*D Si wâren im durch sippe holt unt dienden im ûf sînen solt. werdecheit gab er ze lône unt pflag ir anders schône. Gawan sprach zen kindelîn: »wol iu, süezen mâge mîn, mich dunket des, ir wolt mich klagen, ob ich wære alhie erslagen.« Man moht in klage trûwen wol; si wâren halt sus in jâmers dol. er sprach: »mir was umbe iuch vil leit. wâ wârt ir, dô man mit mir streit?« si sagtenz im, ir keiner louc: »ein mûzersprinzelîn enpflouc uns, dô ir bî der künegîn sâzet. dâ liefe wir elliu hin.» Die dâ stuonden unde sâzen, die merkens niht vergâzen, die prüeveten, daz hêr Gawan wære ein manlîch, höfsch man. urloubes er dô gerte, des in der künec gewerte unt daz volc al gemeine, wan der lantgrâve al eine. die zwêne nam diu künegîn unt Gawans junchêrrelîn. si vuorte si, dâ ir pflâgen juncvrouwen âne bâgen. dô nam ir wol mit zühten war manec juncvrouwe wol gevar.

*m si wâren ime durch sippe holt und dienden ime ûf sînen solt. werdicheit gap er ze lône und pflac ir anders schône. Gawan sprach zen kindelîn: »wol iu, süezen mâge mîn, mich dunket des, ir wolt mich klagen, obe ich wære alhie erslagen.« man mohte in klage getriuwen wol; si wâren joch sus in jâmers dol. er sprach: »mir was umb iuch vil leit. wâ wâret ir, dô man mit mir streit?« si sagetenz ime, ir keiner louc: »ein mûzersprinzelîn enpflouc uns, dô ir bî der künigîn sâzet. dâ liefen wir alliu hie hin.» die dâ stuonden unde sâzen, die merkens niht vergâzen, die brüefeten, daz hêr Gawan wære ein manlîch hoves man. urloubes er dô gerte, des in der künic gewerte und daz volc al gemeine, wanne der lantgrâve aleine. die zwêne nam diu künigîn und Gawanes junchêrrelîn. si vuorte si, dâ ir pflâgen juncvrouwen âne bâgen. dô nam ir wol mit zühten war manic juncvrouwe wol gevar.

*G si wâren im umbe sippe holt unt dienden im ûf sînen solt. werdicheit gap er ze lône unde pflac ir anders schône. Gawan sprach zen kindelîn: »ô wol iu, lieben mâge mîn, mich dunket des, ir wolt mich klagen, obe ich wære al hie erslagen.« man mohte in klage getrûwen wol; si wâren doch sus in jâmers dol. er sprach: »mir was umbe iuch vil leit. wâ wârt ir, dô man mit mir streit?« si sagetenz im, ir deheiner louc: »ein mûzsprinzelîn enpflouc uns, dô ir bî der künigîn sâzet. dâ liefen wir elliu hin.« Die dâ stuonden unde sâzen, die merkens niht vergâzen, die prüeveten, daz hêr Gawan wære ein manlîch, höfsch man. urloubes er dô gerte, des in der künic gewerte unt daz volc algemeine, wan der lantgrâve aleine. die zwêne nam diu künigîn unde Gawanes junchêrrelîn. si vuorte si, dâ ir pflâgen juncvrouwen âne bâgen. dô nam ir wol mit zühten war manic vrouwe wol gevar.

*T si wâren im durch sippe holt unde dienden im ûf sînen solt. werdecheit gap er in ze lône unde pflac ir anders schône. Gawan sprach zen kindelîn: »wol iu, süezen mâge mîn, mich dunket des, ir wolt mich klagen, ob ich wære alhie erslagen.« Man moht in klage getriuwen wol; si wâren halt sus jâmers vol. Er sprach: »mir was umbe iuch vil leit. wâ wâret ir, dô man mit mir streit?« Si sagetenz im, ir deheiner louc: »ein mûzersprinzelîn enpflouc uns, dô ir wâret bî der künegîn.« »Wol ir süezen mâge mîn!» Die dâ stuonden unde sâzen, die merkens niht vergâzen, die prüeveten, daz hêr Gawan wære ein harte hövescher man. Urloubes er dô gerte, des in der künec gewerte unde daz volc algemeine, wan der lantgrâve aleine. die zwêne nam diu künegîn unde Gawans junchêrrelîn. si vuorte si, dâ ir pflâgen juncvrouwen âne bâgen. Dô nam ir wol mit zühten war manec juncvrouwe wol gevar.