*D si brâhten opfers vil ir goten, die von der stat. waz wart geboten Dem küenem Razalige, dô er schiet von dem wîge, daz leister durch triwe. doch wart sîn jâmer niwe nâch sîme hêrren Isenhart. der burcgrâve des innen wart, daz er kom. dô wart ein schal. dar kômen die vürsten über al ûz der küneginne lande von Zazamanc. die sageten im des prîses danc, den er het aldâ bezalt. ze rehter tjost het er gevalt vier unt zweinzec rîter nider unt zôch ir ors al meistic wider. Dâ wâren gevangen vürsten drî. den reit manec rîter bî ze hove ûf den palas. entslâfen unt enbizzen was, unt wünneclîche gefeit mit kleidern wol bereit was des hœhsten wirtes lîp. diu ê hiez maget, diu was nû wîp; diu in her ûz vuorte an ir hant. si sprach: »mîn lîp unt ouch mîn lant ist disem rîter undertân, ob ez im vîende wellent lân.« Dâ wart gevolget Gahmurete einer hovelîchen bete:

*m si brâhten opfers vil ir goten, die von der stat. waz wart geboten dem küenen Razalige, dô er schiet von dem wîge, daz leister durch triuwe. doch wart sîn jâmer niuwe nâch sînem hêrren Ysenhart. der burcgrâve des innen wart, daz er kam. dô wart ein schal. dar kômen die vürsten überal ûz dem lande von Zazamanc. die sageten ime des prîses danc, den er hette aldâ bezalt. ze rehter just hette er gevalt ir vier und zweinzic ritter nider und zôch ir ros aleinic wider. dâ wâren gevangen vürsten drî. den reit manic ritter bî ze hove ûf den palas. entslâfen und enbizzen was, und wünneclîchen gefeitet mit kleidern wol bereitet was des hœhesten wirtes lîp. diu ê was maget, diu was nû wîp; diu in her ûz vuorte an ir hant und sprach: »mîn lîp und ouch mîn lant ist disem ritter undertân, ob uns die vîende wellent lân.« Dâ wart gevolget Gahmurete einer hovenlîchen bete.

*G si brâhten opfers vil ir goten, als ez von der stat was geboten dem küenen Razalige, dô er schiet von dem wîge. daz leister durch triwe. doch was sîn jâmer niwe nâch sînem hêrren Ysenhart. dô der burcgrâve innen wart, daz er was komen, dô wart ein schal. dar kômen die vürsten über al der künigîn von Zazamanc unde seiten im des brîses danc, den er het al dâ bezalt. ze rehter tjost heter gevalt in vier unt zweinzec rîter nider unt zôch ir ors almeistec wider. dâ wâren gevangener vürsten drî. den reit ouch mêr rîter bî ze hove ûf den palas. entslâfen und enbizzen was, unt wünneclîchen gefeit mit kleideren harte wol bereit was des obersten wirtes lîp. diu ê was maget, diu was nû wîp; diu in her ûz vuorte an ir hant. si sprach: »mîn liute und mîn lant ist disme rîter undertân, Op ims die vînde wellent lân.« dô wart gevolget Gahmuret einer höveschlîchen bet:

*T Si brâhten opfers vil ir goten, die von der stat. waz was geboten dem küenen Razalige, dô er schiet von dem wîge, daz leiste er durch triuwe. doch was sîn jâmer niuwe nâch sîme hêrren Isenhart. dô der burcgrâve des innen wart, daz er kam, dô wart ein schal. dar kômen die vürsten über al der künegîn von Zazamanc und sageten im sînes prîses danc, den het er aldâ bezalt. ze rehter jost het er ervalt viere und zwenzic ritter nider und zôch ir ors almeistic wider. dâ wâren gevangener künige drî. den reit vil manic ritter bî zuo hove ûf den palas. geslâfen und enbizzen was, und wünneclîche gefeitet mit kleidern wol bereitet was des hœhesten wîbes lîp. diu ê hiez maget, diu ist nû wîp; si vuorte in vür an ir hant und sprach: »mîn lîp und mîn lant ist disem ritter undertân, ob ez nû die næhesten wellent lân.« Dô wart gevolget Gahmurete einer höveschlîchen bete: