*D Cundrie la surziere mir dannen bringet schiere alle samztage naht mîne spîse - des hât si sich bedâht -, die ich ganze wochen haben sol.« si sprach: »wære mir anders wol, ich sorgete wênec umbe die nar. der bin ich bereitet gar.« Dô wânde Parzival, si lüge unt daz si in anders gerne trüge. er sprach in schimpfe zir dar în: »durch wen tragt ir daz vingerlîn? ich hôrt ie sagen mære, klôsenærinne unt klôsenære, die solten mîden amûrschaft.« si sprach: »het iwer rede kraft, ir wolt mich velschen gerne. swenne ich nû valsch gelerne, sô hebt mirn ûf, sît ir dâ bî. ruochtes got, ich bin vor valsche vrî. ich enkan decheinen widersaz.« si sprach: »disen mahelschaz trag ich durch einen lieben man, des minne ich nie an mich gewan mit menschlîcher tæte. magetuomlîches herzen ræte mir gein im râtent minne.« si sprach: »den hân ich hie inne, des kleinôt ich sider truoc, sît Oriluses tjost in sluoc.

*m Condrie lasurziere mir dannen bringet schiere alle sameztage naht mîne spîse - des het si sich bedâht -, der ich ganze wochen leben sol.« si sprach: »wære mir anders wol, ich sorgete wênic umb die nar. der bin ich wol bereitet dâr.« Dô wânde Parcifal, si lüge und daz sin anders gerne trüge. er sprach in schimpfe zuo ir dar în: »durch wen traget ir daz vingerlîn? ich hôrte ie sagen mære, klôsenærinne und klôsenære, die solten mîden amûrschaft.« si sprach: »het iuwer rede kraft, ir woltet mich velschen gerne. wenne ich nû valsch gelerne, sô hebet mir in ûf, sît ir dâ bî. ruochets got, ich bin vor valsche vrî. ich enkan dekeinen widersaz.« si sprach: »disen mahelschaz trage ich durch einen lieben man, des minne ich nie an mînen ougen gewan mit menschlîcher tæte. magetuomlîches herzen ræte mir gegen ime râtent minne.« si sprach: »den hân ich hinne, des kleinœte ich sider truoc, sît Orilus in sluoc.

*G Gundrie lasurziere mir dannen bringet schiere alle sameztage naht mîn spîse - des hât si sich bedâht -, die ich ganze wochen haben sol.« si sprach: »wær mir anders wol, ich sorgete wênic umbe die nar. der bin ich wol gereit gar.« dô wânt Parzival, si lüge unt daz sin anders trüge. er sprach in schimpfe zir dar în: »durch wen traget ir daz vingerlîn? ich hôrte ie sagen mære, klôsenærinne unde klôsenære, die solden mîden amûrschaft.« si sprach: »het iuwer rede kraft, ir wolt mich velschen gerne. swenne ich nû valsch gelerne, sô hebet mirn ûf, sît ir dâ bî. ruochet es got, ich bin von valsche vrî. ich enkan deheinen widersaz.« si sprach: »disen mahelschaz trage ich durch einen lieben man, des minne ich nie an mich gewan mit menschlîcher tæte. magetuomes herzen ræte mir gegen im râtent minne.« si sprach: »den hân ich hinne, des kleinœde ich sider truoc, sît Orilluses tjost in sluoc.

*T Kundrie Lasurziere mir dannen bringet schiere alle samztage naht mîne spîse - des hât si sich bedâht -, die ich die wochen haben sol.« si sprach: »wære mir anders wol, ich sorgete wênic umbe die nar. der bin ich wol bereitet gar.« Dô wânde Parcifal, si lüge unde daz sin anders gerne trüge. er sprach in schimpf zuo ir dar în: »durch wen traget ir diz vingerlîn? ich hôrte ie sagen mære, daz klôsenærinne unde klôsenære solten mîden amûrschaft.« Si sprach: »hât iuwer rede kraft, ir wolt mich velschen gerne. swennich nû valsch gelerne, sô hebt mirn ûf, sît ir dâr bî. ruochet es got, ich bin vor valsche vrî. ich kan deheinen widersaz.« si sprach: »disen mahelschaz tragich einem lieben man, des minne ich nie an mich gewan mit menschlîcher tæte. magetuomlîches herzen ræte mir gegen im râtent minne.« si sprach: »den hân ich hinne, des kleinœde ich sider truoc, sît Orilus zer tjost in sluoc.