?« »die gebietent wênic, hêrre, mir. mich hât mîn veter Gaschier her brâht. er weiz wol selber wie. ich hân im tûsent ritter hie und stân ime dienstlîchen bî. ze Rumes in Normandi kam ich zer samenunge. ich brâhte im helde junge. ich vuor von Schampanie durch in. nû wil kunst und sin der schade an in kêren, ir enwelt iuch selben êren. gebietet irs, sô lât in mîn geniezen, senftet mîne pîn.« »den rât nim dû gar zuo dir. var dû und mîn hêrre Gaschier und bringet mir Kaileten her.« dô wurben si des heldes ger, si brâhten in durch sîne bete. dô wart er ouch von Gahmurete minneclîchen enpfangen und dicke umbevangen

*G in küssen und vâhen zir. er sprach: »nû geng ouch her ze mir.« der wirt in kuste selbe dô. si wâren ze sehene ein ander vrô. Gahmuret sprach aber sân: »owê, junge süezer man! waz solte her dîn kranker lîp? sage an, gebôt dir daz ein wîp?« »die gebietent, hêrre, wênic mir. mich hât mîn veter Gatschier her brâht. er weiz wol selbe wie. ich hân im tûsent rîter hie unt stên im dienstlîchen bî. ze Roumes in Normandi kom ich zer samnunge. ich brâht im helde junge. ich vuor von Schampanie durch in. nû wil kunst und sin ir schaden an in kêren, irn welt iuch selben êren. gebiet ir, sô lât in mîn geniezen, senftet sînen pîn.« er sprach: »den rât nim gar ze dir. var dû und mîn hêr Gatschier unde bringet Kaileten her.« dô wurben si des heldes ger, si brâhten in nâch sîner bet. dô wart ouch er von Gahmuret vil dick umbevangen unde minniclîche enpfangen

*T in küssen und vâhen zir. er sprach: »nû gêt ir her zuo mir.« diu wirtîn in selbe kuste dô. si wâren ein ander zuo sehen vrô. Gahmuret sprach aber sân: »owê, junc süezer man! waz wolte her dîn kranker lîp? sage an, gebôt dir diz ein wîp?« er sprach: »nein, ez ist niht, waz sô anders mir geschiht. si gebietent, hêrre, wênic mir. mich hât mîn hêrre Gatschier her brâht. er weiz wol selbe wie. ich hân im tûsent ritter hie, die stân im dienstlîchen bî. zer Romischer Normandi kom ich zuo der samenunge. ich vuorte im helde junge und vuor von Schampanie durch in. nû wil kunst und sin den schaden an in kêren, ir enwelt iuch selber êren. gebietet ir, sô lât in mîn geniezen, sanfter sîn in pîn.« er sprach: »den rât nim gar zuo dir. var dû und mîn hêrre Gatschier und bringet mir Kayleten her.« dô wurben si des heldes ger, si brâhten in nâch sîner bete. dô wart er ouch von Gahmurete vil minniclîche enpfangen, mit armen umbevangen