*D Dô sprach der werde, süeze man: »daz tuon ich, swester, ob ich kan. dar zuo gib selbe dînen rât. dich dunket, daz mir missetât werdecheit habe underswungen, von prîse mich gedrungen. waz töht ich denne ze bruoder dir? wan dienden alle krône mir, der stüende ich ab durch dîn gebot. dîn hazzen wære mîn hœhstiu nôt. mir ist unmære vreude unt êre niht wan nâch dîner lêre. Hêr Gawan, ich wil iuch des biten: ir kômt durch prîs dâ her geriten. nû tuotz durch prîses hulde, helfet mir, daz mîne schulde mîn swester ûf mich verkiese. ê daz ich si verliese, ich verkiuse ûf iuch mîn herzeleit, welt ir mir geben sicherheit, daz ir mir werbet sunder twâl mit guoten triwen umben Grâl.« Dâ wart diu suone geendet unt Gawan gesendet an dem selben mâle durch strîten nâch dem Grâle. Kyngrimursel ouch verkôs ûf den künec, der in dâ vor verlôs, daz er im sîn geleite brach. vor alden vürsten daz geschach.

*m Dô sprach der werde, süeze man: »daz tuon ich, swester, ob ich kan. dar zuo gip selber dînen rât. dich dunket, daz mir missetât werdecheit habe underswungen, von prîse mich gedrungen. waz töht ich danne ze bruoder dir? wanne dieneten alle krônen mir, der stüende ich abe durch dîn gebot. dîn hazzen wære mîn hœhestiu nôt. mir ist unmære vröude und êre niht wanne nâch dîner lêre. hêr Gawan, ich wil iuch biten: ir kômet durch prîs dâ her geriten. nû tuot daz durch prîses hulde, helfet mir, daz mîne schulde mîn swester ûf mich verkiese. ê daz ich si verliese, ich verkiuse ûf iuch mîn herzeleit, wellet ir mir geben sicherheit, daz ir mir werbet sunder twâl mit guoten triuwen umb den Grâl.« dâ wart diu suone geendet und Gawan gesendet an dem selben mâle durch strîten nâch dem Grâle. Kingrimursel ouch verkôs ûf den künic, der in dâ vor verlôs, daz er ime sîn geleite brach. vor allen den vürsten daz geschach.

*G dô sprach der werde, süeze man: »daz tuon ich, swester, obe ich kan. dar zuo gip selbe dînen rât. dich dunket, daz mir missetât werdicheit habe underswungen, von brîse mich gedrungen. waz töhte ich dane ze bruoder dir? wan dienden alle krône mir, der stüende ich abe durch dîn gebot. dîn hazzen wære mîn meistiu nôt. mirst unmære vröude unde êre wan nâch dîner lêre. hêr Gawan, ich wil iuch des biten: ir kômet durch prîs dâ her geriten. nû tuot ez durch brîses hulde, helfet mir, daz mîne schulde mîn swester ûf mich verkiese. ê daz ich si verliese, Ich verkiuse ûf iuch mîn herzeleit, welt ir mir geben sicherheit, daz ir mir werbet sunder twâl mit guoten triwen umbe den Grâl.« dâ wart diu suone geendet unde Gawan gesendet an dem selben mâle durch strîten nâch dem Grâle. Kingrimursel ouch verkôs ûf den künic, der in dâ vor verlôs, daz er im sîn geleite brach. vor al den vürsten daz geschach.

*T Dô sprach der werde, süeze man: »daz tuon ich, swester, ob ich kan. dar zuo gip selbe dînen rât. dich dunket, daz mir missetât werdecheit habe underswungen, von prîse mich gedrungen. waz töhtich danne ze bruoder dir? wan dienten alle krônen mir, den stüendich abe durch dîn gebot. dîn hazzen wære mîn hœhstiu nôt. mirst unmære vröude unde êre niht wan nâch dîner lêre. Hêr Gawan, ich wil iuch des biten: ir kômet durch prîs dâ her geriten. nû tuotz durch prîses hulde, helfet mir, daz mîner schulde mîn swester ûf mich verkiese. ê daz ich si verliese, ich verkiuse ûf iuch mîn herzeleit, welt ir mir geben sicherheit, daz ir mir werbet sunder twâl mit guoten triuwen umbe den Grâl.« Dâ wart diu suone geendet unde Gawan gesendet an dem selben mâle durch strîten nâch dem Grâle. Kyngrimursel ouch verkôs ûf den künec, der in dâ verlôs, daz er im sîn geleite brach. vor alden vürsten daz geschach.