*D Parzival hin zim dô sprach: »hêrre, ich wæne, daz ie geschach. von wem was der man erborn, von dem sîn ane hât verlorn den magetuom, als ir mir sagt? daz moht ir gerne hân verdagt.« Der wirt sprach aber wider zim: »von dem zwîvel ich iuch nim. sagich niht wâr die wârheit, sô lât iu sîn mîn triegen leit. diu erde Adames muoter was. von erden vruht Adam genas. dannoch was diu erde ein magt. noch hân ich iu niht gesagt, wer ir den magetuom benam. Kaines vater was Adam. er sluoc Abeln umbe krankez guot. dô ûf die reinen erden daz bluot viel, ir magetuom was vervaren. den nam ir Adames baren. dô huop sich êrst der menschen nît. alsô wert er immer sît. in der werlt doch niht sô reines ist sô diu magt âne valschen list. nû prüevet, wie reine die meide sint. got was selbe der meide kint. von meiden sint zwei mensche komen. Got selbe antlütze hât genomen nâch der êrsten meide vruht. daz was sîner hôhen art ein zuht.

*m Parcifal hin zuo im dô sprach: »hêrre, ich wæne, daz nie geschach. von wem was der man erborn, von dem sîn ane het verlorn den magetuom, als †er† mir †sagete†? daz mohtet ir gerne hân †verdagete†.« der wirt sprach aber zuo im: »von dem zwîvel ich iuch nim. sage †† iu niht die wârheit, sô lât iu sîn mîn kriegen leit. diu erde Adames muoter was. von erden vruht Adam genas. dannoch was diu erde maget. noch hân ich iu niht gesaget, wer ir den magetuom benam. Kaynes vater was Adam. †den† sluoc Abeln umb krankez guot. dô ûf die reinen erden daz bluot viel, ir magetuom was vervarn. den nam ir Adames barn. dô huop sich êrst der menschen nît. alsô wert er iemer sît. in der werlt doch niht sô reines ist sô diu maget âne valschen list. nû brüefet, wie reine die megde sint. got was selbe der megde kint. von megden sint zwei menschen komen. got selbe antlitze het genomen nâch der êrsten megde vruht. daz was sîner hôhen art ein zuht.

*G Parzival hin ze im dô sprach: »hêrre, ich wæne, daz ie geschach. von wem was der man geborn, von dem sîn an hât verlorn den magetuom, als ir mir saget? daz moht ir gerne hân verdaget.« der wirt sprach aber wider zim: »von dem zwîvel ich iuch nim. sage ich niht wâr die wârheit, sô lât iu sîn mîn triegen leit. diu erde Adames muoter was. von erden vruht Adam genas. dannoch was diu erde ein maget. noch hân ich iu niht gar gesaget, wer ir den magetuom benam. Caines vater was Adam. der sluoc Abel umbe krankez guot. dô ûf die reinen erde daz bluot viel, ir magetuom was vervarn. den nam ir Adames barn. dô huop sich êrst der menschen nît. alsô wert er immer sît. in der werlt noch niht sô reines ist sô diu maget ân valschen list. nû prüevet, wie reine die meide sint. got was selbe der meide kint. von meiden sint zwei mensch komen. got selbe antlütze hât genomen nâch der êrsten meide vruht. daz was sîner hôhen art ein zuht.

*T Parcifal zim dô sprach: »hêrre, ich wæne, daz ie geschach. von wem was der man geborn, von dem sîn ane hât verlorn den magetuom, alsir mir saget? daz mohtir gerne hân verdaget.« Der wirt sprach aber wider zim: »von dem zwîvele ich iuch nim. sagich iu niht die wârheit, sô lât iu sîn mîn triegen leit. Diu erde Adames muoter was. von erden vruht Adam genas. dannoch was diu erde ein maget. noch hân ich iu niht gesaget, wer ir den magetuom benam. Caynes vater was Adam. der sluoc Abeln umbe krankez guot. dô ûf die reinen erde daz bluot viel, ir magetuom was vervarn. den nam ir Adames barn. dô huop sich êrst des menschen nît. alse wert er iemer sît. in der werlte doch sô reines niht ist sô diu maget âne valschen list. nû prüevet, wie reine die megde sint. got selbe was der megde kint. von megden sint zwei menschen komen. got selbe antlitze hât genomen nâch der êrsten megde vruht. daz was sîner hôhen art ein zuht.