*D Got müeze uns helfen beiden. hêrre, ir sult mich bescheiden - ruochet alrêrst sitzen -, sagt mir mit kiuschen witzen, wie der zorn sich an gevienc, dâ von got iwern haz enpfienc. durch iwer zuht gedult vernemt von mir sîn unschult, ê daz ir mir von im iht klagt. sîn helfe ist immer unverzagt. doch ich ein leie wære, der wâren buoche mære künd ich lesen und schrîben, wie der mensch sol belîben mit dienste gein des helfe grôz, den der stæten helfe nie verdrôz vür der sêle senken. sît getriwe âne allez wenken, sît got selbe ein triwe ist. dem was unmære ie valscher list. wir suln in des geniezen lân: er hât vil durch uns getân, sît sîn edel hôher art durch uns ze menschen bilde wart. got heizet unt ist ein wârheit. dem was ie valschiu vuore leit. daz sult ir gar bedenken. ern kan an niemen wenken. nû lêret iwer gedanke, hüetet iuch gein im an wanke.

*m got muoz uns helfen beiden. hêrre, ir sullet mich bescheiden - und ruocht allerêrst sitzen -, saget mir mit kiuschen witzen, wie der zorn sich an gevienc, dâ von got iuwern haz enpfienc. durch iuwer zuht gedult vernemet von mir sîn unschult, ê daz ir mir von im iht klaget. sîn helf ist iemer unverzaget. doch ich ein †lœsære†, der wâren buoch mære künde ich lesen und schrîben, wie der mensch sol blîben mit dienst gegen des helfe grôz, den der stæten helfe nie verdrôz vür der sêle senken. sît getriuwe âne allez wenken, sît got selbe ein triuwe ist. dem ist unmær ein valscher list. wir sullen in des geniezen lân: er het vil durch uns getân, sît sîn edel hôher art durch uns ze menschen bilde wart. got heizet und ist diu wârheit. dem was ie valschiu vuore leit. daz solt ir gar bedenken. er kan an nieman wenken. nû lêret iuwer gedanke, hüetet iuch gegen im an wanke.

*G Got müeze uns helfen beiden. hêrre, ir sult mich bescheiden - ruochet alrêrste sitzen -, saget mir mit kiuschen witzen, wie der zorn sich an gevienc, dâ von got iuwern haz enpfienc. durch iuwer zühte gedult vernemet von mir sîn unschult, ê daz ir mir von im iht klaget. sîn helfe ist immer unverzaget. doch ich ein leige wære, der wâren buoche mære künde ich lesen unde schrîben, wie der mensche sol belîben mit dienste gein des helfe grôz, den der stæten helfe nie verdrôz vür der sêle senken. sît getriu ân allez wenken, sît got selbe ein triuwe ist. dem was unmære ie valscher list. wir suln in des geniezen lân: er hât vil durch uns getân, sît sîn edel hôher art durch uns ze menschen bilde wart. got heizet unde ist diu wârheit. dem was ie valschiu vuore leit. daz sult ir gar bedenken. erne kan an niemen wenken. nû lêrt iuwer gedanke, hüet iuch gein im an wanke.

*T got müeze uns helfen beiden. hêrre, ir sult mir bescheiden - geruochet alrêrst sitzen -, saget mir mit kiuschen witzen, wie der zorn sich angehüebe ie, dâ von got iuwern haz enpfie. durch iuwer zühte gedult vernemet von mir sîn unschult, ê daz ir mir von im iht klaget. sîn helfe ist iemer unverzaget. doch ich ein leie wære, der wâren buoche mære kündich lesen unde schrîben, wie der mensche sol blîben mit dienste gegen des helfe grôz, den der stæten helfe nie verdrôz vür der helle senken. sîn triuwe ist âne wenken, sît got selbe ein triuwe ist. dem was unmære ie valscher list. wir suln in des geniezen lân: er hât vil durch uns getân, sît sîn edel hôher art durch uns ze menschen bilde wart. got heizet unde ist diu wârheit. dem was ie valschiu vuore leit. daz sult ir gar bedenken. ern kan an niemanne wenken. nû lêret iuwer gedanke, hüet iuch gegen im an wanke.